2 كورنتۆس 9 - ئنجیلا پیرۆز

هاریكاریا باوەردارێن بەلەنگاز

¹ پێدڤی ناكەت ئەز بۆ هەوە سەبارەت خزمەتا هاریكاریكرنا پیرۆزكریان بنڤیسم،

² چنكو ئەز حەزا دلێ هەوە بۆ هاریكاریكرنێ دزانم، ل نك مەقدۆنیان ئەز شانازیێ پێ دبەم و دبێژمە وان كو هەرێما ئەخایایێ ژ پار وەرە یا ئامادەیە. دلگەرمیا هەوە گەلەك ژ وان بۆ هاریكاریكرنێ هاندان.

³ لێ ئەز برایان دهنێرمە نك هەوە، دا ل دۆر ڤێ چەندێ شانازیا مە ب هەوە ڤاڵا دەرنەكەڤیت و دا هوین د ئامادە بن، هەروەكو من گۆتی.

⁴ چنكو ئەگەر هندەك مەقدۆنی ل گەل من بهێن و ببینن هوین نە د ئامادەنە، ئەم دێ شەرمزار بین، ژ بەر كو ئەم ژ هەوە د پشتڕاست بووین. هوین ژی دێ شەرمزار بن، لێ نەهەوجەیە ئەز ڤێ بێژم.

⁵ لەوما من ب فەر دیت كو ئەز هیڤیێ ژ برایان بكەم، دا ئەو بەری من بهێنە نك هەوە و وێ بەخشینێ پێشوەخت ئامادە بكەن یا هەوە بەری نوكە سۆز پێ دای، داكو ئەو وەسا یا ئامادە بیت، هەروەكو ئەو بەخشینەكا مەردانە بیت، نە ژ نەچاری بیت.

⁶ ڤێ چەندێ ژی بزانن: یێ پیچەكێ بچینیت، پیچەكێ ددوریت ژی و یێ گەلەكێ بچینیت، گەلەكێ ددوریت ژی.

⁷ بلا هەر ئێك ل دویڤ بڕیارا دلێ خۆ بدەت، نە ژ بێدلی یان ژ نەچاری. چنكو خودێ حەز ژ وی دكەت، یێ ب دلخۆشی بدەت.

⁸ خودێ دشێت هەر كەرەمەكێ ب سەر هەوە دا بڕێژیت، دا هەوە د هەمی تشتان دا و ل هەمی دەمان ب تەمامی تێرا خۆ هەبیت و وەسا هوین ب هەمی كارێن باش د سەر دا بڕژن.

⁹ هەروەكو هاتیە نڤیسین: «وی ب مەردینی ل سەر هەژاران بەڵاڤ كریە، راستداریا وی هەروهەر دمینیت.»

¹⁰ ئەوێ تۆڤی بۆ تۆڤچینی و نانی بۆ خوارنێ پەیدا دكەت، دێ تۆڤی بۆ هەوە پەیدا كەت و چەند جاركی زێدە كەت و دێ وەرارێ ئێخیتە بەرهەمێ راستداریا هەوە.

¹¹ هوین دێ د هەر تشتی دا هێنە دەولەمەندكرن، دا هوین هەردەم د مەرد بن و ب رێكا مە مەردینیا هەوە سوپاسیكرنێ بۆ خودێ بەرهەم بینیت،

¹² چنكو ئەنجامدانا ڤێ خزمەتێ، نە ب تنێ هەوجەییێن پیرۆزكریان دقەتینیت، لێ ژ بەر وێ سوپاسیكرن ژی بۆ خودێ د سەر دا درێژیت.

¹³ ئەڤ خزمەتە بەلگەیە ل سەر باوەریا هەوە، ئەڤجا گەلەك مرۆڤ ژ بەر ملكەچیا هەوە بۆ دانپێدانێ ب مزگینیا مەسیحی و ژ بەر مەردینیا هەوە د هاریكاریكرنا وان و هەمی كەسێن دی دا، دێ پەسنا خودێ كەن

¹⁴ و دێ نڤێژان بۆ هەوە كەن و بیریا هەوە كەن، ژ بەر وێ كەرەما خودێ یا زێدە مەزن، ئەوا بۆ هەوە هاتیە دان.

¹⁵ سوپاس بۆ خودێ، ژ بەر دیاریا وی یا ناهێتە سالۆخدان!