ئەفەسۆس 2 - ئنجیلا پیرۆز

دەربازبوون ژ مرنێ بۆ ژیانێ

¹ هوین ژی ژ بەر سەرپێچی و گونەهێن خۆ د مری بوون،

² دەمێ هەوە ژیانا خۆ ل دویڤ چەرخا ڤێ جیهانێ بڕێڤە دبر، ل دویڤ سەروەرێ دەستهەلاتا بەرگەبای، ئەو گیانێ نوكە د ناڤ مرۆڤێن نەگوهدار دا كار دكەت.

³ دەمەكی مە هەمیان ژی د ناڤ وان دا ب ئارەزوویێن لەشێ خۆ دكر و حەزێن لەش و هزرێن خۆ ب ج‍‌ھ دئینان. ئەم ژی وەكو یێن دی، ب سرۆشتێ خۆ د هەژی تۆڕەبوونا خودێ بووین.

⁴ لێ خودایێ كو ب دلۆڤانیێ دەولەمەند، ژ پێخەمەت حەزژێكرنا خۆ یا مەزن، ئەوا پێ حەز ژ مە كری،

⁵ دەمێ ئەم ژ بەر گونەهێن خۆ هێشتا د مری بووین، ئەم ل گەل مەسیحی ڤەژاندین. ب كەرەمێیە كو هوین قورتال بووین.

⁶ ژ بەر ئێكبوونا مە ل گەل مەسیح عیسای، خودێ ئەم ل گەل وی ژ مرنێ راكرین و ل گەل وی ل جهێن ئەسمانی روینشتاندین.

⁷ خودێ ئەڤە كر، دا د سەردەمێن بهێن دا، دەولەمەندیا كەرەما خۆ یا بێ سنوور دیار بكەت، ب رێكا وێ قەنجیا وی، د ئێكبوونا مە ل گەل مەسیح عیسای دا، ل گەل مە كری.

⁸ چنكو هوین ب كەرەما خودێ قورتال بوون، ئەو ژی ب رێكا باوەریێ بوو و ئەڤ چەندە نە ژ هەوەیە، لێ دیاریا خودێیە.

⁹ ئەڤە نە ئەنجامێ كریارێن هەوەیە، دا چ كەس شانازیێ ب خۆ نەبەت.

¹⁰ چنكو ئەم چێكریێن خودێینە، د ئێكبوونا ل گەل مەسیح عیسای دا هاتینە ئافراندن، دا ئەم د ڤان كریارێن باش دا، یێن خودێ پێشوەخت ئامادە كرین، بڕێڤە بچین.

هەمی باوەردار ئێكن ب رێكا مەسیحی

^11-12 لەوما بیرا خۆ بینن كو دەمەكی هوین یێن ژ بنیاتێ خۆ نەجوهی د بێ مەسیح بوون. هوین ئەون یێن ب ‹سونەتنەكری› دهێنە بناڤكرن ژ لایێ وان ڤە یێن ب ‹سونەتكری› دهێنە بناڤكرن، ئەوێن ب كارێ دەستی د لەشی دا هاتینە سونەتكرن. وی دەمی هوین ژ هەڤوەڵاتینیا گەلێ ئیسرائیل د ڤەدەر بوون و ژ وان پەیمانێن ل سەر سۆزا خودێ هاتینە دامەزراندن د بیانی بوون. هەوە هیڤی نەبوو و د جیهانێ دا د بێ خودێ بوون.

¹³ لێ نوكە د ئێكبوونا ل گەل مەسیح عیسای دا، هوین یێن كو ل دەمەكی د دویر بوون، ب رێكا خوینا مەسیحی هاتنە نێزیك كرن.

¹⁴ چنكو مەسیح ب خۆ ئەو ئاشتیە یا د ناڤبەرا مە دا. وی جوهی و نەجوهی كرنە ئێك و ب لەشێ خۆ دیوارێ ناڤبڕێ، ئانكو دوژمناتی، هەلوەشاند.

¹⁵ وی دەستوور ب فەرمان و رێسایێن وی ڤە ژ كار ئێخست، دا ب ئێكبوونا ل گەل خۆ، ژ هەردوویان مرۆڤەكێ نوی بئافرینیت و ب ڤی شێوەی ئاشتیێ چێكەت

¹⁶ و ب خاچا خۆ هەردوویان د ئێك لەش دا ل گەل خودێ ئاشت بكەت، هۆسا وی دوژمناتی كوشت.

¹⁷ ئەو هات و مزگینیا ئاشتیێ بۆ هەوە یێن دویر و یێن نێزیك ژی ئینا.

¹⁸ چنكو ب رێكا مەسیحی، مە هەردوویان دەستویریا هەی، ب ئێك گیان خۆ نێزیكی بابی بكەین.

¹⁹ ئەڤجا ئێدی هوین نە خەلك و بیانینە، لێ هوین ل گەل پیرۆزكریان هەڤوەڵاتینە و ئەندامێن مالا خودێنە.

²⁰ هوین ل سەر بنیاتێ هنارتی و پێغەمبەران د ئاڤاكرینە و مەسیح عیسا ب خۆ بەرێ بنیاتیە.

²¹ ب وی هەمی ئاڤاهی خۆ پێكڤە دگریت و مەزن دبیت، دا بۆ خودانی ببیتە پەرستگەهەكا پیرۆز.

²² ب وی هوین ژی پێكڤە دهێنە ئاڤاكرن، دا ببنە خانیەك كو خودێ ب رێكا گیانێ خۆ تێدا ئاكنجی ببیت.