رۆما 13 - ئنجیلا پیرۆز

ئەركێن مە ل بەرامبەری دەستهەلاتێن ڤێ جیهانێ

¹ بلا هەر كەسەك ملكەچی دەستهەلاتدارێن حكومەتێ بیت، چنكو چ دەستهەلاتدار نینن ژ لایێ خودێ ڤە نەبن، ئەڤجا ئەوێن هەین ژی ژ لایێ خودێ ڤە هاتینە دانان.

² لەوما یێ بەرهنگاریا دەستهەلاتداران بكەت، ئەو بەرهنگاریا دانانا خودێ دكەت و ئەوێن بەرهنگاریێ دكەن، دێ دادكرنێ ب سەرێ خۆ دا ئینن.

³ چنكو حوكمڕان نە ژ بۆ كارێ باش، لێ ژ بۆ كارێ خراب جهێ ترسێنە. ما تە دڤێت ژ دەستهەلاتداری نەترسی؟ تشتێ باش بكە، دێ ژ لایێ وێ ڤە هێیە پەسنكرن.

⁴ چنكو ئەو خزمەتكارێ خودێیە ژ بۆ باشیا تە. لێ ئەگەر تۆ خرابیێ بكەی، بترسە، ژ بەر كو ئەو ژ قەستا شیری هەلناگریت. ئەو خزمەتكارێ خودێیە، دا تۆڕەبوونێ ب سەرێ خرابكاران دا بینیت.

⁵ لەوما پێدڤیە ملكەچ بن، نە ب تنێ ژ بەر تۆڕەبوونێ، لێ ژ بەر وژدانا خۆ ژی.

⁶ ژ بەر ڤێ چەندێ هوین خویكێ ژی ددەن، چنكو ئەو خزمەتكارێن خودێنە و بەردەوام ڤی كاری دكەن.

⁷ مافێ هەمی كەسان بدەنێ: ئەوێ مافێ خویكێ هەی، خویكێ بدەنێ. ئەوێ مافێ باجێ هەی، باجێ بدەنێ. ئەوێ مافێ ترسێ هەی، ترسێ بدەنێ و ئەوێ مافێ رێزگرتنێ هەی، رێزێ لێ بگرن.

حەزژێكرنا ئێكودوو یا برایانە

⁸ ژبلی كو هوین حەز ژ ئێكودوو بكەن، ب چ تشتی قەردارێن كەسێ نەبن، چنكو یێ حەز ژ مرۆڤێن دی بكەت، ئەوی دەستوور ب ج‍‌ھ ئینا.

⁹ ئەو فەرمانێن دبێژن: «دەهمەنپیسیێ نەكە»، «كوشتنێ نەكە»، «دزیێ نەكە»، «دلچوونا خراب نەكە» و هەر فەرمانەكا دی هەبیت، د ناڤ ڤێ گۆتنێ دا كۆمڤە دبن: «حەز ژ نێزیكێ خۆ بكە، وەك چەوا تۆ حەز ژ خۆ دكەی.»

¹⁰ حەزژێكرن خرابیێ ل یێ نێزیك ناكەت، لەوما حەزژێكرن بجهئینانا دەستووریە.

هاندان بۆ رەفتارێن باش

¹¹ ڤێ چەندێ بكەن، چنكو هوین دزانن چ دەمە. ئەڤە دەمژمێر هات كو هوین ژ خەوێ هشیار ببن، ژ بەر كو قورتالبوونا مە، نوكە نێزیكترە ژ وی دەمێ مە باوەری ئینای.

¹² گەلەك ژ شەڤێ چوویە و رۆژ نێزیك بوویە، ئەڤجا دا كارێن تاریاتیێ ژ بەر خۆ بكەین و چەكێن رۆناهیێ بكەینە بەر خۆ.

¹³ بلا رەفتارێن مە د بەڕێز بن، هەروەكو رۆژ بیت: نە ب ئاهەنگێن بێتۆرەیێ و سەرخۆشیێ، نە ب دەهمەنپیسیێ و بێدەلنگیێ، نە ب هەڤڕكیێ و چاڤپێنەڕابوونێ.

¹⁴ لێ خۆ ب خودان عیسایێ مەسیح راپێچن و چ هزرێ بۆ تێركرنا داخوازێن سرۆشتێ خۆ یێ لەشكانی نەكەن.