رۆما 14 - ئنجیلا پیرۆز

ئێكودوو گونەهبار نەكەن

¹ ئەوێ د باوەریێ دا لاواز، قەبیل بكەن، لێ نە ب مەبەستا دادكرنا بۆچوونێن ئێكودوو.

² ئێكی باوەریا هەی كو هەمی تشتان بخۆت، لێ یێ لاواز ب تنێ كەسكاتیان دخۆت.

³ بلا یێ دخۆت، سڤكاتیێ ب یێ نەخۆت نەكەت، یێ نەخۆت ژی بلا یێ دخۆت گونەهبار نەكەت، چنكو خودێ ئەو یێ قەبیل كری.

⁴ تۆ كی دا خزمەتكارێ ئێكێ دی داد بكەی؟ هەلسەنگاندن بۆ خودانێ ویە كا ئەو یێ سەركەفتیە یان سەرنەكەفتیە. ئەو دێ سەركەڤیت ژی، چنكو خودان دشێت وی سەربئێخیت.

⁵ كەسەك هزر دكەت رۆژەك ژ رۆژەكا دی پیرۆزترە، ئێكێ دی هزر دكەت هەمی رۆژ وەكو ئێكن. بلا هەر ئێك خۆ ژ بۆچوونا خۆ پشتڕاست بكەت.

⁶ ئەوێ گرنگیێ ب رۆژێ ددەت، بۆ خودانی ئەو گرنگیێ پێ ددەت. ئەوێ دخۆت ژی، بۆ خودانی ئەو دخۆت، چنكو ئەو سوپاسیا خودێ دكەت، ئەوێ نەخۆت ژی، بۆ خودانی ئەو ناخۆت و سوپاسیا خودێ دكەت.

⁷ كەسەك ژ مە بۆ خۆ ناژیت، كەسەك ژی بۆ خۆ نامریت.

⁸ ئەگەر ئەم بژین، بۆ خودانی دژین و ئەگەر ئەم بمرین، بۆ خودانی دمرین. ئەڤجا ئەم بژین یان ئەم بمرین، ئەم یێن خودانینە.

⁹ چنكو مەسیح بۆ ڤێ مەبەستێ مر و زیندی بووڤە، داكو سەروەریێ ل سەر مریان و زیندیان ژی بكەت.

¹⁰ ئەڤجا تۆ بۆچی برایێ خۆ داد دكەی؟ یان تۆ بۆچی سڤكاتیێ ب برایێ خۆ دكەی؟ ئەم هەمی دێ ل بەر كورسیكا دادوەریێ یا خودێ راوەستین.

¹¹ چنكو یا هاتیە نڤیسین: «خودان دبێژیت: ئەز ب هەبوونا خۆ كەم، بۆ من هەمی چۆك دێ چەمیێن و هەمی زمان دێ دانپێدانێ كەن كو ئەز خودێمە.»

¹² ئەڤجا هەر ئێك ژ مە دێ ل سەر خۆ بەرسڤدانێ ل بەرامبەری خودێ دەت.

كەسێ نەهەلنگێڤن

¹³ لەوما ئێدی ئەم ئێكودوو داد نەكەین، لێ یا باشتر ئەوە هوین بڕیارێ بدەن كو ئاستەنگ و بەرپێكان بۆ برایێ خۆ نەدانن.

¹⁴ ئەز دزانم و پشتا خۆ ب خودان عیسای راست دكەم، كو چ خوارن ب خۆ د حەرام نینن، لێ بۆ وی كەسی د حەرامن، ئەوێ هزر دكەت ئەو خوارن د حەرامن.

¹⁵ ئەڤجا ئەگەر برایێ تە ژ بەر تشتێ تۆ دخۆی دلتەنگ ببیت، ئێدی تۆ ل دویڤ حەزژێكرنێ رەفتارێ ناكەی. ب خوارنا تۆ دخۆی وی نەهەڕفینە یێ كو مەسیح ژ پێخەمەتی وی مری.

¹⁶ ئەڤجا نەهێلن تشتەك كو ب دیتنا هەوە یێ باشە، ب خرابی بەحسێ وی بهێتە كرن.

¹⁷ چنكو بابەتێ پاشایەتیا خودێ نە خوارن و ڤەخوارنن، لێ راستداری، ئاشتی و دلخۆشینە ب گیانێ پیرۆز.

¹⁸ ئەوێ هۆسا خزمەتا مەسیحی بكەت، جهێ رازیبوونا خودێیە و ژ لایێ خەلكی ڤە یێ پەسەندكریە.

¹⁹ ئەڤجا دا بزاڤێ بۆ وان تشتان بكەین یێن ئاشتی و ئاڤاكرنا هەڤپشك ژێ چێدبن.

²⁰ كارێ خودێ ژ بۆ خوارنێ نەهەڕفینە. هەمی تشت د حەلالن، لێ یێ ب خوارنا وان تشتان دبیتە ئەگەرێ هەلنگفتنا هندەكێن دی، ئەو خرابیێ دكەت.

²¹ یا باش ئەوە تۆ گۆشتی نەخۆی، شەرابێ ڤەنەخۆی و تشتەكی نەكەی كو برایێ تە پێ بهەلنگڤیت.

²² بیر و باوەریێن تە چ بن، بلا د ناڤبەرا تە و خودێ دا بمینن. خوزیكێن وی یێ خۆ گونەهبار نەكەت ب رێكا وی تشتی یێ ئەو دبینیت یێ باشە.

²³ لێ یێ گۆمان هەبیت ل سەر وی تشتێ دخۆت، ئەگەر خوار ئەو گونەهبار دبیت، چنكو ئەو ژ باوەریێ وی تشتی ناكەت. هەر تشتێ نە ژ باوەریێ بیت، ئەو گونەهە.