فلیمون 1 - ئنجیلا پیرۆز

سڵاڤ

¹ ژ من، پاولۆسێ زیندانكری ژ پێخەمەت مەسیح عیسای، ژ برایێ مە تیمۆتاوسی ژی، بۆ هەڤكارێ مە یێ خۆشتڤی فلیمونی،

² بۆ خویشكا مە ئاپفیایێ، بۆ ئارخیپۆسێ ل گەل مە سەرباز و بۆ جڤاكا باوەرداران یا ل مالا هەوە كۆم دبیت:

³ ژ بابێ مە خودێ و ژ خودان عیسایێ مەسیح، كەرەم و ئاشتی ل سەر هەوە بن.

سوپاسیكرنا پاولۆسی ژ بەر باوەری و حەزژێكرنا فلیمونی

⁴ ئەز هەردەم سوپاسیا خودایێ خۆ دكەم، دەمێ تە د نڤێژێن خۆ دا دئینمە بیرا خۆ،

⁵ چنكو ئەز حەزژێكرنا تە بۆ هەمی پیرۆزكریان و باوەریا تە ب خودان عیسای دبهیسم.

⁶ ئەز د نڤێژان دا داخواز دكەم كو پشكداریا تە د باوەریێ دا یا كاریگەر بیت، دا تۆ كویرتر د هەمی تشتێن باش بگەهی، یێن مە ژ پێخەمەت مەسیحی هەین.

⁷ ئەز ژ بەر حەزژێكرنا تە گەلەك دلخۆش بووم و هاتمە هاندان، چنكو دلێ پیرۆزكریان ب تە، هەی برا، گەش بوویە.

هیڤیكرنا پاولۆسی بۆ ئۆنیسیمۆسی

⁸ لەوما، هەر چەندە من ب مەسیحی هەمی بستەهیا هەی كو دەربارەی وی تشتێ پێدڤیە بكەی، فەرمانێ ل تە بكەم،

⁹ لێ بۆ من خۆشترە كو ئەز ب حەزژێكرنێ هیڤیێ ژ تە بكەم. ئەز، پاولۆسێ پیرەمێر و نوكە ژی یێ زیندانكری ژ پێخەمەت مەسیح عیسای،

¹⁰ دەربارەی كوڕێ خۆ ئۆنیسیمۆسی هیڤی ژ تە دكەم، ئەوێ ئەز د قەیدێ دا بۆ وی بوویمە باب.

¹¹ دەمەكی ئەو بۆ تە یێ بكێرنەهاتی بوو، لێ نوكە ئەو بۆ تە و بۆ من ژی یێ بكێرهاتیە.

¹² ئەز وی، ئانكو جەگەرا خۆ، بۆ تە دهنێرمەڤە.

¹³ من حەز دكر وی ل نك خۆ بهێلم، دا دەمێ ئەز ژ پێخەمەت مزگینیێ د قەیدێ دا، ل شوینا تە خزمەتا من بكەت،

¹⁴ لێ من نەڤیا ئەز بێی دلێ تە تشتەكی بكەم، دا ئەڤ چاكیا تە ژ نەچاری نەبیت، لێ ژ دل بیت.

¹⁵ بەلكو ژ بەر وێ چەندێ ئەو بۆ دەمەكێ كورت ژ تە جودا بوو، دا تۆ بۆ هەتا هەتایێ وی وەرگریەڤە،

¹⁶ ئێدی نەوەكو بەنی، لێ ژ بەنیەكی زێدەتر، وەكو برایەكێ خۆشتڤی، ب تایبەت بۆ من، ئەڤجا بۆ تە هێشتا پتر، كو ئەو د لەشی دا بەنیێ تەیە و د ئێكبوونا ل گەل خودانی دا برایە.

¹⁷ ئەڤجا ئەگەر تۆ من ب هەڤپشكێ خۆ ددانی، وی قەبیل بكە هەروەكو تۆ من قەبیل دكەی.

¹⁸ ئەگەر وی د تشتەكی دا زیان ل تە كربیت یان قەرەكێ تە ل سەر بیت، ل سەر من بنڤیسە.

¹⁹ ئەز پاولۆس، ڤێ ب دەستێ خۆ دنڤیسم: ئەز دێ وی قەری ل تە ڤەگەڕینم. من نەڤێت بێژمە تە كو تۆ ب ژیانا خۆ قەردارێ منی.

²⁰ بەلێ، برایێ من! بلا ل سەر خاترا خودانی ئەز مفایەكی ژ تە ببینم، من د ئێكبوونا ل گەل مەسیحی دا دلگەش بكە.

²¹ ئەز ژ گوهداریا تە یێ پشتڕاستم، لەوما من بۆ تە نڤیسی، دزانم كو تۆ دێ پتر ژ وێ كەی یا ئەز دبێژم.

²² ل گەل ڤێ چەندێ، ژۆرەكێ بۆ مێڤانكرنا من ئامادە بكە، چنكو ئەز هیڤیدارم ب نڤێژێن هەوە، بۆ هەوە بهێمە بەخشین.

سڵاڤ و خاترخواستن

²³ ئێپافراس، ئەوێ ژ پێخەمەت مەسیح عیسای ل گەل من د زیندانێ دا، سڵاڤان ل تە دكەت.

²⁴ هەڤكارێن من مەرقۆس، ئەرستارخۆس، دیماس و لوقا ژی سڵاڤان ل تە دكەن.

²⁵ كەرەما خودان عیسایێ مەسیح ل گەل گیانێ هەوە بیت.