1 تیمۆتاوس 4 - ئنجیلا پیرۆز

مامۆستایێن درەوین

¹ گیان ب ئاشكرایی دبێژیت، كو د دەمێن دویماهیێ دا، هندەك دێ ژ باوەریێ پاشگەز بن، دێ ب دویڤ گیانێن خاپینۆك و فێركرنێن ئەجنەیان كەڤن،

² ب رێكا دووڕویاتیا درەوینان، ئەوێن وژدانا وان هاتیە داخكرن.

³ ئەو هەڤژینیێ قەدەغە دكەن و فەرمانا خۆ دویرئێخستنێ ژ هندەك خوارنان ددەن كو خودێ یێن ئافراندین، دا ب سوپاسیكرن ڤە ژ لایێ باوەردار و راستی نیاسان ڤە بهێنە خوارن.

⁴ چنكو هەر تشتێ خودێ ئافراندی یێ باشە. پێدڤیە چ تشت نەهێتە رەتكرن، ئەگەر ب سوپاسیكرن ڤە بهێتە وەرگرتن،

⁵ ژ بەر كو پەیڤا خودێ و نڤێژ وی تشتی پیرۆز دكەن.

خزمەتكارێ باش یێ مەسیحی

⁶ ئەگەر تۆ خویشك و برایان فێری ڤان تشتان بكەی، دێ خزمەتكارەكێ باش یێ مەسیح عیسای بی، خزمەتكارەكێ پەروەردەبووی ل سەر پەیڤێن باوەریێ و فێركرنا باش یا تۆ ل دویڤ دچی.

⁷ خۆ ژ چیڤانۆكێن نەپیرۆز و چیڕۆكێن پیرەژنان بدە پاش، لێ راهێنانێ ل سەر خودێترسیێ بكە.

⁸ چنكو وەرزشا لەشی مفایێ هەی بۆ هندەك تشتان، لێ ژ خودێترسیێ مفایێ هەی بۆ هەمی تشتان، ژ بەر كو خودێترسیێ سۆز بۆ ژیانا ڤێ جیهانێ و جیهانا دی هەیە.

⁹ ئەڤ گۆتنە جهێ پشتڕاستیێیە و هەژیە ب تەمامی بهێتە قەبیلكرن.

¹⁰ ژ بۆ ڤێ چەندێ ئەم رەنجێ دكێشین و خەباتێ دكەین، چنكو مە هیڤیا خۆ ب خودایێ زیندی ڤە گرێ دایە، ئەوێ كو قورتالكەرێ هەمی مرۆڤانە، ب تایبەت یێ باوەردارانە.

¹¹ ڤان تشتان راسپێرە و فێری وان بكە.

¹² بلا كەس سڤكاتیێ ب گەنجاتیا تە نەكەت، لێ د ئاخفتنێ دا، د رەفتارێ دا، د حەزژێكرنێ دا، د باوەریێ دا، د دەهمەنپاكیێ دا بۆ باوەرداران ببە نموونە.

¹³ تا كو ئەز دهێم، خۆ بۆ خواندن و هاندان و فێركرنێ تەرخان بكە.

¹⁴ خەمساریێ نەكە د وێ بەهرەیا روحانی یا د تە دا، ئەوا ب سرۆشێ خودێ بۆ تە هاتیە دان، دەمێ جڤاتا ریهسپیان دەستێن خۆ داناینە سەر تە.

¹⁵ خەمێ ژ وان تشتان بخۆ و ل سەر بمینە، دا پێشكەفتنا تە بۆ هەمی كەسان یا دیار بیت.

¹⁶ چاڤێ تە ل تە و فێركرنا تە بیت و ل سەر بەردەوام ببە، چنكو ئەگەر تۆ وە بكەی، دێ خۆ و ئەوێن تە دبهیسن ژی قورتال كەی.