1 كورنتۆس 2 - ئنجیلا پیرۆز

راگەهاندن دەربارەی مەسیحێ خاچدای

¹ ئەز ژی، گەلی خویشك و برایان، دەمێ هاتیمە نك هەوە و نهێنیا خودێ بۆ هەوە رادگەهاند، من ب رەهوانیا ئاخفتنێ یان ئاقلمەندیێ نەدكر.

² چنكو من بڕیار دا، دەمێ ئەز د ناڤ هەوە دا، فێركرنێ ل دۆر تشتەكێ دی نەكەم، ژبلی عیسایێ مەسیح، ئەو ژی ب خاچدایی.

³ ل نك هەوە، ئەز یێ لاواز و د ترس و لەرزەكا مەزن دا بووم،

⁴ ئاخفتن و مزگینیدانا من نە ب ئاخفتنێن ئاقلمەندیا مرۆڤكانی یێن قاییلكەر بوو، لێ ب نیشانێن هێزا گیانێ پیرۆز بوو،

⁵ دا باوەریا هەوە نە ل سەر ئاقلمەندیا مرۆڤان یا ئاڤاكری بیت، لێ ل سەر هێزا خودێ بیت.

ئاقلمەندیا راستەقینە ژ گیانێ پیرۆزە

⁶ لێ د ناڤ یێن پێگەهشتی دا، ئەم ئاقلمەندیێ دبێژین، هەر چەندە ئەڤ ئاقلمەندیە نە یا ڤێ جیهانێیە، نە ژی یا سەرۆكێن ڤێ جیهانێیە، ئەو سەرۆكێن ژ ناڤ دچن.

⁷ لێ یا خودێیە ئەو ئاقلمەندیا نهێنی و ڤەشارتی یا ئەم دبێژین، ئەوا خودێ بەری دەستپێكا ئافراندنێ ژ بۆ مەزناهیا مە دەستنیشانكری،

⁸ ئەوا چ سەرۆكێن ڤێ جیهانێ تێنەگەهشتین، چنكو ئەگەر ئەو تێگەهشتبان، ئەوان خودانێ مەزناهیێ خاچ نەددا.

⁹ لێ هەروەكو هاتیە نڤیسین: «ئەو تشتێن چ چاڤان نەدیتین و چ گوهان نەبهیستین و نەهاتینە سەر هزرا چ مرۆڤان، ئەوێن خودێ ژ بۆ حەزژێكەرێن خۆ ئامادە كرین…»

¹⁰ بۆ مە خودێ ب گیانێ خۆ ئەو دیار كرن. چنكو گیان لێگەڕیانێ و ڤەكۆلینێ بۆ هەمی تشتان دكەت، خۆ كویراتیا ناخێ خودێ ژی.

¹¹ ما كی تشتێن مرۆڤی دزانیت، ژبلی گیانێ مرۆڤی، ئەوێ د مرۆڤی دا؟ هۆسا ژی تشتێن خودێ كەس نزانیت، ژبلی گیانێ خودێ.

¹² ئەڤجا مە نە گیانێ جیهانێ، لێ گیانێ كو ژ خودێ دهێت، یێ وەرگرتی، دا وان تشتان بزانین یێن خودێ ژ كەرەما خۆ داینە مە.

¹³ ئەم وان تشتان ژی دبێژین، نە ب پەیڤێن كو ئەم ژ ئاقلمەندیەكا مرۆڤكانی فێر بووین، لێ ب پەیڤێن كو ئەم ژ گیانێ پیرۆز فێر بووین، هۆسا ئەم تشتێن روحانی بۆ كەسێن روحانی شڕۆڤە دكەین.

¹⁴ لێ مرۆڤێ سرۆشتی، تشتێن گیانێ خودێ قەبیل ناكەت، چنكو ئەو تشت بۆ وی بێئاقلینە و نەشێت تێبگەهیت، ژ بەر كو ب رێكا روحانی دهێنە هەلسەنگاندن.

¹⁵ مرۆڤێ روحانی هەمی تشتان دهەلسەنگینیت و ئەو ژ لایێ كەسێ ڤە ناهێتە هەلسەنگاندن.

¹⁶ هەروەكو هاتیە نڤیسین: «ما كێ هزرێن خودانی زانینە، دا ئەو خودانی فێر بكەت؟» لێ مە هزرێن مەسیحی یێن هەین.