2 كورنتۆس 1 - ئنجیلا پیرۆز

سڵاڤ

¹ ژ من، پاولۆس، هنارتیێ مەسیح عیسای ب حەزا خودێ، ژ برایێ مە تیمۆتاوسی ژی، بۆ جڤاكا گازیكریێن خودێ ل كورنتۆسێ و بۆ هەمی پیرۆزكریێن ل سەرانسەری ئەخایایێ:

² كەرەم و ئاشتی ژ بابێ مە خودێ و ژ خودان عیسایێ مەسیح ل سەر هەوە بن.

د تەنگاڤیان دا خودێ مە هانددەت

³ مەزناهی بۆ خودێ، بابێ خودانێ مە عیسایێ مەسیح، بابێ دلۆڤانیێ و خودایێ هەمی هاندانێ،

⁴ ئەوێ مە د هەمی تەنگاڤیێن مە دا هانددەت، دا بشێین ب وێ هاندانێ یا ئەم ب خۆ ژ لایێ خودێ ڤە پێ دهێینە هاندان، وان كەسان هانبدەین یێن د هەر تەنگاڤیەكێ دا.

⁵ چنكو كا چەوا ئازارێن مەسیحی د ژیانا مە دا گەلەكن، هۆسا هاندانا مە ژی ب رێكا مەسیحی گەلەكە.

⁶ ئەگەر ئەم تووشی تەنگاڤیان دبین، ئەو بۆ هاندان و قورتالبوونا هەوەیە. ئەگەر ئەم دهێینە هاندان، ئەو بۆ هاندانا هەوەیە، ئەوا شیانێ ددەتە هەوە كو خۆ ل بەر وان ئازاران بگرن یێن ئەم ژی دكێشین.

⁷ دەربارەی هەوە هیڤیا مە یا موكمە، چنكو ئەم دزانین كا چەوا هوین پشكدارێن ئازارێن مەنە، وەسا هوین پشكدارێن هاندانا مەنە ژی.

⁸ مە نەڤێت، گەلی خویشك و برایان، كو هوین دەربارەی تەنگاڤیێن مە، ئەوێن ل هەرێما ئاسیایێ ب سەرێ مە هاتین، د بێ ئاگە‍‌ھ بن، بارێ مە زێدە ژ شیانا مە گران بوو، تا ئەم ژ ژیانێ ژی بێ ئومێد بووین.

⁹ ب راستی، مە هەست كر كو حوكمێ مرنێ ل سەر مە یێ هاتیە دان، لێ ئەڤ تشتە چێبوو داكو ئەم پشتگەرمێن خۆ نەبین، لێ پشتگەرمێن خودێ بین، ئەوێ مریان رادكەتەڤە.

¹⁰ ئەوێ ئەم ژ مرنەكا هندە دژوار رزگار كرین و دێ مە رزگار كەت. مە هیڤیا خۆ ب وی ڤە گرێ دایە كو ئەو دێ ب بەردەوامی مە رزگار كەت،

¹¹ هوین ژی دشێن ب نڤێژێن خۆ هاریكاریا مە بكەن، داكو ژ پێخەمەت وێ كەرەما ب رێكا نڤێژێن گەلەكان ل گەل مە هاتیە كرن، گەلەك كەس ژ بەر مە سوپاسیا خودێ بكەن.

ئەگەرێ گیرۆبوونا سەرەدانا پاولۆسی

¹² شانازیا مە ئەڤەیە: وژدانا مە شاهدەییێ ددەت كو رەفتارا مە د جیهانێ دا، ب تایبەت دەربارەی هەوە، ب سادەیی و نیازپاكیەكا خودایی بوو، نە ب ئاقلمەندیەكا مرۆڤكانی، لێ ب كەرەما خودێ بوو.

^13-14 چنكو ئەم تشتەكێ دی بۆ هەوە نانڤیسین، ژبلی وی یێ هوین بخوینن و تێبگەهن. ئەز هیڤیدارم هەروەكو هوین ب هندەكێ د مە گەهشتین، هوین ب تەمامی تێبگەهن كو ل رۆژا خودان عیسای، ئەم شانازیا هەوەینە، هەروەكو هوین ژی شانازیا مەنە.

¹⁵ ئەڤجا ب ڤێ پشتڕاستیێ نیازا من ئەو بوو كو ل بەراهیێ بهێمە نك هەوە، دا هەوە دوو جاران كەرەم وەرگرتبا.

¹⁶ من دڤیا د رێكا خۆ دا بەرەڤ مەقدۆنیایێ من سەرەدانا هەوە كربا، پاشی دەمێ ئەز ژ مەقدۆنیایێ دزڤڕیم ژی، هاتبامە نك هەوە و هەوە ئەز بەرەڤ یەهودیایێ ب رێ ئێخستبام.

¹⁷ دەمێ من ئەڤ بڕیارە دای، ما من ب سڤكی وەرگرت؟ یان ژی ئەز بڕیارێن خۆ ل دویڤ هزرا مرۆڤكانی ددەم، كو ئاخفتنا من یا شەڤ و رۆژان وەكو ئێك نەبیت، جار بێژم «بەلێ، بەلێ» و جار ژی بێژم «نە، نە»؟

¹⁸ لێ خودایێ دلسۆز شاهدە كو گۆتنا مە بۆ هەوە «بەلێ» و «نە» نەبوو.

¹⁹ كوڕێ خودێ، عیسایێ مەسیح، ئەوێ من و سیلاسی و تیمۆتاوسی د ناڤ هەوە دا دایە نیاسین، «بەلێ» و «نە» نەبوو، لێ د ئێكبوونا ل گەل وی دا ب تنێ «بەلێ» یا هەی.

²⁰ چنكو ب وی هەمی سۆزێن خودێ «بەلێ»نە، لەوما ئەم ب رێكا وی دبێژین «ئامین» بۆ مەزناهیا خودێ.

²¹ خودێیە یێ مە ل گەل هەوە د ئێكبوونا ل گەل مەسیحی دا موكم دكەت. وی ئەم زەیت كرین

²² و موهر كرین و گیانێ پیرۆز وەكو دەستبەع كرە د دلێ مە دا.

²³ ئەز خودێ ل سەر خۆ دكەمە شاهد كو دلێ من ب هەوە ڤە بوو، لەوما ئەز نەهاتمە كورنتۆسێ.

²⁴ مەبەستا من نە ئەوە كو ئەم زاڵدەستیێ ل سەر باوەریا هەوە بكەین، چنكو هوین د باوەریێ دا دموكمن، لێ ئەم هەڤكارێن دلخۆشیا هەوەینە.