1 Recortyssyn 11 - Yn Vible Casherick 1775 1819

CAB. XI

¹ Eisht ren ooilley Israel ad-hene y haglym cooidjagh gys David, ec Hebron, gra, Cur-my-ner, ta shin dty chraue as dt’eill.

² As marish shoh cha voddey er-dy-henney, eer tra va Saul ny ree, uss v’eh, hie magh as stiagh roish Israel ayns caggey: as rhyt’s dooyrt y Chiarn dty Yee, Uss nee bochillagh my phobble Israel, as uss nee reill harrish my phobble Israel.

³ Shen-y-fa haink ooilley shanstyr Israel gys y ree, gys Hebron, as ren David conaant roo, ayns Hebron, fenish y Chiarn, as ren ad David y ooilaghey ny ree harrish Israel, cordail rish goo’n Chiarn, liorish Samuel.

⁴ As hie David as ooilley Israel gys Jerusalem, ta shen, Jebus, raad va ny Jebusiteyn, cummaltee yn cheer.

⁵ As dooyrt cummaltee Jebus rish David, Cha jig lhiat’s cheet stiagh ayns shoh. Ny-yeih ghow David cashtal Zion, ta shen ard-valley Ghavid.

⁶ As dooyrt David, Quoi-erbee hoshiaght vrishys stiagh er ny Jebusiteyn, bee eh ny ard-ghooinney as captan. Myr shen hie Joab mac Zeruiah seose hoshiaght, as eh va’n ard-ghooinney.

⁷ As ren David cummal ayns y chashtal, shen-y-fa, denmys ad eh, Ard-valley Ghavid.

⁸ As hrog eh yn ard-valley ooilley mygeayrt, eer veih Millo: as ren Joab coamrey yn chooid elley jeh’n ard-valley.

⁹ Myr shen daase David ny s’troshey as ny s’troshey: son va’n Chiarn y cheshaght-chaggee mârish.

¹⁰ Ad shoh myrgeddin ard-leeideilee ny deiney toshee, v’ec David, hass dy dunnal liorish ayns e reeriaght, lesh ooilley Israel, dy yannoo eh ny ree, cordail rish goo’n Chiarn, mychione Israel.

¹¹ As shoh earroo ny deiney toshee, v’ec David; Jashobeam ny Hachmonite, yn ard-chaptan: hrog eh shleiy noi three cheead, stroie eh ec un cheayrt.

¹² As ny lurg-syn, va Eleazar, mac Dodo, yn Ahohite, va fer jeh ny three treanee.

¹³ V’eshyn marish David ec Pas-dammim, as ayns shen va ny Philistinee er nyn jaglym cooidjagh gys caggey, raad va peesh dy ghrunt fo oarn; as ren y pobble chea roish ny Philistinee.

¹⁴ As hass ad, mygeayrt y ghrunt shen, as haue ad eh, as varr ad ny Philistinee, as ren y Chiarn ad y hauail liorish livrey cronnal.

¹⁵ Nish, hie three jeh ny jeih captanyn as feed sheese gys y charrick raad va David, ayns ooig Adullam, as ghow sheshaght-caggee ny Philistinee yn magher ayns coan Rephaim.

¹⁶ As va David eisht ayns y charrick, as va garrison ny Philistinee y traa shen ec Beth-lehem.

¹⁷ As haink mian er David, as dooyrt eh, Oh, dy jinnagh fer ennagh jough dou, jeh ushtey chibbyr Veth-lehem, ta liorish y yiat.

¹⁸ As vrish y three trooid sheshaght-caggee ny Philistinee, as hayrn ad ushtey ass chibbyr Veth-lehem, va liorish y yiat; as hug ad lhieu eh gys David: agh dob David giu jeh, agh gheayrt eh magh eh myr oural gys y Chiarn,

¹⁹ As dooyrt eh, Ny lhig eh Jee dy jinnin’s lheid y red: jean-yms giu fuill ny deiney shoh, t’er choyrt nyn mioys ayns gaue? son lesh gaue nyn mioys hug ad lhieu eh: Shen-y-fa cha jinnagh eh giu jeh. Ny reddyn shoh ren ny three s’treanee shoh.

²⁰ As Abishai braar Yoab va’n ard-er jeh’n three: son hrog eh seose e shleiy noi three cheead, as varr eh ad, as echeysyn va’n ennym s’ooasle jeh’n three.

²¹ V’eh ny s’onnoroil na’n jees; son v’eh ny chaptan orroo: ny-yeih cha daink eh seose gys y chied three.

²² Benaiah mac Jehoiada, mac dy ghooinney mooar caggee ayns Kabzeel va dy mennick er choyrt prowal jeh e ghunnallys: varr eh daa ghooinney myr lionyn ec Moab: hie eh sheese myrgeddin as varr eh lion ayns ooig, er laa sniaghtee.

²³ As varr eh Egyptian, dooinney feer thollee, queig cubityn er yrjid; as ayns laue yn Egyptian va shleiy myr garmin fidderagh; as hie eh sheese noi lesh lorg, as ghlack eh yn shleiy ass laue yn Egyptian, as varr eh eh lesh y shleiy echey hene.

²⁴ Ny reddyn shoh ren Benaiah, mac Jehoiada, as va goo echey mastey ny three treanee.

²⁵ Cur-my-ner, v’eh onnoroil mastey ny jeih as feed, agh cha daink eh seose gys y chied three: as ren David soiaghey eh harrish e ghard hene.

²⁶ Ny deiney dunnal elley jeh ny sheshaghtyn-caggee va, Asahel, braar Yoab, Elhanan mac Dodo jeh Beth-lehem,

²⁷ Shammoth yn Harorite, Helez yn Pelonite,

²⁸ Ira, mac Ikkesh yn Tekoite, Abiezer yn Antothite,

²⁹ Sibbecai yn Hushathite, Ilai yn Ahohite,

³⁰ Maharai yn Netophathite, Heled, mac Baana yn Netophathite,

³¹ Ithai, mac Ribai jeh Gibeah, va bentyn gys cloan Venjamin, Benaiah yn Pirathonite,

³² Hurai veih strooanyn Gaash, Abiel yn Arbathite.

³³ Azmaveth yn Baharumite, Eliahba yn Shaalbonite,

³⁴ Mec Hashem yn Gizonite, Jonathan, mac Shage yn Hararite,

³⁵ Ahiam, mac Sacar yn Hararite, Eliphal mac Ur,

³⁶ Hepher yn Mecherathite, Ahijah yn Pelonite,

³⁷ Hezro yn Carmelite, Naarai mac Ezbai,

³⁸ Joel braar Nathan, Mibhar mac Haggeri,

³⁹ Zelek yn Ammonite, Naharai yn Berothite, armyder Yoab mac Zeruiah,

⁴⁰ Ira yn Ithrite, Gareb yn Ithrite,

⁴¹ Uriah yn Hittite, Zabad mac Ahlai,

⁴² Adina, mac Shiza yn Reubenite, captan ny Reubeniteyn, as jeih as feed mârish,

⁴³ Hanan mac Maachah, as Joshaphat yn Mithnite,

⁴⁴ Uzzia yn Ashterathite, Shama, as Jehiel mec Hothan yn Aroerite,

⁴⁵ Jediael mac Shimri, as Joha e vraar, yn Tizite,

⁴⁶ Eliel yn Mahavite, as Jeribai, as Joshaviah, mec Elnaam, as Ithmah yn Moabite,

⁴⁷ Eliel, as Obed, as Jasiel yn Mesobaite.