عیبرانی 11 - ئنجیلا پیرۆز

شاهدێن باوەریێ

¹ باوەری پشتڕاستیە ژ وان تشتێن مرۆڤی هیڤی پێ هەی و بێگۆمانیە ژ وان تشتێن ناهێنە دیتن.

² ب باوەریێ بابكال ژ لایێ خودێ ڤە هاتنە پەسەندكرن.

³ ب باوەریێ ئەم تێدگەهین كو جیهان ب پەیڤا خودێ هاتیە ئافراندن، ئەڤجا تشتێن دهێنە دیتن ژ تشتێن نەهێنە دیتن چێبووینە.

⁴ ب باوەریێ هابیلی پێشكێشیەكێ باشتر ژ یێ قایینی پێشكێشی خودێ كر. هەر ب وێ باوەریێ شاهدەیی بۆ هاتە دان كو یێ راستدارە، دەمێ خودێ رازیبوونا خۆ ل سەر قوربانێن وی دیار كری. ب باوەریێ ئەو هێشتا دئاخڤیت، هەر چەندە یێ مری.

⁵ ب باوەریێ حەنۆخ بۆ ئەسمانی هاتە ڤەگوهاستن، دا مرنێ نەبینیت، ئێدی ئەو نەهاتە دیتن، چنكو خودێ ئەو ڤەگوهاست. بەری ڤەگوهاستنا وی شاهدەیی بۆ هاتە دان كو ئەوی خودێ رازی كر.

⁶ بێی باوەریێ ژی مەحالە مرۆڤ خودێ رازی بكەت، چنكو پێدڤیە ئەوێ خۆ نێزیكی خودێ بكەت، باوەری هەبیت كو خودێ یێ هەی و خەلاتی ددەتە وان یێن قەستا وی دكەن.

⁷ ب باوەریێ نوحی ژ ترسا خودێ گەمیەك ژ بۆ قورتالكرنا مالا خۆ چێكر، دەمێ دەربارەی رویدانێن هێشتا نەهاتینە دیتن هاتیە ئاگەهداركرن. ب وێ باوەریێ جیهان گونەهبار كر و بوو میراتگرێ راستداریا كو ب باوەریێ دهێت.

⁸ ب باوەریێ ئیبراهیمی گوهداری كر، دەمێ هاتیە گازیكرن كو دەركەڤیتە وی جهی یێ ل بەر بوو ب میرات وەرگریت، ئەو دەركەفت و نەدزانی بۆ كیڤە دچیت.

⁹ ب باوەریێ ئەو مشەختبوو ئەردێ سۆزپێدای، ئەو هەروەكو ل ئەردەكێ بیانی بیت د بن خیڤەتان ڤە ئاكنجی بوو، ل گەل ئیسحاقی و یەعقوبی، هەڤمیراتێن وی د هەمان سۆزێ دا.

¹⁰ چنكو ئەو چاڤەڕێی وی باژێڕی بوو یێ بنیاتەكێ قاییم هەی، كو ئەندازیار و ئاڤاكەرێ وی خودێیە.

¹¹ ب باوەریێ ئیبراهیمی هێز بۆ زاڕۆكئینانێ وەرگرت، هەر چەندە ئەو یێ پیر بوو و سارا ب خۆ ژی یا خرش بوو، چنكو ئەو یێ پشتڕاست بوو كو ئەوێ سۆز دای جهێ باوەریێیە.

¹² لەوما ژ كەسەكێ وەكو ئێكێ مری دویندەهەك پەیدا بوو، ژمارەیا وان تەمەت ستێرێن ئەسمانی و تەمەت خیزێ ل سەر كنارێ دەریایێ ناهێتە هژمارتن.

¹³ ئەو هەمی د باوەریێ دا مرن و سۆز ب دەست خۆ ڤە نەئینا، لێ ژ دویر ڤە دیتن و بخێرهاتنا وان كر و دانپێدان كر كو ئەو ل سەر ئەردی د هاڤی و بیانینە.

¹⁴ ئەوێن تشتێن هۆسا دبێژن، ئاشكرا دكەن كو بۆ خۆ ل وەڵاتەكی دگەڕیێن.

¹⁵ ئەگەر ئەوان بیریا وی جهێ ژێ دەركەفتین كربا، دا وان دەلیڤە بۆ ڤەگەڕیانێ هەبیت.

¹⁶ لێ ل شوینا وێ چەندێ مەرەقا وان وەڵاتەكێ باشتر بوو، ئانكو وەڵاتەكێ ئەسمانی. لەوما خودێ ب شەرم نابینیت كو ب خودایێ وان بهێتە بناڤكرن، چنكو وی بۆ وان باژێڕەك ئامادە كریە.

¹⁷ ب باوەریێ ئیبراهیمی ئیسحاق وەكو قوربان پێشكێش كر، دەمێ خودێ ئەو ئێخستیە د تاقیكرنێ دا. ئەوێ سۆز بۆ وی هاتینە دان ئێكانەیێ خۆ پێشكێش كر،

¹⁸ سەبارەت وی خودێ گۆتیە: «دویندەها تە دێ ژ ئیسحاقی هێتە هژمارتن.»

¹⁹ ئیبراهیمی د دلێ خۆ دا دگۆت كو خودێ دشێت مریان راكەتەڤە. ب شێوەیەكێ هێماكی كوڕێ خۆ، وەكو ئێكێ ژ ناڤ مریان رابووی، وەرگرتەڤە.

²⁰ ب باوەریێ ئیسحاقی داخوازا بەرەكەتێ، دەربارەی رویدانێن پاشەڕۆژێ، بۆ یەعقوب و عیسۆی كر.

²¹ ب باوەریێ یەعقوبی، دەمێ ل بەر مرنێ، داخوازا بەرەكەتێ بۆ هەر ئێك ژ كوڕێن یوسڤی كر و خۆ خواركرە سەر دەستكێ گۆپالێ خۆ و سەرێ خۆ بۆ خودێ چەماند.

²² ب باوەریێ یوسڤی دەمێ ل بەر مرنێ بەحسێ دەركەفتنا گەلێ ئیسرائیل كر و دەربارەی هەستیێن خۆ ئەو راسپاردن.

²³ ب باوەریێ مووسا دەمێ ژ دایك بووی، سێ هەیڤان ژ لایێ دای و بابێن وی ڤە هاتە ڤەشارتن، چنكو وان دیت كو زاڕۆك یێ جوانە و ژ فەرمانا پاشای نەترسیان.

²⁴ ب باوەریێ مووسا، دەمێ مەزن بووی، رازی نەبوو كو ب كوڕێ كچا فیرعەونی بهێتە بناڤكرن.

²⁵ وی ب باشتر دیت كو ل گەل گەلێ خودێ سڤكاتی پێ بهێتە كرن، نەكو خۆشیا گونەهێ یا دەمكی هەبیت.

²⁶ وی ئەڤ شەرمزاریا ژ پێخەمەت مەسیحی ب سامانەكێ مەزنتر ژ گەنجینەیێن مسرێ دانا، چنكو چاڤێ وی ل خەلاتی بوو.

²⁷ ب باوەریێ وی مسر هێلا، بێی كو ژ تۆڕەبوونا پاشای بترسیت. وی خۆڕاگری كر، هەروەكو وی ببینیت یێ كو ناهێتە دیتن.

²⁸ ب باوەریێ وی جەژنا دەربازبوونێ كر و خوینا وێ رەشاند، داكو ئەوێ نەخری دكوشتن، وان نەهنگێڤیت.

²⁹ ب باوەریێ ئیسرائیلی د دەریایا سۆر را دەرباز بوون، هەروەكو ل سەر هشكاتیێ، لێ دەمێ مسریان بزاڤ كری ژێ دەرباز ببن، خەندقین.

³⁰ ب باوەریێ شویرهێن ئەریحا هەڕفتن، پشتی ئەو حەفت رۆژان ل دۆر وێ زڤڕین.

³¹ ب باوەریێ راحابا لەشفرۆش ل گەل نەگوهداران ژ ناڤ نەچوو، چنكو ب ئاشتیانە بخێرهاتن ل سیخوڕان كر.

³² چ دی بێژم؟ من دەم نینە بەحسێ گدعۆن و باراق و شەمشون و یەفتاح و داوود و ساموئێل و پێغەمبەران بكەم.

³³ ئەوان ب باوەریێ پاشایەتی بندەست كرن، دادپەروەری ب ج‍‌ھ ئینا، سۆز ب دەست خۆ ڤە ئینان، دەڤێ شێران گرێ دا،

³⁴ هێزا ئاگری ڤەمراند، ژ دەڤێ شیری رزگار بوون، د ناڤ لاوازیێ دا هێز ب دەست خۆ ڤە ئینا، د شەڕی دا بوونە هێزدار، لەشكەرێن بیانیان راتەقاندن،

³⁵ ژنكان مریێن خۆ ب ساخی وەرگرتنەڤە. هندەكێن دی ژی هاتنە ئەشكەنجەدان و قەبیل نەكر بهێنە ئازاد كرن، داكو ل رۆژا رابوونێ بگەهنە ژیانەكا باشتر.

³⁶ هندەكێن دی كەفتنە د تاقیكرنا سڤكاتیپێكرنێ و قامچیلێدانێ دا، هەروەسا زنجیركرن و زیندانكرنێ.

³⁷ هاتنە بەربارانكرن، ب مشاری هاتنە قەدكرن، ب دربێ شیری هاتنە كوشتن، د پیستێ پەز و بزنان دا گەڕیان، ب هەژاری، تەپەسەركری و ستەملێكری.

³⁸ جیهان نە یا هەژی وان بوو. ئەو دەربەدەری بیابان و چیا و شكەفت و كونێن بن ئەردی بوون.

³⁹ ئەڤ هەمی مرۆڤە، سەرەڕای كو ژ ئەگەرێ باوەریا وان هاتنە پەسەندكرن، لێ وان سۆز ب دەست خۆ ڤە نەئینا،

⁴⁰ چنكو خودێ پێشوەخت تشتەكێ باشتر بۆ مە ئامادە كریە، داكو ئەو بێی مە نەهێنە كاملكرن.