- तीतुस 2 - Bundeli Holy Bible

¹ तें साफ साफ कहें गए, जौन साजी बातें आंय।

² सियाने जनें समझदार रएं, और उनको धरो भओ बिसवास प्रेम और सैबे कौ मन होबै।

³ ऐसई सियानी बईयरन की चाल साजी होबै, बे नसा न करें और दूसरन पै दोस न लगाबें; परन्त साजी बातें सिखाबें।

⁴ कि बे हल्की बईयरन हां कैबें, कि अपने मुन्स और लरका बारन से प्रेम राखो।

⁵ बे साजी, पतिविरता, घर को काम काज करबेवारी, साजी और अपने मुन्स की कई करबेवारी होबें, कि परमेसुर के बचन हां दूसरे जनें बुरओ न कैबें।

⁶ ऐसई जुआन मान्सन हां सोई समझाओ, कि ठीक ठाक रैबें।

⁷ सबरे काम ऐसे करौ कि मान्स बड़वाई करें; तुमाई बातें खरी और बजनदार होबें।

⁸ तुमाई बातें खरी होबें, कि कोई उन हां बुरओ न कहबे; कि हमाए विरोधियन हां कोऊ ऐसो मौका न मिलै, और बे लजा जाबें।

⁹ चाकरन हां समझाओ, कि अपने मालक की कई करें, और अपने काम से उन हां खुस राखें, और कभऊं उन हां पलट के जुआब न दैबें।

¹⁰ चोरी भड़याई न करें; परन्त सबरी बातन में सांचे बिसवास करबेवारे बनें, इन सबरी बातन हां मानबे से हमाए तरन तारन करबेवारे परमेसुर के बचन हां और उजागर करें।

¹¹ कायसे हम हां पता पड़ गओ आय, कि परमेसुर की किरपा से मान्सन को तरन तारन भओ आय।

¹² बे हम हां चितात आंय, कि हम अधरम और संसार की लुभाबेवारी बातन से चित्त फेर के ई जुग में अपने हां बस में राख के धरम करम से चलबें।

¹³ और जौन आस हम लगाए आंय कि महाबली परमेसुर और पिरभु यीशु मसीह जिन ने हमाओ तरन तारन करो आय, उनकी फिन के आबे की गैल तकें रैबें।

¹⁴ उन ने अपने आप अपनो बलदान करो, कि हम हां सबरे पापन से दूर करबें, और हम हां साजो कर के ऐसे बनाबें जौन धरम के काज में लगे होबें।

¹⁵ तें पूरे हक्क से इन बातन हां समझा, और सिखा दे कि कोई तोपे उंगरिया न उठा पाबै।