كۆلۆسی 3 - ئنجیلا پیرۆز

ژیانا نوی یا ب مەسیحی

¹ ئەڤجا ئەگەر هوین ل گەل مەسیحی ژ مرنێ هاتینە راكرن، بزاڤێ بۆ تشتێن ل سڵال بكەن، ل وی جهی یێ مەسیح لێ، كو ل دەستێ راستێ یێ خودێ یێ روینشتیە.

² بلا هزرا هەوە ل سەر تشتێن ل سڵال بیت، نە یێن ل سەر ئەردی.

³ چنكو هوین مرین، ژیانا هەوە ژی ل گەل مەسیحی ل نك خودێ هاتیە هەلگرتن.

⁴ دەمێ مەسیح، ئەوێ كو ژیانا هەوەیە، دیار دبیت، هنگی هوین ژی دێ ل گەل وی د مەزناهیێ دا دیار بن.

⁵ ژ بەر هندێ حەزێن خۆ یێن ڤێ جیهانێ بمرینن: دەهمەنپیسی، پویچاتی، گڕ، حەزێن خراب و چاڤبرساتی كو پووتپەرێسیە،

⁶ ژ بەر وان تشتان تۆڕەبوونا خودێ یا ب سەر مرۆڤێن نەگوهدار دا دهێت.

⁷ هەوە ژی دەمەكی ئەو تشت دكرن، دەمێ هوین د ناڤ وان تشتان دا دژیان.

⁸ لێ نوكە ڤان هەمی تشتان ژ نك خۆ بهاڤێژن: كەرب، تۆڕەبوون، كین، بوهتان و ئاخفتنێن كرێت ئەوێن ژ دەڤێ هەوە دەردكەڤن.

⁹ درەوان ل ئێكودوو نەكەن، چنكو هەوە مرۆڤێ كەڤن ب كریارێن وی ڤە ژ بەر خۆ كریە

¹⁰ و مرۆڤێ نوی كریە بەر خۆ، ئەوێ دهێتە نویكرن ل گۆر وێنەیێ ئافرێندەرێ خۆ، دا ب دروستی ئافرێندەری بنیاسیت.

¹¹ د وێ نویكرنێ دا چ جوداهی د ناڤبەرا نەجوهی و جوهی، سونەتكری و سونەتنەكری، بەربەر و سكێت، بەنی و ئازاد دا نینە، لێ مەسیح هەمی تشتە و د ناڤ مە هەمیان دایە.

¹² ئەڤجا هوین ئەوێن خودێ ئەو هەلبژارتین و پیرۆز كرین و حەز ژێ دكەت: دلۆڤانی، قەنجی، دەروونبچویكی، دلنەرمی و بێهنفرەهیێ بكەنە بەر خۆ.

¹³ ل گەل ئێكودوو د بێهنفرە‍‌ھ بن، ئەگەر ئێكی گازندە ل سەر ئێكێ دی هەبن، ل ئێكودوو ببورن. هەروەكو خودان ل هەوە بوری، هوین ژی وەسا ل ئێكودوو ببورن.

¹⁴ د سەر ڤان هەمیان را، حەزژێكرنێ بكەنە بەر خۆ، كو د كاملیێ دا هەمی تشتان پێكڤە گرێ ددەت.

¹⁵ بلا د دلێ هەوە دا ئاشتیا مەسیحی حوكمداریێ بكەت، ئەو ئاشتیا هوین بۆ وێ هاتینە گازیكرن، كو ببنە ئێك لەش، هەروەسا د سوپاسدار ژی بن.

¹⁶ بلا پەیڤا مەسیحی ب دەولەمەندیا خۆ د دلێ هەوە دا ئاكنجی ببیت، هوین ژی ب هەمی ئاقلمەندی ئێكودوو فێر بكەن و ئاگەهدار بكەن، زەبووران و سروود و سترانێن روحانی، ب سوپاسداری ژ دلێ خۆ بۆ خودێ بسترن.

¹⁷ هەر تشتێ هوین بكەن، ب گۆتن یان كریار، ب ناڤێ خودان عیسای بكەن و ب رێكا وی سوپاسیا خودایێ باب بكەن.

پەیوەندیێن ناڤ مالێ

¹⁸ گەلی ژنان، كا چەوا هەژی خودانیە، هەر ئێك ژ هەوە ملكەچی مێرێ خۆ بیت.

¹⁹ گەلی مێران، هەر ئێك ژ هەوە حەز ژ ژنا خۆ بكەت و ل گەل وان د توند نەبن.

²⁰ گەلی زاڕۆكان، د هەمی تشتان دا گوهداریا دایك و بابێن خۆ بكەن، چنكو ئەڤە جهێ رازیبوونا خودانیە.

²¹ گەلی بابان، زاڕۆكێن خۆ تۆڕە نەكەن، دا بێ ئومێد نەبن.

²² گەلی بەنیان، د هەمی تشتان دا گوهداریا خودانێن خۆ یێن ڤێ جیهانێ بكەن، نە ب وێ خزمەتێ یا ل بەر چاڤان دهێتە كرن، ب تنێ بۆ رازیكرنا مرۆڤان، لێ ب دلساخی و ترسا خودانی گوهداریێ بكەن.

²³ هەر تشتەكێ هوین بكەن، وەسا ژ دل بكەن، هەروەكو بۆ خودانی بیت، نە بۆ مرۆڤان،

²⁴ چنكو هوین دزانن دێ پاداشتی كو میراتە ژ خودانی وەرگرن، ژ بەر كو هوین خزمەتا خودان مەسیحی دكەن.

²⁵ لێ یێ نەڕاستیێ بكەت دێ سزایێ نەڕاستیا خۆ وەرگریت و لایەنگری نینە.