प्रेरितां दे कम्म 14 - भटियाली नोआ नियम

इकुनियुम च पौलुस कने बरनबास

¹ इकुनियुम शेहर च ऐसा होया की पौलुस कने बरनबास यहूदी जंज घर च सोगी-सोगी गे, कने ऐसियां प्रभावशाली गल्लां कितियां की, यहूदियाँ कने होर जातियां दोंना चे मतयां यीशु पर भरोसा किता।

² पर भरोसा नी करणे बाले यहूदियां होरनी जातियां दे मन मसीह भाईयां दे खिलाफ च भड़काए, कने उना दे मना च इना दे खिलाफ जहर भरी दिता।

³ कने पौलुस कने बरनबास मते रोजां दीकर ओथु रे, कने प्रभु यीशु दे भरोसे पर हिम्मता ला गल्लां करदे रे: कने प्रभु यीशुऐ उना जो अदभुत चिन्न चमत्कार करणे दी शक्ति दिती, ऐसा करी के यीशुऐ ऐ साबित किता की जिस अनुग्रह दे बारे च सै प्रचार करा दे न सै सच्चा है।

⁴ पर शेहरे दे लोकां च फुट पेई गियो थी, इसला कितणे ही तां यहूदियाँ पासे, कने कितणे ही प्रेरितां दे पासे होई गे।

⁵ तालू होर जातियां कने यहूदी लोकां अपणे सरदारां सोगी मिली करी उना पर हमला कने पथर मारणे फेसला किता।

⁶ जालू पौलस कने बरनबास जो इसा गल्ला दे बारे च पता लग्गी गिया, कने सै लुकाउनिया प्रदेशे दे लुस्त्रा कने दिरबे शेहरां च, कने अखे बखे दे इलाके च नठी गे।

⁷ पौलुस कने बरनबासे ओथु पुज्जी करी लोकां जो शुभसमाचार सुणाया।

लुस्त्रा च इक लंगड़े जो खरा करणा

⁸ लुस्त्रा शेहर च इक माणु बैठया था, उदे पैर कमजोर थे। सै जन्मे ला ही लगड़ा था, कने कदी नी चलया था।

⁹ सै पौलुसे जो गल्लां करदे सुंणादा था कने पौलुसे दिखया की उनी भरोसा करी लिया है कने सै खरा होई सकदा है।

¹⁰ कने जोरे ला बोलया, “अपणे पैरां भार सीधा खड़ा हो।” तालू सै उछली करी चलणा फिरणा लगी पिया।

¹¹ लोकां पौलुस दा ऐ कम्म दिखीकरी लुकाउनिया बोलिया च जोरे ने बोलया, “देवता माणुऐ दे रुपे च साड़े बाल आया है।”

¹² कने उना बरनबास जो यूनानी देवता ज्यूस दा ना दिता कने पौलुस जो हिर्मेस दा ना दिता, क्योंकि पौलुस मुख्य संदेश देंणे बाला था।

¹³ कने ज्यूसे दे उस मंदरे दा पुजारी जड़ा उना दे शेहरे सामणे था, दांद कने फुलां दे हार फाटके पर लेई आया क्योंकि सै लोकां सोगी बलि चढ़ाणा चांदा था।

¹⁴ पर बरनबास कने पौलुस प्रेरितां जालू सुणाया, तां सै बड़े परेशान होऐ कने अपणे कपड़े फाड़ी दिते, कने भिड़ा च चली गे, कने पुकारी करी बोलणा लग्गे,

¹⁵ “हे लोको, तुसां क्या करदे न? असां भी तुहाड़े सांई दुखे सुख भोगणे बाले माणु न, कने तुहांजो शुभसमाचार सुणादे न, ताकि तुसां इना बेकार दियां चीजां ला लग होईकरी जिंदे परमेश्वरे पासे आई जा, जिनी स्वर्ग कने धरती कने समुंद्रे कने जड़ा कुछ उना च है बणाया है।

¹⁶ उनी होए युगां च सारियां जातियां जो अपणे-अपणे रस्ते च चलणा दिता।

¹⁷ सै हमेशा अपणे होणे दा सबूत उना खरियां चीजां ला दिन्दा है जड़ा सै करदा है, कने अम्बरे ला बरखा कने फलां बाली रित देईकरी तुहाड़े तांई खांणा कने तुहाड़े मना जो खुशिया ला भरदा रिया।”

¹⁸ ऐ बोली करी भी उना लोकां जो बड़ी मुशकिला ला रोकया की उना तांई बलिदान मत करा।

¹⁹ पर कितणे ही यहूदियाँ अन्ताकिया कने इकुनियुम शेहरां ला आई करी लोकां जो अपणे पासे करी लिया, कने पौलुसे जो पथरा ने मारया कने उसयो मरया समझीकरी घसीटी करी शेहरे बाहर लेई गे।

²⁰ पर जालू चेले उदे चारो पासे आई खड़ोते, तां सै उठी करी शेहरे जो बापस मुड़ी गिया कने दुऐ रोजे बरनबासे सोगी दिरबे शेहरे जो चली गिया।

सीरिया दे अन्ताकिया शेहरे च मुड़ी करी ओणा

²¹ पौलुस कने बरनबास दिरबे शेहरे दे लोकां जो शुभसमाचार सुणाई करी कने मते चेले बणाई करी। तालू सै लुस्त्रा शेहरे जो बापस चली गे। कने फिरी ओथु ला इकुनियुम शेहरे जो गे, कने फिरी सै पिसिदिया प्रदेश दे अन्ताकिया शेहरे जो गे।

²² कने हर शेहरे च चेलयां दे मना जो मजबूत करदे रे कने ऐ शिक्षा दिन्दे थे, की भरोसे च बणी रिया, कने ऐ बोलदे थे, “सांझो मते दुख झेली करी परमेश्वरे दे राज्य च दाखल होंणा पोंणा।”

²³ कने उना हर इक कलीसिया च उना तांई अगुवे बणाऐ, कने प्राथना कने बरत करिरी उना जो प्रभु जो सोंपया जिदे पर उना भरोसा कितया था।

²⁴ कने पिसिदिया प्रदेश ला होंदे होए सै पंफूलिया जिल्ले च जाई पुज्जे;

²⁵ कने उना पंफुलिया जिल्ले दे पिरागा शेहरे च परमेश्वरे दे बचने दा प्रचार किता कने अत्तलिया शेहरे जो आई गे।

²⁶ कने अत्तलिया शेहरे ला जहाजे पर अन्ताकिया शेहर जो मुड़ी आये, जिथू ला उना जो परमेश्वर दे अनुग्रह च सौंपीकरी उस कम्मे तांई भेजया था जिसयो उना जो पूरा किता।

²⁷ अन्ताकिया शेहरे च पुज्जी करी उना कलीसिया गठेरी कने दसया, की परमेश्वरे साड़े सोगी होईकरी कदे बड्डे-बड्डे कम्म किते कने कियां परमेश्वरे होर जातियां जो यीशु मसीह पर भरोसा करणे दे काबिल बणाया।

²⁸ ओथु पौलुस कने बरनबास चेलयां सोगी मते रोज रे।