فیلیپی 4 - ئنجیلا پیرۆز

¹ ئەڤجا گەلی خویشك و برایێن من یێن خۆشتڤی، ئەوێن ئەز بیریا هەوە دكەم و هوین شادی و تانجا منن، خۆشتڤیێن من ب ڤی شێوەی د ئێكبوونا ل گەل خودانی دا قاییم بمینن.

شیرەتێن دویماهیێ

² ئەز هیڤی ژ ئەیۆدیایێ و ژ سنتیخایێ دكەم، كو د ئێكبوونا ل گەل خودانی دا هەڤهزر ببن.

³ بەلێ، ئەز داخوازێ ژ تە ژی دكەم، هەی هەڤكارێ من یێ دلسۆز، هاریكاریا وان ژنان بكە، د خەباتا مزگینیێ دا ئەوان ل گەل من بزاڤ كریە، هەروەسا ل گەل كلیمەنتۆسی و هەڤكارێن من یێن دی ژی، ئەوێن ناڤێن وان د پەرتووكا ژیانێ دا.

⁴ هەرگاڤ ب خودانی دلخۆش ببن. دیسان ئەز دبێژمە هەوە: دلخۆش ببن!

⁵ بلا سەرنەرمیا هەوە ل نك هەمی مرۆڤان یا بەرنیاس بیت. خودان یێ نێزیكە.

⁶ ژ بەر چ تشتی نیگەران نەبن، لێ دەربارەی هەمی تشتان ب نڤێژ و هیڤیخوازیێ ل گەل سوپاسیكرنێ، داخوازێن خۆ ئاراستەی خودێ بكەن.

⁷ هۆسا ئاشتیا خودێ ژی، ئەوا د سەر هەر تێگەهشتنەكێ را، دێ دلێ هەوە و زێهنێ هەوە د ئێكبوونا ل گەل مەسیح عیسای دا پارێزیت.

⁸ ل دویماهیێ گەلی خویشك و برایان، هەر تشتێ راستی، هەر تشتێ بڕێز، هەر تشتێ دادپەروەر، هەر تشتێ پاك، هەر تشتێ دلڤەكەر، هەر تشتێ ناڤودەنگەكێ باش هەی، چ ئەو تشت قەنجی بیت، یان ژی تشتەكێ هەژی پەسنێ بیت، هزرێ تێدا بكەن.

⁹ ئەو تشتێن هوین ژ من فێر بووین، هەوە ژ من وەرگرتین، ژ من بهیستین و د ژیانا من دا دیتین، بكەن و خودایێ ئاشتیێ دێ ل گەل هەوە بیت.

سوپاسیا پاولۆسی ژ بۆ هاریكاریێن فیلیپیان

¹⁰ ئەز ب خودانی گەلەك دلخۆش بووم، كو نوكە بۆ جارەكا دی خەمخۆریا هەوە بۆ من بشكڤیڤە. ب راستی هەوە هەر خەما من د خوار، لێ هەوە دەلیڤە نەبوو كو هاریكاریا من بكەن.

¹¹ ئەز ڤێ گۆتنێ نابێژم كو ئەز یێ پێدڤی بووم، چنكو ئەز یێ فێر بوویم د هەر رەوشەكا ئەز تێدا بم، یێ رازی بم.

¹² ئەز دزانم هەژاری چیە، هەروەسا دزانم بەرفرەهی ژی چیە. ئەز یێ ب سەر وێ نهێنیێ هەلبوویم، كو د هەمی رەوش و كاودانان دا، چ یێ تێر بم یان یێ برسی، یێ هەیی بم یان یێ نەدار، ئەز هەر یێ رازی بم.

¹³ ئەز دشێم هەمی تشتان بكەم، ب رێكا وی یێ من بهێز دئێخیت.

¹⁴ سەرەڕای هندێ هەوە باش كر، كو هوین د تەنگاڤیا من دا پشكدار بوون.

¹⁵ هوین ژی دزانن، گەلی فیلیپیان، كو د دەستپێكا دانا مزگینیێ دا، گاڤا ئەز ژ مەقدۆنیایێ دەركەفتیم، چ جڤاكێن باوەرداران ژ هەوە پێڤە، سەبارەت هاریكاریا دارایی، پشكداریا من نەكر.

¹⁶ دەمێ ئەز ل سالونیكی ژی، هەوە پتر ژ جارەكێ تشتێن من پێدڤی پێ هەی، بۆ من هنارتن.

¹⁷ نەكو چاڤێ من ل دیاریانە، لێ من دڤێت قازانج ل سەر سەرمایێ هەوە ل نك خودێ زێدە ببیت.

¹⁸ ئێدی من تێرا هەمی پێدڤیێن خۆ یێ هەی و زێدەتر ژی. ئەز كەفتمە د بەرفرەهیێ دا، پشتی من ئەو تشت وەرگرتین، یێن ئێپافرۆدیتۆسی بۆ من ژ نك هەوە ئیناین، كو پێشكێشیەكێ بێهنخۆش و قوربانەكێ قەبیلكری و جهێ رازیبوونا خودێیە.

¹⁹ خودایێ من ژی دێ ل دویڤ دەولەمەندیا خۆ یا مەزن، ب رێكا مەسیح عیسای، هەمی پێدڤیێن هەوە دابین كەت.

²⁰ هەتا هەتایێ مەزناهی بۆ بابێ مە خودێ بیت! ئامین.

سڵاڤێن دویماهیێ

²¹ سڵاڤان ل هەر پیرۆزكریەكێ مەسیح عیسای بكەن. ئەو برایێن ل گەل من، سڵاڤان ل هەوە دكەن.

²² هەمی پیرۆزكری، ب تایبەت ئەوێن ژ كۆچكا قەیسەری، سڵاڤان ل هەوە دكەن.

²³ كەرەما خودان عیسایێ مەسیح ل گەل گیانێ هەوە بیت.