2 پەترۆس 3 - ئنجیلا پیرۆز

سۆزا هاتنا خودانی

¹ گەلی خۆشتڤیان، ئەڤە دووەمین نامەیە ئەز بۆ هەوە دنڤیسم، د وان دا ئەز ب رێكا بیرئینانێ، هزرێن هەوە یێن پاقژ هشیار دكەم،

² دا بیرا هەوە بهێتە پەیڤێن پێغەمبەرێن پیرۆز و فەرمانێن خودان و قورتالكەری یێن هنارتیێن هەوە هوین پێ ئاگەهدار كرین.

³ بەری هەر تشتەكی ڤێ چەندێ بزانن: د رۆژێن دویماهی دا، دێ هندەك تڕانەكەرێن چڤێل دەركەڤن، یێن كو ل دویڤ ئارەزوویێن خۆ یێن خراب بڕێڤە دچن.

⁴ دێ بێژن: «كا سۆزا هاتنا وی؟ چنكو ژ دەمێ نڤستنا بابكالان، هەمی تشت ژ دەستپێكا ئافراندنێ وەرە وەكو خۆ ماینە.»

⁵ ئەو ب مەبەست ڤێ راستیێ ب پشت گو‍‌ھ ڤە دهاڤێژن كو ب پەیڤا خودێ هەر ژ كەڤن دا ئەسمان هەبوون و ئەرد ژی ژ ئاڤێ و د ئاڤێ را چێبوویە.

⁶ ب وان ژی، ئاڤ ل سەر جیهانا بەرێ رابوو و ئەو ژ ناڤ چوو.

⁷ لێ ئەرد و ئەسمانێن نوكە هەین، ب هەمان پەیڤێ بۆ ئاگری د هەلگرتینە، تا رۆژا دادكرن و ژناڤبرنا بەدكاران دهێنە هێلان.

⁸ لێ بلا ئەڤ تشتە ژ بیرا هەوە نەچیت، گەلی خۆشتڤیان: ل نك خودانی رۆژەك وەكو هزار ساڵانە و هزار ساڵ ژی وەكو رۆژەكێنە.

⁹ خودان بجهئینانا سۆزا خۆ گیرۆ ناكەت، هەروەكو هندەك كەس ب گیرۆبوون دزانن، لێ ئەو بێهنا خۆ ل هەوە فرە‍‌ھ دكەت، چنكو وی نەڤێت كەس ژ ناڤ بچیت، لێ بەرێ هەمیان بكەڤیتە لخۆزڤڕینێ.

¹⁰ لێ رۆژا خودانی دێ وەكو دزەكی هێت، كو تێدا ئەسمان دێ ب گورمێنەكا مەزن ژ ناڤ چیت و توخم ب سۆتنێ دێ حەلیێن و ئەرد و هەمی كارێن تێدا هاتینە كرن، نامینن.

^11-12 ئەڤجا، مادەم ئەڤ تشتە هەمی دێ ب ڤی شێوەی حەلیێن، ئێدی پێدڤیە هوین چ جۆرە مرۆڤ بن؟ ل ڤی دەمێ كو هوین ل چاڤەڕێیا رۆژا خودێنە و لەزێ ل هاتنا وێ دكەن، پێدڤیە هوین ب پیرۆزی و خودێترسی بژین. د وێ رۆژێ دا ئەسمان دێ ب ئاگری ژ ناڤ چن و توخم دێ ب سۆتنێ حەلیێن.

¹³ لێ ئەم ل گۆر سۆزا وی، چاڤەڕێی ئەسمانێن نوی و ئەردەكێ نوی دكەین، كو راستداری تێدا یا خۆجهە.

¹⁴ لەوما گەلی خۆشتڤیان، مادەم كو هوین ل چاڤەڕێی ڤان تشتانە، بزاڤێ بكەن كو ئەو هەوە هۆسا ببینیت، هوین یێن د ئاشتیێ دا د بێكێماسینە و گازندە ل سەر هەوە نینن.

¹⁵ بهژمێرن كو بێهنفرەهیا خودانێ مە دەرفەتەكە بۆ قورتالبوونێ، كا چەوا برایێ مە یێ خۆشتڤی پاولۆسی ژی ل دویڤ وێ ئاقلمەندیا بۆ وی هاتیە دان بۆ هەوە نڤیسی،

¹⁶ هەروەكو د هەمی نامەیێن خۆ دا، بەحسێ ڤان تشتان دكەت. د وان دا هندەك تشتێن ب زەحمەت بۆ تێگەهشتنێ یێن هەین كو مرۆڤێن نەزان و لقلقۆك شاش شڕۆڤە دكەن، هەروەكو نڤیسارێن پیرۆز یێن دی شاش شڕۆڤە دكەن، ب ڤێ چەندێ ژی ئەو ژناڤچوونێ ب سەرێ خۆ دا دئینن.

¹⁷ لەوما گەلی خۆشتڤیان، مادەم هوین پێشوەخت هاتینە ئاگەهداركرن، د هشیار بن نەكو ب شاشیا بەدكاران بهێنە خڕاندن و خۆڕاگریا خۆ ژ دەست بدەن.

¹⁸ لێ د كەرەم و نیاسینا خودان و قورتالكەرێ مە عیسایێ مەسیح دا وەرارێ بكەن. مەزناهی بۆ وی بیت، نوكە و هەتا هەتایێ. ئامین.