2 تیمۆتاوس 2 - ئنجیلا پیرۆز

سەربازێ باش یێ مەسیح عیسای

¹ ئەڤجا كوڕێ من، ب وێ كەرەما د مەسیح عیسای دا، یێ بهێز بە

² و ئەو تشتێن ب ئامادەبوونا گەلەك شاهدان تە ژ من بهیستین، ب كەسێن دلسۆز راسپێرە، كو بشێن هندەكێن دی ژی فێر بكەن.

³ وەكو سەربازەكێ باش یێ مەسیح عیسای، پشكداریێ د ئازاركێشانێ دا بكە.

⁴ ئەوێ سەربازیێ دكەت، خۆ ب كاروبارێن ژیانێ ڤە مژویل ناكەت، چنكو وی دڤێت فەرماندەیێ خۆ رازی بكەت.

⁵ وەرزشڤان ژی تانجا سەركەفتنێ نابەت، ئەگەر ل دویڤ یاسایێ بەریكانێ نەكەت.

⁶ دڤێت جۆتیارێ رێنجبەر ئێكەم كەس بیت بەهرا خۆ ژ بەرهەمی ببەت.

⁷ هزرا خۆ ل سەر گۆتنێن من بكە، چنكو خودان دێ تێگەهشتنێ بۆ هەمی تشتان دەتە تە.

⁸ عیسایێ مەسیح بینە بیرا خۆ، ئەوێ ژ ناڤ مریان هاتیە راكرن و ئەو ژ دویندەها داوودیە، ل گۆر وێ مزگینیا ئەز رادگەهینم،

⁹ ئەوا ژ بەر وێ ئەز ئازارێ دكێشم، تاكو وی رادەی هاتیمە قەیدكرن وەكو تاوانبارەكی. لێ پەیڤا خودێ نەهاتیە قەیدكرن.

¹⁰ لەوما ژ پێخەمەت هەلبژارتیان ئەز خۆ ل بەر هەمی تشتان دگرم، دا ئەو ژی قورتالبوونا ب رێكا مەسیح عیسای دهێت ل گەل مەزناهیا هەروهەر وەرگرن.

¹¹ ئەڤ گۆتنە جهێ پشتڕاستیێیە: ئەگەر ئەم ل گەل وی مربین دێ ل گەل وی ژین ژی.

¹² ئەگەر ئەم خۆ راگرین، دێ ل گەل وی پاشایەتیێ ژی كەین. ئەگەر ئەم وی ماندەل بكەین، ئەو ژی دێ مە ماندەل كەت.

¹³ ئەگەر ئەم د دلسۆز نەبین، ئەو دێ دلسۆز مینیت، چنكو ئەو نەشێت خۆ ماندەل بكەت.

پالەیێ جهێ رازیبوونا خودێ

¹⁴ ئەڤان تشتان بینە بیرا وان و ل بەرامبەر خودێ وان راسپێرە كو ل سەر پەیڤان شەڕەدەڤێ نەكەن، چنكو چ مفا تێدا نینن، لێ گوهداران دهەڕفینیت.

¹⁵ هەمی بزاڤان بكە كو تۆ وەكو پالەیەكێ جهێ رازیبوونێ، خۆ بۆ خودێ پێشكێش بكەی، پالەیەكێ جهێ شەرمێ د كارێ وی دا نینە، ئەو پەیڤا راستیێ دروست شڕۆڤە دكەت.

¹⁶ خۆ ژ پڕبێژیێن نەپیرۆز دویر بئێخە، چنكو ئەو دێ پتر و پتر بەرێ مرۆڤی دەنە خودێنەنیاسیێ.

¹⁷ ئاخفتنێن وان وەكو پەنجەشێرێ دێ بەڵاڤ بن. هیمەنایۆس و فلیتۆس ژی ژ وان كەسانن،

¹⁸ ئەوێن ژ راستیێ ڤاڕێ بووین و دبێژن كو رۆژا رابوونێ یا روی دای. هۆسا باوەریا هندەكان سەروبن دكەن.

¹⁹ لێ بنیاتێ قاییم یێ خودێ دانای یێ خۆجهە، ئەڤ موهرە ل سەرە: «خودان، یێن خۆ دنیاسیت» و «هەر ئێكێ دانپێدانێ ب ناڤێ خودانی بكەت، فەرە خۆ ژ خرابیێ دویر بئێخیت.»

²⁰ د مالەكا مەزن دا، نە ب تنێ ئامانێن زێڕی و زیڤی هەنە، لێ یێن داری و گلی ژی هەنە، هندەك بۆ تشتێن بڕێزن و هندەك بۆ تشتێن بێڕێزن.

²¹ ئەڤجا ئەگەر ئێك خۆ ژ ڤان تشتان پاقژ بكەت، دێ بیتە ئامانەكێ بڕێز، یێ پیرۆزكری، یێ بكێرهاتی بۆ خودانێ خۆ و یێ ئامادە بۆ هەمی كارێن باش.

²² ژ حەزێن گەنجاتیێ بڕەڤە، هەروەسا بزاڤێ بۆ راستداری و باوەری و حەزژێكرن و ئاشتیێ بكە ل گەل وان كەسان یێن ب دلەكێ پاقژ هەوارا خۆ دگەهیننە خودانی.

²³ خۆ ژ گەنگەشەیێن دەبەنگ و نەزانانە بدە پاش، چنكو تۆ دزانی كو شەڕ ژێ پەیدا دبیت.

²⁴ دڤێت بەنیێ خودانی شەڕی نەكەت، لێ ل گەل هەمیان یێ دلنەرم بیت، بۆ فێركرنێ یێ شارەزا بیت و یێ بێهنفرە‍‌ھ بیت

²⁵ و ب جوامێری بەرهنگارێن خۆ راستڤە بكەت، بەلكو خودێ لخۆزڤڕینێ بدەتێ، دا راستیێ بزانن

²⁶ و ڤەگەڕنە سەر هشێن خۆ و ژ خەفكا ئبلیسی، ئەوێ ب سەر وان دا گرتی كو ب حەزا وی بكەن، قورتال ببن.