رۆما 16 - ئنجیلا پیرۆز

سڵاڤێن تایبەت

¹ ئەز خویشكا مە فیبیێ بۆ هەوە پەسەند دكەم، ئەوا كو خزمەتكارە ل جڤاكا باوەرداران ل كەنخریایێ.

² ب ناڤێ خودانی وێ ب شێوەیەكێ وەسا قەبیل بكەن كو ئەو شێوە بۆ پیرۆزكریان یێ گونجای بیت و د هەر تشتەكی دا وێ پێدڤی ب هەوە هەبیت، هاریكاریا وێ بكەن، چنكو هاریكاری بۆ گەلەك كەسان و بۆ من ب خۆ ژی كریە.

³ سڵاڤان ل پریسكیلایێ و ئەكیلای بكەن، كو د خزمەتا مەسیح عیسای دا هەڤكارێن منن.

⁴ ئەوان ژ پێخەمەت ژیانا من سەرێ خۆ دانا بەر مرنێ. نە ب تنێ ئەز، لێ هەمی جڤاكێن باوەردارێن نەجوهی ژی، سوپاسدارێن وانین.

⁵ سڵاڤان ل وێ جڤاكا باوەرداران ژی بكەن، ئەوا ل مالا وان كۆم دبیت. سڵاڤان ل خۆشتڤیێ من ئەپاینەتۆسی بكەن، كو ئەو كەسێ ئێكێیە ل هەرێما ئاسیایێ باوەری ب مەسیحی ئینای.

⁶ سڵاڤان ل مەریەمێ بكەن، ئەوا ژ بۆ هەوە خۆ گەلەك وەستاندی.

⁷ سڵاڤان ل ئەندرونیكۆسی و ل یونیاسێ بكەن، كو مرۆڤێن منن و هەڤالێن من یێن زیندانێ بوون، ئەو د ناڤ هنارتیان دا د ناڤدارن و وان بەری من باوەری ب مەسیحی ئینایە.

⁸ سڵاڤان ل ئەمپلیاتۆسی بكەن، كو ژ بەر خودانی خۆشتڤیێ منە.

⁹ سڵاڤان ل ئوربانۆسی بكەن، هەڤكارێ مە د خزمەتا مەسیحی دا، هەروەسا ل خۆشتڤیێ من ستاخیسی ژی.

¹⁰ سڵاڤان ل ئەپەلیسی بكەن، ئەوێ باوەریا خۆ ب مەسیحی سەلماندی. سڵاڤان ل خەلكێ مالا ئەریستوپولۆسی بكەن.

¹¹ سڵاڤان ل مرۆڤێ من هیرودیونی بكەن. سڵاڤان ل خەلكێ مالا ناركیسۆسی بكەن، ئەوێن باوەری ب خودانی هەی.

¹² سڵاڤان ل تریفانایێ و تریفۆسایێ بكەن، ئەوێن خۆ د خزمەتا خودانی دا دوەستینن. سڵاڤان ل پەرسیسا خۆشتڤی بكەن، ئەوا گەلەك خۆ د خزمەتا خودانی دا وەستاندی.

¹³ سڵاڤان ل هەلبژارتیێ خودانی روفۆسی بكەن، هەروەسا دایكا وی ژی كو بۆ من وەكو دایكەكێیە.

¹⁴ سڵاڤان ل ئەسینكریتۆس، فلێگون، هێرمیس، پەتروباس، هێرماس و خویشك و برایێن ل گەل وان بكەن.

¹⁵ سڵاڤان ل فیلولوگۆس، یولیا، نیریۆس و خویشكا وی، ل ئۆلومپاس و هەمی پیرۆزكریێن ل گەل وان بكەن.

¹⁶ ب ماچەكا پیرۆز ژ لایێ من ڤە سڵاڤان ل ئێكودوو بكەن. هەمی جڤاكێن باوەرداران كو مەسیح خودانێ وانە سڵاڤان ل هەوە دكەن.

شیرەتێن دویماهیێ و خاترخواستن

¹⁷ ئەڤجا، گەلی خویشك و برایان، ئەز هیڤی ژ هەوە دكەم كو هوین هشیاری وان مرۆڤان بن، یێن بەروڤاژی وێ فێركرنا هەوە وەرگرتی، ناكۆكی و هەلنگفتنێ دروست دكەن. خۆ ژ وان دویر بئێخن.

¹⁸ چنكو كەسێن هۆسا، خزمەتێ بۆ خودانێ مە مەسیحی ناكەن، لێ بۆ زكێ خۆ دكەن. ب خۆشخۆشك و سالویسیێ دلێ كەسێن سادە دخاپینن.

¹⁹ گوهداریا هەوە گەهشتە گوهێن هەمیان، لەوما ئەز ب هەوە دلخۆشم. لێ من دڤێت هوین ل سەر باشیێ د هشیار بن و ل سەر خرابیێ د بێگونە‍‌ھ بن.

²⁰ خودایێ ئاشتیێ د دەمەكێ نێزیك دا دێ ئبلیسی د بن پێیێن هەوە ڤە هەڕشینیت. كەرەما خودانێ مە عیسای ل سەر هەوە بیت.

²¹ هەڤكارێ من تیمۆتاوس و مرۆڤێن من لوكیۆس، یاسون و سوسیپاترۆس سڵاڤان ل هەوە دكەن.

²² ئەز تەرتیۆس، یێ ئەڤ نامەیە نڤیسی، وەكو خزمەتكارەكێ خودانی سڵاڤان ل هەوە دكەم.

²³ گایۆسێ مێڤاندارێ من و هەمی جڤاكا باوەرداران سڵاڤان ل هەوە دكەت. خەزنەدارێ باژێڕی ئەراستۆس و برایێ مە كوارتۆس سڵاڤان ل هەوە دكەن.

²⁴ كەرەما خودانێ مە عیسایێ مەسیح ل سەر هەوە هەمیان بیت. ئامین.

پەسنكرن بۆ خودێ

²⁵ ئەڤجا مەزناهی بۆ وی بیت، یێ دشێت هەوە د باوەریێ دا موكم كەت، ل دویڤ وێ مزگینیا كو ئەز ژ بۆ عیسایێ مەسیح رادگەهینم، ل دویڤ ئاشكراكرنا وێ نهێنیا كو هەر ژ كەڤن دا یا ڤەشارتی بوو،

²⁶ لێ نوكە ل دویڤ فەرمانا خودایێ هەروهەر هەی، ب رێكا نڤیسارێن پێغەمبەران، ئاشكرا بوو، دا هەمی مللەت باوەریێ پێ بینن و گوهداریا وی بكەن،

²⁷ بۆ خودایێ ئێكانە كو ب تنێ ئەو یێ ئاقلمەندە، بۆ وی ب رێكا عیسایێ مەسیح، هەروهەر مەزناهی بیت! ئامین.