- तीतुस 1 - Bundeli Holy Bible

¹ पौलुस ने लिखी जा चिठिया जौन परमेसुर को चाकर और यीशु मसीह कौ प्रेरित आय, जीहां परमेसुर नबेरे जनन के बिसवास, और जीने सांची बातन हां चीनो आय।

² अनन्‍तकाल लौ जीयत रैबे की आस से करी, जीके लाने परमेसुर ने कई जौन लाबरी नईं कैत।

³ और ऐन बेरा पै अपने परचार से उजागर करी, जौन हमाए तरन तारन करबेवारे परमेसुर की मरजी से दई गई।

⁴ जा चिठिया तीतुस हां लिखी जौन धरम से मोरो लड़का आय; तुम हमाए परमेसुर पिता जौन हमाओ तरन तारन करबेवारे आंय, तुम सबरे जनन पै दया और सान्ति बनी रैबे।

⁵ मैं ई काजें तोहां क्रेते में छोड़ आओ हतो, कि तें जौन बातें बचीं आंय उन हां ठीक ठाक करे, और जैसी मैंने कई हती कि हरएक जांगा पै प्राचीनन हां काम पै लगाए।

⁶ प्राचीन बिन खोट एकई बईयर राखबेवारो होबै, और उनके बाल बच्चा पिरभु पै बिसवास करबेवारे होबें, और ऊ धनी न होबे परन्त कई करबेवारे होबै।

⁷ कायसे मुखिया हां परमेसुर के काम करने आंय; बो बिनखोट, हटी और खुन्सयाबेवारो, न पीबेवारो और न मारपीट करबेवारो और घूस लैबेवारो न होबै।

⁸ बो पहुनाई करबेवारो, और दूसरन कौ भलो करबेवारो, अपने बस में रैबेवारो, न्याय करबेवारो, पवित्तर और अपनी इन्द्रियन हां बस में रखबेवारो होबै।

⁹ और जौन धरम की बातें उन ने सुनी आंय, उन हां मानबेवारो होबै और खरी बातन कौ परचार करे, और बहस करबेवारन हां ऐसो जवाब दैबे कि विवादियन कौ मुंह बंद हो जाबै।

¹⁰ कायसे बिलात जनें बिरोध करत आंय, लबरा और धोका देत आंय; जे बे आंय जिनको खतना हो गओ आय।

¹¹ उनकौ मों बन्द करो चईये, जे औरें पईसा ऐंठबे हां बुरई बातें बताके घर के घर बिगाड़त आंय।

¹² उनईं में के एक जनें ने जौन उनको आगमवकता आय, ऐसो कैत आय, क्रेते के जनें पेंला से लाबरी कैत आंय, और पशुअन जैसे बिलात खैबेवारे और आलसी जनें आंय।

¹³ जा बात तो सांची आय, सो उन हां कर्रे के समझा दईये, कि बिसवास में पक्के बनो।

¹⁴ और यहूदियन की कथा कहानियन और मान्सन की कई न करें, जे तो सांची बातन हां छोड़के बिलुर गए आंय।

¹⁵ साजे मान्सन के लाने सब साजो आय, और बुरय और बिसवास न करबेवारन हां कछु साजो नईंयां; कायसे उनकी समझ और उनको हिया साजो नईंयां।

¹⁶ बे कैत तो आंय, कि परमेसुर हां चीनत आंय, परन्त ऐसे काम करत आंय मानो उन हां नईं चीनत, कायसे बे घिना आंय और कई नईं करत; और उन पै कछु साजो करत नईं बनत।