عیبرانی 5 - ئنجیلا پیرۆز

¹ هەر سەرۆككاهنەك ژ ناڤ مرۆڤان دهێتە هەلبژارتن و دهێتە دانان كو ل شوینا مرۆڤان ب كاروبارێن خودێ راببیت، دا پێشكێشی و قوربانیێن گونەهان پێشكێش بكەت.

² ئەو دشێت ب نەرمی سەرەدەریێ ل گەل نەزان و ڤاڕێبوویان بكەت، چنكو ئەو ب خۆ ژی بندەستێ لاوازیێیە.

³ ژ بەر وێ چەندێ فەرە ل سەر وی، كا چەوا قوربانیێ پاقژبوونێ ژ گونەهێ ژ پێخەمەت خەلكی پێشكێش دكەت، وەسا ژ پێخەمەت خۆ ژی.

⁴ كەس ژی ڤێ شەرەفمەندیێ بۆ خۆ ناستینیت، ب تنێ ئەو كەس وەردگریت یێ خودێ گازی كریێ، وەكو هارونی.

⁵ هەروەسا مەسیحی ژی خۆ بۆ وێ پلەیا مەزناهیێ بلند نەكریە، كو ببیتە سەرۆككاهن، لێ وی بلند كریە یێ گۆتیێ: «تۆ كوڕێ منی، ئەڤرۆ من تۆ بووی.»

⁶ هەروەكو ل جهەكێ دی ژی دبێژیت: «تۆ هەتا هەتایێ كاهنی ژ جۆرێ مەلكیسادقی.»

⁷ مەسیحی د رۆژێن ژیانا خۆ یا لەشكانی دا، داخواز و هیڤی ب قێڕی و رۆندكان پێشكێشی وی كرن، یێ شیان هەین كو وی ژ مرنێ رزگار بكەت و ژ بەر خودێترسیا وی، داخوازا وی هاتە قەبیلكرن.

⁸ هەر چەندە ئەو كوڕێ خودێ بوو، لێ ب رێكا ئازارێن وی كێشاین، فێری گوهداریێ بوو.

⁹ دەمێ ب ڤێ رێكێ هاتیە كاملكرن، بۆ هەمی یێن گوهداریا وی دكەن بوو ژێدەرێ قورتالبوونا هەتا هەتایی

¹⁰ و ژ لایێ خودێ ڤە ب سەرۆككاهن ژ جۆرێ مەلكیسادقی هاتە بناڤكرن.

هشیاركرن ژ پاشگەزبوونێ

¹¹ ل دۆر ڤێ چەندێ، گەلەك ئاخفتن یا هەی مە دڤێت بێژین، لێ شڕۆڤەكرنا وێ یا گرانە، چنكو گوهێن هەوە یێن گران بووین.

¹² پێدڤی بوو هەتا نوكە هوین ببانە مامۆستا، لێ هوین د پێدڤینە كو ئێك دووبارە بنەمایێن دەستپێكی یێن پەیڤا خودێ نیشا هەوە بدەت. هوین ڤەگەڕیان هەوجەیی شیری ببن، نە خوارنەكا گران.

¹³ هەر كەسێ شیرخۆر بیت، ئەو د فێركرنا دەربارەی راستداریێ دا یێ نەشارەزایە، چنكو ئەو یێ ساڤایە.

¹⁴ لێ خوارنا گران بۆ وانە یێن پێگەهشتی، ئەوێن هەستێن وان ژ ئەگەرێ راهێنانێ ل سەر ژ ئێكڤاڤارتنا باشی و خرابیێ راهاتین.