- रोमियों 5 - Bundeli Holy Bible

¹ सो जब हम बिसवास में धर्मी ठैरे, तो अपने पिरभु यीशु मसीह के द्वारा परमेसुर से जुड़े रैबें।

² जी के द्वारा बिसवास के काजें ऊ दया, जी में हम बने आंय, हमाई पोंच सोई भई, और परमेसुर की मईमा की आसा पे घमण्ड करें।

³ बस जौई नईं, पर हम मुसीबतों में सोई घमण्ड करें, जौ जान के मुसीबत परेसानी से धीरज धरबो।

⁴ और धीरज धरे से खरो कड़बो, और खरो कड़े से आसा पैदा होत आय।

⁵ और आसा से लज्जा नईं होत, कायसे पवित्तर आत्मा जौन हम हां दओ गओ आय, ऊके द्वारा परमेसुर कौ प्रेम हमाए हियन में डालो गओ आय।

⁶ कायसे जब हम कमजोर निरबल हते, तो मसीह ऐन सई बेरा पे पापी जनन के लाने मरो।

⁷ का कोई धरमी मान्स के लाने अपनी जान दै है, जौ तो अन्होनो आय, परन्त हो सकत आय कोऊ भले मान्स के लाने अपनी जान की बाजी लौ लगा देबे।

⁸ परन्त परमेसुर हम पे अपने प्रेम की भलाई ई भांत से उजागर करत आय, कि जब हम पापी हते तबई मसीह हमाए लाने मरो।

⁹ सो जब हम ऊके रकत से धरमी ठैरे, बो ऊके द्वारा परमेसुर के न्याव से काय न बच हैं?

¹⁰ कायसे बैरी होबे की दसा में ऊके पुत्र की मौत के द्वारा हमाओ मेल मिलाप परमेसुर से भओ, सो फिन मेल हो जाबे पे ऊके जीवन से हम तरन तारन काय न पा हैं?

¹¹ अकेले जौ नईं, पर हम अपने पिरभु यीशु मसीह के द्वारा हमाओ मेल मिलाप भओ आय, परमेसुर में खुसी मनात आंय।

¹² ई लाने जैसो एक मान्स के द्वारा पाप संसार में आओ, और पाप सें मौत आई, और ई भांत मौत सबरे मान्सन में फैल गई, कायसे सबरन ने पाप करो।

¹³ नेम व्यवस्था के दए जाबे लौ पाप संसार में तो हतो, पर जिते नेम व्यवस्था नईंयां, उते पाप लेखो नईं जात।

¹⁴ फिन आदम से लेके मूसा तक मौत ने उन लोगन पे सोई राज करो, जिन ने ऊ आदम के अपराध घांई जौन ऊके आबे कौ चिन्ह आय, पाप न करो।

¹⁵ पर जैसी दसा पाप की आय, वैसी दसा दया के दान की नईंयां, कायसे एक मान्स के पाप के काजें बिलात मान्स मरे, तो परमेसुर कौ दान और ऊ की भलाई एक मान्स पिरभू यीशु मसीह के अनुग्रह से भओ, बिलात जन पे जरूर अधकाई से भओ।

¹⁶ जैसो एक मान्स के पाप करबे कौ फल भओ, ऊंसई दान की दसा नईं, कायसे एकई के काजें दण्ड के हुकम कौ फैसला भओ, परन्त बिलात पापन के काजें ऐसो बरदान पैदा भओ, कि मान्स धरमी ठैरें।

¹⁷ कायसे जब एकई मान्स के पाप के काजें मौत ने ऊ एकई के द्वारा राज करो, तो जौन मान्स दया और धर्मरूपी बरदान बिलात से पात आंय, बे एक मान्स जाने के यीशु मसीह के द्वारा संच्चई अनन्त जीवन में राज कर हैं।

¹⁸ ई लाने जैसो एक पाप सबरे मान्सन के दण्ड़ के हुकम कौ कारन बनो, ऊंसई एक धर्म कौ काम सोई सबरे मान्सन के लाने जीवन के लाने धरमी ठैराए जाबे कौ काज भओ।

¹⁹ कायसे जैसो एक मान्स के हुकम न मानबे सें बिलात जनें पापी ठैरे, ऊंसई एक मान्स के हुकम मानबे से बिलात जनें धरमी ठैर हैं।

²⁰ नेम व्यवस्था मजारें आ गई, कि पाप कुल्ल होबे, पे जिते पाप कुल्ल भए, उते दया सोई और बढ़के भई।

²¹ कि जैसो पाप ने मौत फैलात भए राज करो, ऊंसई हमारे पिरभु यीशु मसीह के द्वारा दया सोई अनन्त जीवन के लाने धर्मी ठैरात भए राज करे।