2 سالونیكی 1 - ئنجیلا پیرۆز

سڵاڤ

¹ ژ پاولۆس، سیلاس و تیمۆتاوسی، بۆ جڤاكا باوەردارێن سالونیكیێ، یا بابێ مە خودێ و خودان عیسایێ مەسیح:

² كەرەم و ئاشتی ژ بابێ مە خودێ و ژ خودان عیسایێ مەسیح ل سەر هەوە بن.

هاتنا دوویێ یا عیسای و دادكرنا دویماهیێ

³ پێدڤیە ئەم هەرگاڤ ژ پێخەمەت هەوە، گەلی خویشك و برایان، سوپاسیا خودێ بكەین. سوپاسیكرن ژی د جهێ خۆ دایە، چنكو باوەریا هەوە گەلەك وەرارێ دكەت و حەزژێكرنا هەر ئێك ژ هەوە بۆ ئێكودوو زێدە دبیت.

⁴ لەوما ئەم ب خۆ د ناڤ جڤاكێن گازیكریێن خودێ دا شانازیێ ب هەوە دبەین، ژ پێخەمەت خۆڕاگری و باوەریا هەوە د وان هەمی تەپەسەری و تەنگاڤیان دا یێن هوین خۆ ل بەر رادگرن.

⁵ ئەڤ چەندە بەلگەیە ل سەر دادكرنا خودێ یا دادپەروەرانە، داكو هوین هەژی پاشایەتیا خودێ بن، ئەوا هوین ژ بەر وێ ئازارێ ژی دكێشن.

⁶ ل نك خودێ دادپەروەریە كو تەنگاڤیێ ل وان ڤەگەڕینیت یێن هەوە تەنگاڤ دكەن،

⁷ بەرفرەهیێ ژی بدەتە هەوە، ئەوێن هوین د تەنگاڤیێ دا، هەروەسا بدەتە مە ژی، دەمێ خودان عیسا ل گەل فریشتەیێن خۆ یێن بهێز ژ ئەسمانی دیار دبیت

⁸ و ئەو د ئاگرەكێ ب گوڕی دا تۆلێ ژ وان ڤەكەت یێن خودێ نانیاسن و گوهداریا مزگینیا خودانێ مە عیسای ناكەن.

⁹ سزایێ وان دێ وێرانبوونا هەتا هەتایی بیت، دویر ژ رویێ خودانی و ژ مەزناهیا هێزا وی.

¹⁰ دەمێ ئەو دهێت دا ل وێ رۆژێ د ناڤ پیرۆزكریێن خۆ دا بهێتە مەزنكرن و ببیتە جهێ مەندەهۆشیا هەمی باوەرداران، هوین ژی دێ د ناڤ وان دا بن، چنكو هەوە باوەری ب شاهدەییا مە ئینا.

¹¹ بۆ ڤێ مەبەستێ ژی ئەم هەردەم ژ بۆ هەوە نڤێژان دكەین، كو خودایێ مە وە ل هەوە بكەت، هوین هەژی وێ گازیكرنێ بن یا وی هوین بۆ وێ گازی كرین و هەمی نیازێن هەوە یێن چاكیێ و كریارێن هەوە یێن ب باوەریێ دهێنە كرن، ب هێزا خۆ تەمام بكەت،

¹² دا ب كەرەما خودایێ مە و خودان عیسایێ مەسیح، ناڤێ خودانێ مە عیسایێ مەسیح ب هەوە بهێتە مەزنكرن و هوین ژی ب وی بهێنە مەزنكرن.