2 تیمۆتاوس 1 - ئنجیلا پیرۆز

سڵاڤ

¹ ژ من، پاولۆس، هنارتیێ مەسیح عیسای ب حەزا خودێ، ژ پێخەمەت وێ سۆزا ژیانێ ئەوا د ئێكبوونا ل گەل مەسیح عیسای دا هەی.

² بۆ كوڕێ من یێ خۆشتڤی تیمۆتاوسی: كەرەم و دلۆڤانی و ئاشتی ژ خودایێ باب و ژ خودانێ مە مەسیح عیسای ل سەر تە بن.

هاندان ل سەر راسپاردەیێ

³ ئەز سوپاسیا خودێ دكەم، ئەوێ ئەز ب وژدانەكا پاقژ د پەرێسم، هەروەكو بابكالێن من پەرستی، دەمێ ب شەڤ و رۆژ د نڤێژێن خۆ دا بێی راوەستیان تە دئینمە بیرا خۆ.

⁴ رۆندكێن تە دهێنە بیرا من و گەلەك حەز دكەم تە ببینم، دا ژ دلخۆشیێ پڕ ببم.

⁵ باوەریا تە یا بێ دووڕویاتی دئینمە بیرا خۆ، ئەوا ل بەراهیێ د دلێ داپیرا تە لۆئیسێ دا و د دلێ دایكا تە ئەونیكێ دا ئاكنجی و ئەز یێ پشتڕاستم كو ئەو د دلێ تە ژی دا یا ئاكنجیە.

⁶ ژ بەر ڤێ چەندێ ئەز بیرا تە دئینم كو تۆ دیاریا خودێ بشارینی، ئەوا وی دایە تە ب رێكا دەستدانانا من ل سەر تە.

⁷ چنكو خودێ گیانێ ترسنۆكیێ نەدایە مە، لێ گیانێ هێزێ و حەزژێكرنێ و لخۆزاڵبوونێ دایە مە.

⁸ ئەڤجا شەرم نەكە كو شاهدەییێ بۆ خودانێ مە بدەی، هەروەسا شەرم ب من ژی نەكە كو ئەز زیندانكریێ ویمە، لێ ب پشتگەرمی ب هێزا خودێ، ژ پێخەمەت مزگینیێ ل گەل من ئازارێ بكێشە.

⁹ خودێیە یێ ئەم قورتال كرین و بۆ گازیكرنەكا پیرۆز ئەم گازی كرین، نە ل دویڤ كریارێن مە، لێ ل دویڤ مەبەست و كەرەما خۆ یا بەری دەستپێكا ئافراندنێ ب رێكا مەسیح عیسای بۆ مە هاتیە دان

¹⁰ و نوكە ب دیاربوونا قورتالكەرێ مە مەسیح عیسای ئاشكرا بوو، ئەوێ مرن ژ ناڤ بری و ب رێكا مزگینیێ ژیان و نەمری داناینە بەر رۆناهیێ.

¹¹ بۆ ڤێ مزگینیێ ئەز وەكو راگەهێنەر و هنارتی و مامۆستا هاتیمە دانان.

¹² ژ بەر ڤێ ئەگەرێ ژی ئەز ڤان ئازاران دكێشم. لێ شەرم پێ ناكەم، چنكو دزانم من باوەری ب كێ ئینایە و پشتڕاستم كو ئەو دشێت وی تشتی یێ بۆ من هاتیە سپاردن تا وێ رۆژێ بپارێزیت.

¹³ وان پەیڤێن ساخلەم یێن تە ژ من بهیستین بۆ خۆ بكە نموونە، وێ چەندێ ب رێكا باوەریێ و وێ حەزژێكرنێ یا مە د ئێكبوونا ل گەل مەسیح عیسای دا هەی، بكە.

¹⁴ وی تشتێ چاك یێ بۆ تە هاتیە سپاردن، ب هاریكاریا گیانێ پیرۆز یێ د مە دا ئاكنجی بپارێزە.

¹⁵ تۆ دزانی كو هەمی ئەوێن ل هەرێما ئاسیایێ پشتا خۆ دایە من، ژ وان فووگەلۆس و هێرمۆگێنیس ژی.

¹⁶ بلا خودان دلۆڤانیێ ب مالا ئۆنیسیفورۆسی ببەت، چنكو وی گەلەك جاران بێهنا من فرە‍‌ھ كر و شەرم ب قەیدێن من نەكر،

¹⁷ لێ دەمێ هاتیە رۆمایێ، ب گەرمی ل من گەڕیا تاكو ئەز دیتیم.

¹⁸ (بلا خودان وێ كەرەمێ ل گەل وی بكەت كو ئەو د وێ رۆژێ دا دلۆڤانیێ ژ خودانی ببینیت!) تۆ باش دزانی ئەو خزمەتا وی ل ئەفەسۆسێ كری چەندە.