2 سالونیكی 3 - ئنجیلا پیرۆز

ژ بۆ مە نڤێژان بكەن

¹ ل دویماهیێ گەلی خویشك و برایان، نڤێژان ژ بۆ مە بكەن، داكو پەیڤا خودانی ب لەز بەڵاڤ ببیت و بهێتە مەزنكرن، هەروەكو د ناڤ هەوە ژی دا چێبووی.

² نڤێژان بكەن، داكو ئەم ژ مرۆڤێن بەدكار و خراب بهێینە قورتالكرن، چنكو نە هەمی مرۆڤ باوەردارن.

³ لێ خودان جهێ باوەریێیە، ئەو دێ هەوە موكم كەت و ژ خرابكاری پارێزیت.

⁴ ژ دەولەتسەرێ خودانی ئەم ژ هەوە د پشتڕاستین، كو ئەو راسپاردەیێن مە داینە هەوە، هوین ب ج‍‌ھ دئینن و دێ ب ج‍‌ھ ئینن ژی.

⁵ ئەڤجا بلا خودان بەرێ دلێ هەوە بدەتە حەزژێكرنا خودێ و خۆڕاگریا مەسیحی.

ئاگەهداری بۆ تەمبەل و خەمساران

⁶ ئەڤجا گەلی خویشك و برایان، ئەم ب ناڤێ خودانێ خۆ عیسایێ مەسیح فەرمانێ ل هەوە دكەین، كو هوین خۆ دویر بئێخن ژ هەمی برایێن ب تەمبەلی دژین و ل دویڤ وێ فێركرنێ ناژین یا وان ژ مە وەرگرتی.

⁷ هوین ب خۆ دزانن كو دڤێت هوین چاڤ ل مە بكەن، چنكو ئەم د تەمبەل نەبووین دەمێ ئەم د ناڤ هەوە دا.

⁸ مە بێ بەرامبەر نانێ چ كەسێ نەخوار، لێ شەڤ و رۆژ مە ب رەنج و وەستیان كار دكر، دا بۆ كەسێ ژ هەوە نەبینە بارگرانی.

⁹ نە چنكو مە ماف نەبوو، لێ دا ئەم خۆ بۆ هەوە بكەینە نموونە، دا هوین چاڤ ل مە بكەن.

¹⁰ چنكو دەمێ ئەم ل نك هەوە بووین، مە ئەڤ راسپاردە ل هەوە دكر: «ئەگەر ئێكی نەڤێت كار بكەت، بلا نەخۆت ژی.»

¹¹ ئەم ڤێ دبێژین، چنكو ئەم دبهیسین كو هندەك د ناڤ هەوە دا هەنە ب تەمبەلی دژین، چ كاری ناكەن، لێ ب تنێ ئەو مایێ خۆ د كارێ كەسێن دی دكەن.

¹² ئەم ب ناڤێ خودان عیسایێ مەسیح فەرمانێ ل كەسێن هۆسا دكەین و هیڤی ژێ دكەین، كو ئەو ب ئارامی كار بكەن و نانێ دەستێ خۆ بخۆن.

¹³ لێ هوین، گەلی خویشك و برایان، ژ كرنا باشیێ بێزار نەبن.

¹⁴ ئەگەر ئێك گوهداریا گۆتنێن مە یێن د ڤێ نامەیێ دا نەكەت، وی دەستنیشان بكەن و تێكهەلیێ ل گەل نەكەن، دا شەرمێ ژ خۆ بكەت.

¹⁵ وی وەكو دوژمن نەهژمێرن، لێ وەكو برا شیرەتان لێ بكەن.

سڵاڤێن دویماهیێ

¹⁶ ئەڤجا بلا خودانێ ئاشتیێ ب خۆ، هەرگاڤ و ب هەمی شێوەیان، ئاشتیێ بدەتە هەوە. خودان ل گەل هەوە هەمیان بیت.

¹⁷ ئەز پاولۆس، ڤێ سڵاڤێ ب دەستێ خۆ دنڤیسم، كو نیشانە د هەر نامەیەكا من دا، ئەز هۆسا دنڤیسم.

¹⁸ كەرەما خودانێ مە عیسایێ مەسیح ل سەر هەوە هەمیان بیت.