1 كورنتۆس 16 - ئنجیلا پیرۆز

هاریكاری بۆ باوەردارێن ل ئورشەلیمێ

¹ نوكە ژی دەربارەی كۆمكرنا هاریكاریێ بۆ پیرۆزكریان، كا من چەوا جڤاكێن باوەرداران ل گالاتیایێ راسپاردن، هوین ژی وە بكەن.

² ل رۆژا ئێكێ ژ هەر حەفتیەكێ، بلا هەر ئێك ژ هەوە ل دویڤ داهاتێ خۆ هندەك پارەی دانیتە لایەكی و ل نك خۆ هەلگریت، نەكو دەمێ ئەز بهێمە نك هەوە ژ نوی كۆم كەن.

³ دەمێ ئەز بهێم، دێ ئەو كەسێن هوین پەسەند دكەن، ل گەل نامەیان هنێرم، دا هاریكاریا هەوە بگەهیننە ئورشەلیمێ.

⁴ ئەگەر یا گونجای بیت كو ئەز ژی بچم، ئەڤە ئەو دێ ل گەل من هێن.

نەخشەیێ سەرەدانێن پاولۆسی بۆ كورنتۆسیان

⁵ دەمێ ئەز د مەقدۆنیایێ را دەرباز ببم، ئەز دێ هێمە نك هەوە، چنكو ئەز دێ د مەقدۆنیایێ را دەرباز بم.

⁶ بەلكو ئەز ل نك هەوە بمینم یان زڤستانێ ژی ل نك هەوە دەرباز بكەم، دا من ب رێ بئێخنە هەر جهەكێ كو ئەز بچمێ.

⁷ من نەڤێت نوكە سەرپێ هەوە ببینم، ئەز هیڤی دكەم دەمەكێ درێژتر ل نك هەوە بمینم، ئەگەر خودان دەستویریێ بدەت.

⁸ لێ تا جەژنا رۆژا پێنجیێ ئەز دێ ل ئەفەسۆسێ مینم.

⁹ چنكو دەرگەهەكێ فرە‍‌ھ بۆ كارەكێ ب بەرهەم بۆ من ڤەبوویە و گەلەك بەرهنگار ژی یێن هەین.

¹⁰ ئەگەر تیمۆتاوس هات، وە بكەن كو ئەو ل نك هەوە یێ بێ ترس بیت، چنكو ئەو ژی وەكو من كارێ خودانی دكەت.

¹¹ ئەڤجا بلا كەس سڤكاتیێ پێ نەكەت، لێ ب سلامەتی ب رێ بئێخن دا بهێتە نك من، چنكو ئەز ل گەل برایان چاڤەڕێی ویمە.

¹² سەبارەت برایێ مە ئەپولۆسی ژی، من گەلەك داخواز ژێ كر كو ل گەل برایان بهێتە نك هەوە، لێ ئەو ب ئێكجاری رازی نەبوو نوكە بهێت. ئەو دێ هێت، دەمێ وی دەرفەت هەبیت.

راسپاردە و سڵاڤێن دویماهیێ

¹³ بمیننە هشیار، د باوەریێ دا د خۆڕاگر بن، د مێر بن و د هێزدار بن.

¹⁴ بلا هەمی كریارێن هەوە ب حەزژێكرنێ بهێنە كرن.

¹⁵ هوین دزانن كو مالا ستیفاناسی خێڤەیێ هەرێما ئەخایایێیە، ئەوان خۆ بۆ خزمەتكرنا پیرۆزكریان تەرخان كریە، ئەڤجا ئەز داخوازێ ژ هەوە دكەم، گەلی خویشك و برایان،

¹⁶ كو هوین ملكەچی كەسێن وەسا بن و هەر ئێكێ د ڤی كاری دا پشكداریێ دكەت و تێدا دوەستیێت.

¹⁷ ئەز ب هاتنا ستیفاناس، فۆرتوناتۆس و ئاخایكۆسی دلخۆش بووم، چنكو وان جهێ هەوە یێ ڤاڵا تژی كر.

¹⁸ ئەوان گیانێ من گەش كر و یێ هەوە ژی، ئەڤجا رێزێ ل یێن هۆسا بگرن.

¹⁹ جڤاكێن باوەردارێن هەرێما ئاسیایێ سڵاڤان ل هەوە دكەن. هەروەسا ئەكیلا و پریسكیلا ل گەل جڤاكا باوەرداران یا ل مالا وان كۆم دبیت، ب ناڤێ خودانی گەلەك سڵاڤان ل هەوە دكەن.

²⁰ هەمی خویشك و برا سڵاڤان ل هەوە دكەن. ب ماچەكا پیرۆز ژ لایێ من ڤە سڵاڤان ل ئێكودوو بكەن.

²¹ ئەز، پاولۆس، ڤێ سڵاڤێ ب دەستێ خۆ دنڤیسم.

²² ئەگەر ئێك حەز ژ خودانی نەكەت، نفرین ل وی بن. ماراناتا!

²³ كەرەما خودان عیسای ل سەر هەوە بیت.

²⁴ حەزژێكرنا من، ژ دەولەتسەرێ مەسیح عیسای، ل گەل هەوە هەمیان بیت. ئامین.