- रोमियों 4 - Bundeli Holy Bible

¹ ई लाने हम का कैबें, हमाए बाप इब्राहीम हां का मिलो?

² कायसे जदि इब्राहीम करमों से धरमी ठैराओ जातो, तो उए घमण्ड करबे की जांगा होती, पर परमेसुर के ऐंगर नईं।

³ पवित्तर धरम पोथी का कैत आय? जौ कि इब्राहीम ने परमेसुर पर बिसवास धरो, और जौ ऊके लाने धार्मिकता गिनो गओ।

⁴ काम करबेवारे हां मजूरी देबो दान नईंयां, परन्त हक्क समजो जात आय।

⁵ परन्त जौन काम नईं करत पर पापी के धरमी ठैराबेवारे पे बिसवास करत आय, ऊकौ बिसवास ऊके लाने धार्मिकता गिनो जात आय।

⁶ जिए परमेसुर बिन करमन के धरमी ठैरात आय, उए दाऊद सोई धन्न कैत आय।

⁷ धन्न आंय बे जिन के पाप छिमा भए, और जिन के पाप ढांपे गए।

⁸ धन्न आय बो मान्स जिए परमेसुर पापी न ठैराए।

⁹ तो जौ धन्न कहबो, का खतनावारन के लाने आय, या बिना खतनावारन के लाने सोई आय? हम जौ कैत आंय, इब्राहीम के लाने उकौ बिसवास धार्मिकता गिनो गओ।

¹⁰ तो बो कैसे गिनो गओ? खतना की दसा में या बिना खतना की दसा में? खतने की दसा में नईं पर बिना खतने की दसा में।

¹¹ इब्राहीम ने खतने कौ चिन्ह पाओ, कि बो बिसवास की धार्मिकता पे छाप होबे, जौन ऊ ने बिना खतना की दसा में धरो हतो: जी से बो उन सबरन कौ बाप ठैरो, जौन बिना खतना की दसा में बिसवास करत आंय, जीसे बे सोई धर्मी ठैरें।

¹² और उन खतना करे भयन कौ बाप होबे, जौन न अकेले खतना करे भए आंय, परन्त हमाए बाप इब्राहीम के बिसवास की गैल पे चलत आंय, जौन ऊने बिन खतना की दसा में करो हतो।

¹³ कायसे जौ कौल करार कि बो संसार कौ अधकारी हुईये, न तो इब्राहीम हां, न ऊके वंस हां दई गई हती, पर बिसवास की धार्मिकता के द्वारा मिली हती।

¹⁴ कायसे जदि नेम व्यवस्थावारे वंसज अधकारी आंय, तो बिसवास अकारथ और कौल करार बेकार ठैरी।

¹⁵ नेम व्यवस्था तो खुन्स उपजात आय और जिते नैम व्यवस्था नईंयां उते ऊकौ न मानबो कछु मतलब नईं राखत।

¹⁶ ऐई काजें कौल करार बिसवास के द्वारा मिलत आय, कि दया की रीति पर होबे, कि बो ऊके कुल वंसवारन के लाने पक्की होबे, न केवल उन के लाने जौन नैम व्यवस्थावारो आय पर उन के लाने सोई जौन इब्राहीम के घांई बिसवास करबेवारे आंय: ओई तो हम सबरन कौ बाप आय।

¹⁷ (जैसो लिखो आय, मैंने तोय बिलात जातियन कौ बाप ठैराओ आय), ऊ परमेसुर के सामूं जीपे ऊ ने बिसवास करो हतो और जौन मरे भयन हां जिलात आय, और जौन बातें हैईं नईंयां, उन कौ नाओं ऐसो लेत आय, मानो बे आंय।

¹⁸ ऊ ने निरासा में सोई आसा रख के बिसवास करो, ई लाने कि बचन के अनसार कि तोरो कुल वंस ऐसो हुईये बो बिलात जातन कौ बाप होबे।

¹⁹ और बो एक सौ बरसन को हतो, अपनी मरी भई जैसी देयां और सारा के गरभ की मरी भई जैसी दसा जानके भी बिसवास में कच्चो न भओ।

²⁰ और न अबिसवासी बन के परमेसुर की कौल किरिया पे संका करी, पर बिसवास में पक्को होकें परमेसुर हां मईमा दई।

²¹ और पक्की जान लेओ, कि जौन बात की ऊ ने कौल किरिया करी आय, बो ऊहां पूरो करबे में सई सांचो आय।

²² ई काजें जौ ऊके लाने धार्मिकता लेखो गओ।

²³ और बचन, कि बिसवास धरबो ऊके लाने धार्मिकता गिनो गओ, न केवल बस ओई के लाने लिखो गओ।

²⁴ पर हमाए लाने सोई जिन कौ बिसवास धार्मिकता लेखो जै है, जाने कि हमाए लाने सोई जौन ऊ पै बिसवास करत आंय, जीने हमाए पिरभु यीशु हां मरे भयन में से जिलाओ।

²⁵ बो हमारे पापन के काजें पकड़वाओ गओ और हम हां धरमी बनाबे के लाने जिलाओ सोई गओ।