كۆلۆسی 4 - ئنجیلا پیرۆز

¹ گەلی خودانان، ب دادپەروەری و یەكسانی سەرەدەریێ ل گەل بەنیێن خۆ بكەن، چنكو هوین دزانن كو هەوە ژی خودانەكێ ل ئەسمانی هەی.

نڤێژ و شیرەت

² ل سەر نڤێژكرنێ د بەردەوام بن و تێدا ب سوپاسیكرنێ هشیار بمینن.

³ د هەمان دەم دا، بۆ مە ژی نڤێژان بكەن، دا خودێ ژ پێخەمەت پەیاما خۆ دەرگەهەكی بۆ مە ڤەكەت، داكو ئەم نهێنیا مەسیحی رابگەهینین، ئەوا ئەز ژ بەر وێ هاتیمە زیندانكرن.

⁴ نڤێژان بكەن، كو ئەز ڤێ نهێنیێ ب زەڵالی رابگەهینم، هەروەكو پێدڤیە ئەز بێژم.

⁵ ل بەرامبەری وان یێن كو ژ دەرڤەی باوەریێنە، ب ئاقلمەندی سەرەدەریێ بكەن و دەرفەتا ڤی دەمی ژ دەست نەدەن.

⁶ بلا ئاخفتنا هەوە هەردەم یا شرین و یا ب خوێ بیت، دا بزانن كا چەوا پێدڤیە هوین بەرسڤا هەر كەسەكی بدەن.

سڵاڤێن تایبەت و خاترخواستن

⁷ تیخیكۆس، برایێ خۆشتڤی و خزمەتكارێ دلسۆز و هەڤبەنیێ مە د ئێكبوونا ل گەل خودانی دا، دێ هەمی تشتان دەربارەی رەوشا من گەهینیتە هەوە.

⁸ من ئەو بۆ ڤێ مەبەستێ یێ هنارتیە نك هەوە، دا هوین رەوشا مە بزانن و ئەو دلێ هەوە هانبدەت.

⁹ من ئەو یێ ل گەل ئۆنیسیمۆسی، برایێ دلسۆز و خۆشتڤی، كو ئێك ژ هەوەیە، یێ هنارتی. ئەو هەردوو دێ هەر تشتەكێ ل ڤێرێ روی ددەت بۆ هەوە بێژن.

¹⁰ ئەرستارخۆس، ئەوێ ل گەل من د زیندانێ دا سڵاڤان ل هەوە دكەت، هەروەسا مەرقۆسێ پسمامێ بارناباسی ژی، ئەوێ دەربارەی وی هەوە راسپاردە وەرگرتی كو ئەگەر هاتە نك هەوە، وی قەبیل بكەن.

¹¹ عیسا ژی ئەوێ دبێژنێ یوستۆس سڵاڤان ل هەوە دكەت. د ناڤ ئەوێن ل گەل من بۆ پاشایەتیا خودێ كار دكەن، ب تنێ ئەو ژ سونەتكریانە و ئەو یێن بووینە هاندەرێن من.

¹² ئێپافراس ژی سڵاڤان ل هەوە دكەت، ئەو ژی ئێك ژ هەوەیە و بەنیێ مەسیح عیسایە، ئەو هەردەم ب نڤێژان ژ پێخەمەت هەوە خەباتێ دكەت، دا هوین ب كاملی و پشتڕاست ژ هەمی حەزا خودێ د خۆڕاگر بن.

¹³ ئەز بۆ وی شاهدەییێ ددەم، كو ئەو بۆ هەوە و بۆ ئەوێن ل لاودیكیایێ و ئەوێن ل هیێراپۆلیسێ، گەلەك دوەستیێت.

¹⁴ نۆژدارێ خۆشتڤی لوقا و دیماس ژی سڵاڤان ل هەوە دكەن.

¹⁵ سڵاڤان ل خویشك و برایێن ل لاودیكیایێ، ل نیمفایێ و جڤاكا باوەرداران یا ل مالا وێ كۆم دبیت، بكەن.

¹⁶ پشتی ئەڤ نامەیە د ناڤ هەوە دا دهێتە خواندن، وە بكەن كو ل جڤاكا باوەردارێن لاودیكیایێ ژی بهێتە خواندن، هەروەسا نامەیا ژ لاودیكیایێ ژی، هوین بخوینن.

¹⁷ بێژنە ئارخیپۆسی: «خەمخۆرێ وێ خزمەتێ بە یا تە ژ خودانی وەرگرتی، دا وێ ب ج‍‌ھ بینی.»

¹⁸ ئەز پاولۆس، ڤێ سڵاڤێ ب دەستێ خۆ دنڤیسم. قەیدا من بیننە بیرا خۆ. كەرەما خودێ ل سەر هەوە بیت.