كۆلۆسی 2 - ئنجیلا پیرۆز

¹ من دڤێت هوین بزانن، كو ئەز چەند ژ پێخەمەت هەوە و یێن ل لاودیكیایێ و هەمیێن روی ب روی ئەز نەدیتیم، بزاڤێ دكەم.

² ئارمانجا من ئەوە كو ئەو بهێنە هاندان و د حەزژێكرنێ دا د ئێكگرتی بن، ب مەرەما هەمی دەولەمەندیا تێگەهشتنا تەمام، دا نهێنیا خودێ بزانن، كو مەسیحە،

³ ئەوێ د وی دا هەمی گەنجینەیێن ئاقلمەندی و زانینێ دڤەشارتینە.

⁴ ئەز ڤێ چەندێ دبێژم، دا كەس ب گۆتنێن خۆش هەوە نەخاپینیت.

⁵ چنكو ئەگەر ب لەشی ئەز ل نك هەوە یێ ئامادە نەبم، لێ ب گیانی ئەز ل گەل هەوەمە، ب دیتنا رێكوپێكی و موكمیا باوەریا هەوە ب مەسیحی، دلخۆش دبم.

ژیانا ب مەسیحی

⁶ ئەڤجا كا چەوا هەوە خودان مەسیح عیسا قەبیل كریە، هۆسا ل گەل وی گرێدای بژین،

⁷ ب وی ڤە رە‍‌ھ داهێلای و د ئاڤاكری بن و د باوەریێ دا د موكم بن هەروەكو هوین هاتینە فێركرن و بلا هوین ژ سوپاسیكرنێ د سەر دا بڕژن.

⁸ هشیار بن، دا كەس ب فەلسەفەیەكا خاپینۆك و درەو، ل دویڤ تیتالێن مرۆڤان، ل دویڤ هێزێن سرۆشتی یێن ڤێ جیهانێ، نە ل دویڤ مەسیحی، هەوە دیل نەكەت.

⁹ چنكو هەمی تژیاتیا خودایەتی، د مەسیحی دا یا ئاكنجیە، ب شێوەیەكێ لەشكانی.

¹⁰ هوین ژی د ئێكبوونا ل گەل وی دا د كاملن، ئەوێ كو سەرێ هەمی سەروەر و دەستهەلاتدارانە.

¹¹ هەروەسا د ئێكبوونا ل گەل وی دا هوین هاتینە سونەتكرن، سونەتكرنا نە ب دەستێ مرۆڤان، لێ ب ژێڤەكرنا حەزێن لەشی بۆ گونەهێ، ئەڤەیە سونەتكرن ژ لایێ مەسیحی ڤە.

¹² ب تافیركرنێ هوین ل گەل وی هاتینە ڤەشارتن و هەر ب وێ هوین ل گەل وی هاتینە راكرن ژی، چنكو هەوە باوەری ب شیانا خودێ یێ ئەو ژ ناڤ مریان راكری، ئینا.

¹³ هوین ژ بەر گونەهێ و سونەتنەكرنا لەشێ خۆ د مری بوون، لێ خودێ هوین ل گەل وی ڤەژاندن، دەمێ ل هەمی گونەهێن مە بوری.

¹⁴ وی تۆمارا قەرێن مە ژێ بر، ئەوا ل گۆر رێسایێن دەستووری ل دژی مە هاتیە نڤیسین. وی ئەو تۆمار ب خاچێ ڤە بزماردا و هۆسا راكر.

¹⁵ سەروەر و دەستهەلاتدار ژ چەك كرن و ل بەر چاڤێن هەمیان شەرمزار كرن، ب رێكا خاچێ سەركەفتن ل سەر وان ئینا.

¹⁶ لەوما بلا كەس ل سەر خوارن، یان ڤەخوارن، یان ژی جەژنان، یان هەیڤێن نوی، یان شەمبیان رەخنەیێ ل هەوە نەگریت.

¹⁷ ئەڤێن هەنێ ب تنێ سیتافكن بۆ تشتێن پاشەڕۆژێ، لێ یێ راستەقینە مەسیحە.

¹⁸ بلا كەس هەوە ژ خەلاتێ هەوە بێبەهر نەكەت، كەسەكێ وەسا كو حەز ژ خۆنزمكرنێ و پەرستنا فریشتەیان دكەت و بەردەوام بەحسێ بینینێن خۆ دكەت كو بێ بنیات یێ پفدایە ژ لایێ زێهنێ خۆ یێ لەشكانی ڤە

¹⁹ و خۆ ب سەری ڤە نەگرتیە. ژ وی سەری، هەمی لەش ب رێكا گە‍‌ھ و رەهان، دهێتە پشتەڤانیكرن و پێكڤە دهێتە گرێدان، وەسا لەش وەرارێ دكەت، وەراركرنەكا ژ لایێ خودێ ڤە.

²⁰ مادەم هوین ل گەل مەسیحی مرینە و ژ هێزێن سرۆشتی یێن ڤێ جیهانێ ئازاد بووینە، ئێدی بۆچی هوین وەسا دژین، هەروەكو هوین یێن ڤێ جیهانێ بن؟ بۆچی هوین ملكەچی ڤان رێسایان دبن:

²¹ «دەست ڤە نەدەی! تام نەكێ! دەست نەكێ!»

²² رێسایێن هۆسا هەمی فەرمان و فێركرنێن مرۆڤانە، دەربارەی تشتێن ژ ناڤ دچن دەمێ دهێنە بكارئینان،

²³ وان رێسایان سەبارەت ئایینداریەكا دەستكرد و خۆنزمكرنێ و دژواریێ ل گەل لەشی، ژ سەرڤە دیمەنەكێ ئاقلمەندیێ یێ هەی، لێ د رێگریێ دا ل بەرامبەر تێركرنا ئارەزوویێن لەشكانی، چ مفایێ خۆ نینە.