1 یوحەننا 4 - ئنجیلا پیرۆز

تاقیكرنا گیانێ مرۆڤان

¹ گەلی خۆشتڤیان، باوەر ژ هەر گیانەكی نەكەن، لێ گیانان تاقی بكەن، كا ئەو ژ خودێنە یان نە، چنكو گەلەك پێغەمبەرێن درەوین یێن دەركەفتینە جیهانێ.

² هوین ب ڤێ چەندێ دێ گیانێ خودێ نیاسن: هەر گیانەكێ دانپێدانێ بكەت كو عیسایێ مەسیح ب لەشی یێ هاتی، ئەو گیان ژ خودێیە،

³ لێ هەر گیانەكێ دانپێدانێ نەكەت كو عیسایێ مەسیح ب لەشی یێ هاتی، ئەو گیان نە ژ خودێیە. ئەو گیانێ دژەمەسیحیە، ئەو گیانێ هەوە بهیستی كو دێ هێت و نوكە ئەو د جیهانێ دایە.

⁴ هوین ژ خودێنە گەلی زاڕۆكان و هوین ل سەر پێغەمبەرێن درەوین ب سەركەفتن، چنكو گیانێ پیرۆز یێ د هەوە دا مەزنترە ژ گیانێ ئبلیسی یێ د جیهانێ دا.

⁵ ئەو ژ جیهانێنە، لەوما ل دویڤ دیتنا جیهانێ دئاخڤن و جیهان گوهێ خۆ ددەتێ.

⁶ ئەم ژ خودێینە. ئەوێ خودێ دنیاسیت گوهێ خۆ ددەتە مە و ئەوێ نە ژ خودێیە، گوهێ خۆ نادەتە مە. ژ بەر وێ چەندێ ئەم گیانێ راستیێ و گیانێ شاشیێ ژ ئێك جودا دكەین.

خودێ حەزژێكرنە

⁷ گەلی خۆشتڤیان، بلا ئەم حەز ژ ئێكودوو بكەین، چنكو حەزژێكرن ژ خودێیە. هەر كەسێ حەزژێكرنێ دكەت، ئەو یێ ژ خودێ بووی و خودێ دنیاسیت.

⁸ ئەوێ حەزژێكرنێ ناكەت، خودێ نانیاسیت، چنكو خودێ حەزژێكرنە.

⁹ هۆسا حەزژێكرنا خودێ د ناڤ مە دا دیار بوو: خودێ كوڕێ خۆ یێ ئێكانە هنارتە جیهانێ، داكو ئەم ب وی بژین.

¹⁰ حەزژێكرن ئەڤەیە: نە كو مە حەز ژ خودێ كریە، لێ وی حەز ژ مە كر و كوڕێ خۆ هنارت دا ببیتە كەفارەتا گونەهێن مە.

¹¹ گەلی خۆشتڤیان، مادەم خودێ هۆسا حەز ژ مە كر، پێدڤیە ئەم ژی حەز ژ ئێكودوو بكەین.

¹² چ جاران كەسێ خودێ نەدیتیە. ئەگەر ئەم حەز ژ ئێكودوو بكەین، خودێ د ناڤ مە دا بنەج‍‌ھ دبیت و حەزژێكرنا وی د مە دا كامل دبیت.

¹³ ئەم ب ڤێ چەندێ دزانین كو ئەم د ناڤ خودێ دا د بنەجهین و خودێ ژی د ناڤ مە دا یێ بنەجهە، چنكو وی ژ گیانێ خۆ دایە مە.

¹⁴ مە دیتیە و ئەم شاهدەییێ ددەین كو بابی كوڕێ خۆ هنارت دا ببیتە قورتالكەرێ جیهانێ.

¹⁵ ئەوێ دانپێدانێ دكەت كو عیسا كوڕێ خودێیە، خودێ د ناڤ وی دا یێ بنەجهە و ئەو ژی د ناڤ خودێ دا.

¹⁶ ئەڤجا ئەم وێ حەزژێكرنا خودێ بۆ مە هەی دزانین و باوەر ژێ دكەین. خودێ حەزژێكرنە. ئەوێ د ناڤ حەزژێكرنێ دا بنەج‍‌ھ دبیت، د ناڤ خودێ دا یێ بنەجهە و خودێ د ناڤ وی دا.

¹⁷ ب وێ چەندێ حەزژێكرن د ناڤ مە دا دهێتە كاملكرن، دا د رۆژا دادكرنێ دا دپشتڕاست بین، چنكو مەسیح یێ چەوایە، ئەم ژی ل ڤێ جیهانێ د وەساینە.

¹⁸ د حەزژێكرنێ دا ترس نینە، لێ حەزژێكرنا كامل ترسێ ژ دلی دەردئێخیت، چنكو ترس گرێدای سزایە. ئەوێ دترسیت، ئەو د حەزژێكرنێ دا كامل نەبوویە.

¹⁹ ئەم حەزژێكرنێ دكەین، چنكو ل بەراهیێ وی حەز ژ مە كر.

²⁰ ئەگەر ئێك ببێژیت: «ئەز حەز ژ خودێ دكەم» و كەربێن وی ژ خویشك یان برایێ وی ڤەببن، ئەو یێ درەوینە. چنكو ئەو كەسێ حەز ژ خویشك یان برایێ خۆ نەكەت یێ كو دبینیت، ئەو نەشێت حەز ژ خودێ بكەت یێ كو نابینیت.

²¹ مە ئەڤ فەرمانە ژ وی وەرگرتیە: ئەوێ حەز ژ خودێ دكەت، پێدڤیە حەز ژ خویشك و برایێن خۆ ژی بكەت.