تیتۆس 3 - ئنجیلا پیرۆز

رەفتار و رەوشتێ باوەرداران

¹ بیرا وان بینە كو ملكەچی سەروەر و دەستهەلاتداران بن، گوهداریا وان بكەن و بۆ هەر كارەكێ باش د ئامادە بن.

² ب خرابی بەحسێ كەسێ نەكەن، د شەڕفرۆش نەبن، لێ د دلنەرم بن، ب رێزگرتن سەرەدەریێ ل گەل هەمی خەلكی بكەن،

³ چنكو ئەم ب خۆ ژی ل دەمەكی د كۆرەفام، نەگوهدار و سەردابری بووین، بەنیێن حەز و ئارەزوویێن جۆراوجۆر بووین، د كین و زكڕەشیێ دا دژیاین، جهێ كەربێ بووین، هەر ئێكی كەرب ژ یێ دی ڤەدبوو.

⁴ لێ دەمێ دلنازكی و چاكیا قورتالكەرێ مە خودێ دیار بووین،

⁵ وی ئەم قورتال كرین. نە ژ بەر كارێن راستداریێ یێن مە كرین، لێ وی ئەڤ چەندە ل دویڤ دلۆڤانیا خۆ كر، ب شویشتنا ژدایكبوونا دوویێ و نویكرنێ ب گیانێ پیرۆز،

⁶ ئەو گیان یێ خودێ ب رێكا قورتالكەرێ مە عیسایێ مەسیح، ب زێدەیی ب سەر مە دا رشتی،

⁷ دا ب كەرەما وی، راستدار بهێینە هژمارتن و ببینە میراتگر ل هیڤیا ژیانا هەروهەر.

⁸ ئەڤ گۆتنە جهێ پشتڕاستیێیە. من دڤێت تۆ ل سەر ڤان تشتان یێ رژد بی، دا ئەوێن باوەری ب خودێ ئینای پویتەی ب كرنا كارێن باش بدەن. ئەو تشت د باش و مفادارن بۆ مرۆڤان.

⁹ لێ خۆ ژ گەنگەشەیێن بێئاقلانە، دانوستاندن ل دۆر نەژادنامەیان، هەڤڕكی و شەڕەدەڤێن ل سەر دەستووری بدە پاش، چنكو ئەو د بێمفا و ژ قەستانە.

¹⁰ ئەوێ دووبەرەكیێ دكەت، جارەكێ و دوو جاران ئاگەهدار بكە، پشتی هنگی خۆ ژێ دویر بئێخە.

¹¹ تۆ دزانی كو ئێكێ وەسا یێ ڤاڕێ بووی و گونەهكارە، وی ب خۆ خۆ گونەهبار كریە.

گۆتنێن دویماهیێ و سڵاڤ

¹² دەمێ ئەز ئەرتیماسی یان تیخیكۆسی دهنێرمە نك تە، بزاڤێ بكە بهێیە نك من ل نیكۆپۆلیسێ، چنكو من بڕیارا دای زڤستانێ ل وێرێ دەرباز كەم.

¹³ بزاڤێ بكە هاریكاریا زیناسێ پارێزەر و ئەپولۆسی بۆ گەشتا وان بكەی، كو بڕێڤە هەوجەیی تشتەكی نەبن.

¹⁴ پێدڤیە خەلكێ مە یێ باوەردار ژی فێر ببن كو پویتەی ب كریارێن باش بدەن، داكو پێدڤیێن فەر بۆ كەسێن دی دابین بكەن، هۆسا ئەو د بێبەرهەم نابن.

¹⁵ هەمی ئەوێن ل گەل من سڵاڤان ل تە دكەن. سڵاڤان ل وان بكە یێن د باوەریێ دا حەز ژ مە دكەن. كەرەم ل سەر هەوە هەمیان بیت.