فیلیپی 3 - ئنجیلا پیرۆز

¹ ل دویماهیێ گەلی خویشك و برایان، ب خودانی دلخۆش ببن. بۆ من بارگرانی نینە ئەز دووبارە ئەڤان تشتان بۆ هەوە بنڤیسم و بۆ هەوە ئێمناهیە.

بهاگرانیا نیاسینا مەسیحی

² هشیاری سەیان بن، هشیاری بەدكاران بن و هشیاری وان بن یێن لەشی دبڕن.

³ چنكو سونەتكریێن دروست ئەمین، یێن ب گیانێ خودێ پەرستنێ دكەین و شانازیێ ب مەسیح عیسای دبەین و پشتا خۆ ب لەشی گەرم ناكەین،

⁴ هەر چەندە من ئەگەر یا هەی كو پشتگەرمێ لەشی ژی بم. ئەگەر ئێكێ دی هزر بكەت كو وی ئەگەر یا هەی پشتگەرمێ لەشی بیت، من ژ وی پتر ئەگەر یا هەی:

⁵ ئەز ل رۆژا هەشتێ هاتیمە سونەتكرن، ئەز ژ گەلێ ئیسرائیل و ژ هۆزا بنیامینیمە، ئەز عیبرانی كوڕێ عیبرانیمە. سەبارەت دەستووری، فەریسی بووم.

⁶ سەبارەت دلگەرمیێ، تەپەسەركەرێ جڤاكا باوەردارێن مەسیح عیسای بووم. سەبارەت راستداریا د دەستووری دا، ئەز یێ بێكێماسی بووم.

⁷ لێ ئەو تشتێن ب چاڤێن من قازانج بوون، من ئەو ژ پێخەمەت مەسیحی ب زیان یێن دیتین.

⁸ هێشتا ژ وێ زێدەتر، ئەز هەمی تشتان ب زیان ددانم، ل هەمبەری بهاگرانیا بێ سنوور یا نیاسینا مەسیح عیسایێ خودانێ من، ئەوێ ژ پێخەمەت وی من هەمی تشت زیانكرین و ئەز وان تشتان وەكو گلێش دبینم، دا مەسیحی قازانج بكەم

⁹ و ل گەل وی ببمە ئێك و راستدار بهێمە دیتن، نە ب رێكا دەستووری، لێ ب رێكا باوەریێ ب مەسیحی، ل دویڤ وێ راستداریا خودێ ب رێكا باوەریێ ددەت.

¹⁰ من دڤێت مەسیحی بنیاسم و هێزا رابوونا وی ژ ناڤ مریان بزانم و پشكدارێ ئازارێن وی بم و وەكو وی لێ بهێم د مرنا وی دا،

¹¹ داكو ب هەر رێكەكا هەبیت ئەز بگەهمە رابوونا ژ ناڤ مریان.

بزاڤكرن بەرەڤ ئارمانجێ

¹² ئەز نابێژم كو ئەز گەهشتمە ئارمانجێ، یان كامل بووم، لێ ئەز بزاڤێ دكەم، دا وێ چەندێ ب دەست خۆ ڤە بینم، ئەوا ژ پێخەمەت وێ مەسیح عیسای ئەز ب دەست خۆ ڤە بریم.

¹³ گەلی خویشك و برایان، ئەز وەسا ناهژمێرم كو من ئارمانج ب دەست خۆ ڤە ئینا، لێ ئەز تشتەكێ ب تنێ دكەم: تشتێن چووی ژ بیر دكەم و خەباتێ بۆ تشتێن ل پێشیا خۆ دكەم.

¹⁴ ئەز بزاڤێ بۆ ئارمانجێ دكەم، دا خەلاتی قازانج بكەم، ئەوێ ب رێكا مەسیح عیسای، خودێ ئەز بۆ وی گازی كریمە سڵال.

¹⁵ ئەڤجا پێدڤیە ئەم هەمیێن پێگەهشتی هۆسا هزر بكەین و ئەگەر هەوە هزرەكا دی هەبیت، خودێ دێ وێ ژی بۆ هەوە ئاشكرا كەت.

¹⁶ ب تنێ، بلا ل دویڤ وی ئاستێ ئەم گەهشتینێ، بژین.

¹⁷ پێكڤە چاڤ ل من بكەن، گەلی خویشك و برایان، هەروەسا بەرێ خۆ بدەنە وان یێن ب ڤی شێوەی ل دویڤ نموونەیا مە دژین.

¹⁸ چنكو هەروەكو من گەلەك جاران بۆ هەوە گۆتی و نوكە ژی ب گری ڤە دبێژم، كو گەلەك كەس هەنە ب شێوازێ ژیانا خۆ دوژمنێن خاچا مەسیحینە.

¹⁹ دویماهیا ڤان كەسان وێرانبوونە، خودایێ وان زكێ وانە و شانازیێ ب تشتێن جهێ شەرمێ دبەن، هزرا وان ل سەر تشتێن ڤێ جیهانێیە.

²⁰ لێ ئەم هەڤوەڵاتیێن ئەسماناینە، كو ئەم د چاڤەڕێینە قورتالكەرەك ژ وێرێ بهێت، ئەو ژی خودان عیسایێ مەسیحە.

²¹ ب هێزا خۆ یا دشێت هەر تشتەكی بندەستی خۆ بكەت، ئەو دێ لەشێ مە یێ لاواز و مربار گوهۆڕیت و وەكو لەشێ خۆ یێ ب روومەت لێ كەت.