2 تیمۆتاوس 4 - ئنجیلا پیرۆز

¹ ئەڤجا ئەز ل بەرامبەر خودێ و مەسیح عیسای، ئەوێ دێ دادكرنا مری و زیندیان كەت و ژ بەر دیاربوونا وی و پاشایەتیا وی، فەرمانێ ل تە دكەم:

² پەیڤێ رابگەهینە، ل دەمێ گونجای و نە گونجای یێ ئامادە بە. خەلكی پاشڤە ببە، ل وان بحەیتینە و هاندانا وان بكە، ب هەمی بێهنفرەهی وان فێر بكە.

³ چنكو دەمەك دێ هێت، خۆ ل بەر فێركرنا ساخلەم ناگرن، لێ ل دویڤ ئارەزوویێن خۆ دێ مامۆستایان ل دۆرێن خۆ كۆم كەن كو تشتێ خۆش بۆ گوهێ وان بێژن

⁴ و دێ ژ گوهدانا راستیێ لادەن و قەستا ئەفسانەیان كەن.

⁵ لێ تۆ د هەمی تشتان دا یێ هشیار بە، خۆ ل بەر ئازاران بگرە، ب كارێ مزگینیدەری راببە، خزمەتا خۆ تەمام بكە.

⁶ چنكو ئەڤە ئەز وەكو پێشكێشیەكێ رژاندنێ دهێمە رشتن، دەمێ وەغەركرنا من یێ هاتی.

⁷ ئەز د خەباتا باش دا خەبتیم، من بەریكانا خۆ تەمام كر، باوەری پاراست.

⁸ ژ نوكە و پێڤە تانجا راستداریێ ب ژڤانێ منە، ئەوا دێ خودان، دادوەرێ دادپەروەر، د وێ رۆژێ دا دەتە من، نە ب تنێ من، لێ وان هەمیان ژی یێن حەز ژ دیاربوونا وی كری.

راسپاردەیێن دویماهیێ

⁹ بزاڤێ بكە ب لەز بهێیە نك من،

¹⁰ چنكو دیماسی ژ بەر حەزژێكرنا خۆ بۆ ڤێ جیهانێ ئەز هێلام و چوو سالونیكیێ. كرەسكیس ژی چوو گالاتیایێ و تیتۆس چوو دالمەتیایێ.

¹¹ ب تنێ لوقا ل نك منە. هەڕە ب دویڤ مەرقۆسی را و ل گەل خۆ بینە، چنكو د ڤێ خزمەتێ دا ئەو ب كێر من دهێت.

¹² من تیخیكۆس یێ هنارتیە ئەفەسۆسێ.

¹³ دەمێ تۆ دهێی، ئەو قاپیتێ من هێلایە ل ترویاسێ ل نك كارپۆسی، ل گەل خۆ بینە، پەرتووكان ژی و ب تایبەت یێن ل سەر كەڤلی هاتینە نڤیسین.

¹⁴ ئەسكەندەرێ سفرگر گەلەك خرابی ل من كر. خودان دێ ل دویڤ كریارێن وی دەتێ.

¹⁵ تۆ ژی خۆ ژێ بپارێزە، چنكو ب توندی بەرهنگاریا پەیاما مە كر.

¹⁶ د بەرگریكرنا خۆ یا ئێكێ دا ل بەرامبەر دادگەهێ، كەس نەهات پشتەڤانیا من بكەت، لێ هەمیان ئەز هێلام. خودێ ل سەر وان نەهژمێریت.

¹⁷ لێ خودان ل گەل من راوەستیا و ئەز بهێز ئێخستم، دا ب رێكا من مزگینی ب تەمامی بهێتە راگەهاندن و هەمی مللەت ببهیسن، وەسا ئەز ژ دەڤێ شێری هاتمە رزگاركرن.

¹⁸ خودان دێ من ژ هەمی كریارێن خراب رزگار كەت و ب سلامەتی گەهینیتە پاشایەتیا خۆ یا ئەسمانی. هەتا هەتایێ مەزناهی بۆ وی بیت. ئامین.

سڵاڤێن دویماهیێ

¹⁹ سڵاڤان ل پریسكیلایێ و ئەكیلای بكە و ل مالا ئۆنیسیفورۆسی ژی.

²⁰ ئەراستۆس ما ل كورنتۆسێ و من تروفیمۆس ب نەساخی هێلا ل میلیتۆسێ.

²¹ بزاڤێ بكە بەری زڤستانێ بهێی. ئەوبولۆس، پودێس، لینۆس، كلاودیا و هەمی خویشك و برا سڵاڤان ل تە دكەن.

²² خودان ل گەل گیانێ تە بیت. كەرەم ل سەر هەوە بیت.