2 كورنتۆس 8 - ئنجیلا پیرۆز

مەردی

¹ ئەم حەز دكەین نوكە بۆ هەوە، گەلی خویشك و برایان، وێ كەرەما خودێ بدەینە نیاسین یا بۆ جڤاكێن باوەردارێن مەقدۆنیایێ هاتیە دان.

² سەرەڕای تاقیكرنەكا دژوار ب رێكا تەنگاڤیان، شادیا وان یا زێدە و هەژاریا وان یا دژوار ب دەولەمەندیا مەردینیێ د سەر دا چوو.

³ ئەز شاهدەییێ ددەم كو وان ل دویڤ شیانێ، بەلكو ژ شیانا خۆ زێدەتر ژی، ب حەزا خۆ هاریكاری دان.

⁴ گەلەك هیڤی ژ مە كرن كو ئەم شەرەفمەندیا پشكداریێ د هاریكاریكرنا پیرۆزكریان دا بدەینە وان.

⁵ وان ژ وێ یا مە چاڤەڕێ دكر بوراند، ل بەراهیێ وان خۆ رادەستی خودانی كر و پاشی ب حەزا خودێ خۆ رادەستی مە ژی كر.

⁶ ئەڤجا مە هیڤی ژ تیتۆسی كرن، كا چەوا وی دەست ب ڤێ كەرەمێ كریە، ئەو د ناڤ هەوە دا تەمام ژی بكەت.

⁷ كا چەوا هوین د هەر تشتەكی دا د پێشكەفتینە: د باوەریێ دا، د ئاخفتنێ دا، د زانینێ دا، د هەمی دلگەرمیێ دا و د حەزژێكرنا هەوە دا بۆ مە، وەسا د ڤێ كەرەما بەخشینێ ژی دا پێش بكەڤن.

⁸ ئەز ڤێ چەندێ وەكو فەرمان نابێژم، لێ ئەز راستیا حەزژێكرنا هەوە ب هەڤبەركرنێ ل گەل دلگەرمیا كەسێن دی تاقی دكەم.

⁹ چنكو هوین كەرەما خودانێ مە عیسایێ مەسیح دزانن: كو هەر چەندە ئەو یێ دەولەمەند بوو، لێ ئەو ژ پێخەمەت هەوە بوو هەژار، دا هوین ب هەژاریا وی دەولەمەند ببن.

¹⁰ ئەز ل دۆر ڤێ چەندێ ئامۆژگاریەكێ ل هەوە دكەم: بۆ هەوە مفایە، هوین یێن هەر ژ ساڵا پار ل بەراهیێ دەست پێ كری، نە ب تنێ ب كرنێ، لێ ب حەزكرنێ ژی.

¹¹ نوكە ڤی كاری تەمام بكەن، داكو ل دویڤ شیانا هەوە، تەمامكرنا وی كاری یا هند بیت، هندی هەوە ژ دل حەز دكر وی كاری بكەن.

¹² چنكو ئەگەر دلگەرمی هەبیت، بەخشین یا پەسەندە، ل دویڤ وی تشتێ مرۆڤی هەی، نە ل دویڤ وی تشتێ مرۆڤی نەی.

¹³ مەبەست نە ئەوە كو هندەكێن دی بكەڤنە بەرفرەهیێ و هوین بكەڤنە تەنگاڤیێ، لێ بلا وەكهەڤی هەبیت.

¹⁴ د دەمێ نوكە دا زێدەییا ل بەر دەستێ هەوە بۆ هەوجەییا وان بیت، دا ل پاشەڕۆژێ زێدەییا ل بەر دەستێ وان ژی بۆ هەوجەییا هەوە بیت، هۆسا دێ وەكهەڤی هەبیت.

¹⁵ هەروەكو هاتیە نڤیسین: «یێ گەلەك كۆم كری، چ ژ وی زێدە نەبوو و یێ كێم كۆم كری، چ ژ وی كێم نەبوو.»

هنارتنا تیتۆسی بۆ كورنتۆسێ

¹⁶ سوپاس بۆ خودێ، ئەوێ هەمان دلگەرمیا من بۆ هەوە هەی، كریە د دلێ تیتۆسی دا.

¹⁷ چنكو تیتۆسی نە ب تنێ داخوازا مە قەبیل كر، لێ وی ب دلگەرمیەكا زێدەتر ڤیایە و قەستا هەوە دكەت.

¹⁸ ل گەل وی ئەم وی برای دهنێرین، یێ ژ بەر كارێ وی د مزگینیدانێ دا هەمی جڤاكێن باوەرداران پەسنا وی دكەن.

¹⁹ نە ب تنێ ئەڤ چەندە، لێ ئەو ژ لایێ جڤاكێن باوەرداران ڤە هاتیە هەلبژارتن ژی، دا هەڤالێ مە یێ رێڤنگیێ بیت، ل دەمێ ئەم ڤێ كەرەمێ هەلدگرین و دابەش دكەین ژ بۆ مەزناهیا خودانی و دا دیار ببیت كو نیازا مە هاریكاریە.

²⁰ ئەم ڤێ چەندێ دكەین دا كەس دەربارەی وێ بەخشینا مەزن یا ئەم خزمەتا وێ دكەین، گازندەیان ژ مە نەكەت.

²¹ چنكو نیازا مە ئەوە ئەم وی تشتی بكەین یێ راست، نە ب تنێ د چاڤێن خودانی دا، لێ د چاڤێن مرۆڤان ژی دا.

²² ل گەل وان هەردوویان، ئەم وی برایێ خۆ ژی دهنێرین، ئەوێ مە گەلەك جاران د گەلەك تشتان دا تاقی كری و مە دیت یێ دلگەرمە، نوكە ئەو هێشتا پتر یێ دلگەرمە، چنكو ئەو گەلەك ژ هەوە یێ پشتڕاستە.

²³ دەربارەی تیتۆسی، ئەو هەڤپشكێ منە و بۆ هەوە هەڤكارێ منە. دەربارەی هەردوو برایێن مە یێن دی ژی، ئەو هنارتیێن جڤاكێن باوەردارانە و ژ بەر وان مەسیح دهێتە مەزنكرن.

²⁴ ئەڤجا ل پێش چاڤێن جڤاكێن باوەرداران بەلگەیێ حەزژێكرنا خۆ و هۆكارێ شانازیا مە ب هەوە نیشا وان بدەن.