2 كورنتۆس 4 - ئنجیلا پیرۆز

گەنجینەیا د ئامانێن گلی دا

¹ لەوما، ژ بەر كو خودێ دلۆڤانی ل گەل مە كریە كو مە ئەڤ خزمەتە هەیە، ئەم بێ ئومێد نابین.

² مە كریارێن ڤەشارتی یێن ب شەرم ژی رەت كرن، ئەم فێلبازیێ ناكەین و دەستكاریێ د پەیڤا خودێ دا ناكەین. لێ ئەم راستیێ دیار دكەین و ب ڤی ئاوایی ل پێشیا خودێ بۆ وژدانا هەر مرۆڤەكی خۆ پەسەند دكەین.

³ لێ ئەگەر مزگینیا مە یا نخافتی ژی بیت، ژ بۆ یێن ژ ناڤ دچن یا نخافتیە.

⁴ چنكو خوداوەندێ ڤێ جیهانێ زێهنێ بێباوەران كۆرە كریە، داكو رۆناهیا مزگینیا رەونەقیا مەسیحێ كو وێنەیێ خودێیە، نەبینن.

⁵ ئەم خۆ نادەینە نیاسین، لێ ئەم عیسایێ مەسیح ددەینە نیاسین كو ئەو خودانە و ئەم ژ پێخەمەت عیسای بەنیێن هەوەینە.

⁶ چنكو ئەو خودایێ گۆتی: «بلا رۆناهی ژ تاریاتیێ شەوقێ بدەت»، ئەوە یێ د دلێ مە دا شەوق دای، دا ئەم ب رێكا وێ شەوقا ژ دێمێ عیسایێ مەسیحی دەردكەڤیت، رەونەقیا خودێ بنیاسین.

⁷ لێ ئەو گەنجینەیا مە هەی، یا د ئامانێن گلی دا، دا دیار ببیت كو هێزا هەری زێدە ژ خودێیە، نە ژ مەیە.

⁸ ئەم ژ هەمی لایان ڤە تەنگاڤ دبین، لێ ناهەڕشین. ئەم ئالۆز دبین، لێ بێ ئومێد نابین.

⁹ تەپەسەر دبین، لێ پشت بەردای نابین. ئەم دگەڤزین، لێ ژ ناڤ ناچین.

¹⁰ هەردەم مرنا عیسای د لەشێ خۆ دا هەلدگرین، دا ژیانا عیسای ژی د لەشێ مە دا بهێتە دیاركرن.

¹¹ ئەم، ئەوێن زیندی، سەخمەراتی عیسای، هەردەم رادەستی مرنێ دهێینە كرن دا ژیانا عیسای د لەشێ مە یێ مربار دا بهێتە دیاركرن.

¹² ئەڤجا مرن د مە دا كار دكەت، لێ ژیان د هەوە دا.

¹³ هەروەكو هاتیە نڤیسین: «من باوەری هەبوو، لەوما ئەز ئاخفتم،» مە هەمان گیانێ باوەریێ هەیە، ئەڤجا ئەم ژی باوەر دكەین، لەوما ئەم ژی دئاخڤین.

¹⁴ چنكو ئەم دزانین ئەوێ خودان عیسا راكری، دێ مە ژی ل گەل عیسای راكەت و ل گەل هەوە ل پێشیا خۆ ئامادە كەت.

¹⁵ ئەرێ، ئەڤ هەمی تشتە ژ پێخەمەت هەوەنە، داكو كەرەم د ناڤ گەلەكێن دی دا بەڵاڤ ببیت و ژ بۆ مەزناهیا خودێ سوپاسیكرنێ زێدەتر لێ بكەت.

¹⁶ لەوما ئەم بێ ئومێد نابین. لێ سەرەڕای كو ئەم ژ سەرڤە ژ ناڤ دچین، د ناخێ خۆ دا ئەم رۆژ بۆ رۆژێ دهێینە نویكرن.

¹⁷ چنكو تەنگاڤیێن مە یێن سڤك و دەمكی، مەزناهیەكا گران یا هەتا هەتایی بۆ مە ئامادە دكەن، كو ل گەل چ تشتان ناهێتە هەڤبەركرن.

¹⁸ ئەڤجا ئەم ل وان تشتان نانێڕین یێن دهێنە دیتن، لێ ل یێن ناهێنە دیتن. چنكو ئەوێن دهێنە دیتن د دەمكینە، لێ یێن ناهێنە دیتن د هەتا هەتایینە.