- रोमियों 9 - Bundeli Holy Bible

¹ मैं मसीह में सांची कैत आंव, लबरी नईं कै रओ और मोरो सोच सोई पवित्तर आत्मा में गवाई देत आय।

² कि मोय बड़ो दुख आय, और मोरो हिया हमेसा दुखत रैत आय।

³ कायसे मैं इते लौ चाहत हतो, कि अपने नाते रिस्तेदारन के लाने जो मोरे वंस कुल के आंय, आपई मसीह से श्रापित हो जात।

⁴ बे इस्राएली आंय; और लरका बाल बच्चन को अधकार और मईमा, कौल करार और नेम व्यवस्था और उपासना और कौल सपथ उनईं की आंय।

⁵ पुरखा सोई उन में से आंय, और मसीह सोई आदम रूप में उन में से भओ, सब के ऊ परै परम परमेसुर जुग जुग धन्न होबै। आमीन।

⁶ पर जौ नईं, कि परमेसुर कौ बचन टल गओ, ई लाने कि जौन इस्राएल के वंसवारे आंय, बे सबरे इस्राएली नईंयां।

⁷ और न इब्राहीम के वंसवारे होबे के काजें सबरे ऊके लरका बिटिया ठैरे, परन्त (लिखो आय) इसहाक से तोरो वंस कुल कहा है।

⁸ जाने कि देयां के लरका बाले परमेसुर के लरका बाले नईं, परन्त कौल करार के लरका बाले वंस गिने जात आंय।

⁹ कायसे कौल करार की बात जा आय, मैं अपनी बेरा में आहों, और सारा के पूत हुईये।

¹⁰ और अकेले जौ नईं, परन्त जब रिबका सोई हमाए पिता इसहाक से गरभ से भई।

¹¹ और अब लौ न तो लरका जन्मे हते, और न उन ने कछु भलो या बुरओ करो हतो ऊ ने कओ, जेठो लरका लौरे कौ चाकर हुईये।

¹² ई लाने कि परमेसुर की जौन मन्सा ऊके नबेर लेबे अनसार आय, करमों के काजें नईं, परन्त बुलाबेवारे पे बनी रैबै।

¹³ जैसो लिखो आय, मैंने याकूब से प्रेम करो, परन्त एसाव हों दूर धरो।

¹⁴ ई लाने हम का कैबें? का परमेसुर के इते अन्याय आय? कभऊं नईं।

¹⁵ कायसे बो मूसा से कैत आय, मैं जौन कोऊ पे दया करो चाहों, ऊपै दया कर हों, और जौन पे किरपा करो चाहों ओई पे किरपा कर हों।

¹⁶ सो जा न तो चाहबेवारे की, न दौड़बेवारे की परन्त दया करबेवारे परमेसुर की बात आय।

¹⁷ कायसे पवित्तर धरम पोथी में फिरौन राजा से कओ गओ, कि मैंने तोहां ई लाने ठाड़ो करो आय, कि तोय में अपनो बल ब जोर दिखाओं, और मोरे नाओं कौ परचार सबरे संसार में होबै।

¹⁸ ई लाने बो जौन पे चाहत आय, ऊ पे दया करत आय; और जीहां चाहत आय, उए कड़ो बना देत आय।

¹⁹ सो तें मोसे कै है, बो फिन काय लांछन लगात आय? को ऊ की मन्सा कौ विरोद करत आय?

²⁰ हे मान्स, भला तें को आय, जो परमेसुर कौ सामना करत आय? का बनाई भई बस्त बनाबेवारे से कै सकत आय कि तेंने मोय ऐसो काय बनाओ?

²¹ का कुम्हार हां माटी के लौंदा पे अधकार नईंयां, कि एकई लौंदे में से, एक बासन आदर के लाने, और दूसरे बासन हां अनादर के लाने बनाबे? तो ईमें कौन सी अचम्भे की बात आय?

²² कि परमेसुर ने अपनो न्याव दिखाबे और अपनो बल उजागर करबे की मन्सा से न्याव के बासनों की जौन मिटाए जाबे के लाने तईयार करे गए हते बड़े धीरज से सई।

²³ और दया के बासनों पे जिन हां ऊ ने मईमा के लाने पेंला से तईयार करे हते, अपनी मईमा के धन हां उजागर करबे की मन्सा करी?

²⁴ जाने कि हम पे जिन हां ऊ ने अकेले यहूदियन में से नईं, पर दूसरी जातन में से सोई बुलाओ।

²⁵ जैसो बो होशे की पोथी में सोई कैत आय, जौन मोरी प्रजा न हती, उन हां मैं अपनी प्रजा कै हों, और जौन प्यारी न हती, ऊहां प्यारी कै हों।

²⁶ और ऐसो हुईये कि जौन जांगा में उनसे जौ कओ गओ हतो, कि तुम मोरी प्रजा नईं आव, ओई जांगा बे जीयत परमेसुर की सन्तान कहा हैं।

²⁷ और यशायाह अगमवकता इस्राएलियन के लाने जोर देके कैत आय, चाए इस्राएल के सन्तानों की गिनती समुन्दर की बालू के किनको के बिरोबर होबे, पर उन में से तनकई बच हैं।

²⁸ कायसे पिरभु धरती पे अपनो कओ पूरो कर के, अपने धरम से उए पक्को कर है।

²⁹ जैसो यशायाह ने पेंला सोई कओ हतो, जदि सेनाओं कौ पिरभु हमाए लाने कछु वंस न छोड़तो, तो हम सदोम के समान और अमोरा की घाईं मिट गए होते।

³⁰ सो हम का कैबें? कि दूसरी जातवारन ने जौन धार्मिकता की खोज नईं करत हते, धार्मिकता पाई, जाने कि बो धार्मिकता जौन बिसवास से आय।

³¹ परन्त इस्राएली; जौन धर्म की नैम व्यवस्था हां खोजत हते, ऊ नेम व्यवस्था लौ नईं पोंचे।

³² की लाने? ई लाने कि बे बिसवास से नईं, परन्त जानो कि बे कर्मो से ऊहां खोजत हते: उन ने ऊ ने ऊपर कड़े पत्थरा पे उपटा खाओ।

³³ जैसो लेख आय; तको मैं सिय्यौन में एक ठेस लगबे कौ पत्थरा, और ठोकर खाबे की एक टोर धरत आंव; और जौन ऊ पे बिसवास कर है, बो न लजा है।