- तीतुस 3 - Bundeli Holy Bible

¹ मान्सन हां चिताओ, कि हाकम और मालकन की कई करौ, और उन की कई मानो, और कोनऊ भलो काम होबै तो ऊहां मन से करौ।

² कोई की बुराई न करो; और झनझट न करो; परन्त सूदे रओ और सबरे मान्सन के संग्गै नरमाई से चलो।

³ कायसे हम पेंला, मूरख और परमेसुर की अग्या न मानबेवाले, और दुबधा में हते, और भांत भांत की चाहना करत हते, और मजा मौज चाहत हते और अदावट धरें हते, और दूसरन को बुरओ सोचत हते, और बहुत घिना हते और दूसरन से बैर मानें हते।

⁴ परन्त जब हमाए पिरभु यीशु मसीह ने किरपा करके हम से प्रेम करो।

⁵ सो उन ने हमाओ तरन तारन करो: जौन हमाए घरम के क रमन से नईं, जौन हम ने करे, परन्त उन की दया से भओ, जीसे हम हां नओ जीवन पवित्तर आत्मा के नये बनाबे से मिलो।

⁶ जो जीवन उन ने हमाए तरन तारन करबेवारे पिरभु यीशु मसीह में होकें खुल के दओ।

⁷ जीसे हम उनकी किरपा सें धरमी भए, और मरे के पाछें जीवन के हक्कदार भए।

⁸ जे बातें सांची आंय, और मोरी जा चाहना आय, कि तें इन बातन हां खुल के बताए कि जीने परमेसुर पै बिसवास धरो आय, बे भले कामन में लगे रैबें, कायसे जे बातें बढ़िया और मान्सन के भले की आंय।

⁹ सो ओछे बतकाव से, और पुस्तन के किस्सा से, अदावट और उन झनझटन से न्यारे रओ; कायसे इन से कछु बनत नईंयां।

¹⁰ कोई पाखण्डी होबै तो ऊहां समझा के ऊसे दूर रओ।

¹¹ जौ समझो कि ऐसो मान्स सांची गैल से भटक गओ आय, और अपने आप हां पापी जान के पाप करबे में लगो रैत आय।

¹² जब मैं तोय अरतिमास या तुखिकुस हां पठैओं, तो तें मोरे ऐंगर नीकुपुलिस हां अईयो; कायसे मैंने उतईं जाड़े के दिना काटबे की सोची आय।

¹³ जेनास व्यवस्था करबेवारो और अप्पुल्लोस हां जतन से आगे पठै दईये, और जौ ध्यान धरिये कि उन हां कछु बस्त की घटी न होबै।

¹⁴ हमाए जनें हां सोई जौन बस्त चाने होबै ऊहां दैबे में पाछें न रैबें।

¹⁵ मोरे सबरे संग्गी भईयन हां तोहां नमस्कार पोंचे, और जौन हम में मिल गए आंय, उन हां सोई नमस्कार कईयो। तुम सबरन पै परमेसुर की किरपा बनी रैबे।