- रोमियों 2 - Bundeli Holy Bible

¹ सो अब हे लांछन लगाबेवारे, तें कोनऊ काय न होबै; तो लौ कछु उत्तर नईयां! कायसे जौन बात में तें दूसरन पे लांछन लगात आय, ओई बात में अपने हां भी दोषी ठहरात आय, कायसे जैसो लांछन तें लगात आय, तें सोई ऊंसई काम करत आय।

² और हम जानत आंय, कि ऐसे ऐसे काम करबेवारन पे परमेसुर कुदाऊं से सई सई दण्ड कौ हुकम होत आय।

³ हे मान्स, तें जौन ऐसे काम करबेवारन पे लांछन लगात आय, और खुद बेई काम करत आय; का जौ समजत आय, कि तें परमेसुर के दण्ड से बरक जै है?

⁴ का तें ऊ की किरपा, सहनशीलता, और धीरजरूपी मन हां नीचो समझत आय? और का जौ नईं जानत, कि परमेसुर की किरपा तोय हिया फिराबो सिखात आय।

⁵ पर तें अपनी जिद और हठीले मन के अनसार, जब परमेसुर कौ सच्चो न्याओ परगट हुईये, अपने लाने दण्ड कमा रओ आय।

⁶ बो सबको उन के कामन के अनसार न्याय कर है।

⁷ जौन साजे काम कर के मईमा, और आदर, और अमरता की खोज में आंय, उन हां बो अनन्त जीवन दै है।

⁸ और जौन बकवादी आंय, और सत्त हां नईं मानत, पर अधर्म हां मानत आंय, उन पे क्रोध और कोप पड़ है।

⁹ और दुख और परेसानी हर मान्स के प्राण पे जौन बुरओ करत आय आ है, पेंला यहूदी पे फिन यूनानी पे।

¹⁰ परन्त आदर और मईमा और कलयाण हर जने हां मिल है, जौन भलो करत आय, पेंला यहूदी हां फिन यूनानी हां।

¹¹ कायसे परमेसुर कोई की तरफदारी नईं करत आय।

¹² ई लाने जिन ने बिना नैम व्यवस्था के पेंला पाप करो, बे बिना नैम व्यवस्था के नास सोई हुईयें, और जिन ने नैम व्यवस्था पाके पाप करो, उन को दण्ड व्यवस्था अनसार हुईये।

¹³ (कायसे परमेसुर के इते नेम व्यवस्था सुनबेवारे धरमी नईं, परन्त परमेसुर के इते नैम व्यवस्था पे चलबेवारे धरमी ठैराए जै हैं।

¹⁴ फिन दूसरी जातनवारे जिन लौ नैम व्यवस्था नईंयां, स्वाभाव से नैम व्यवस्था की बातन पे चलत आंय, तो नैम व्यवस्था उन लौ न होबे पे बे अपने लाने खुद नैम व्यवस्था आंय।

¹⁵ बे नैम व्यवस्था की बातन हां अपने अपने हियन पे लिखी दिखात आंय, और उन की समज सोई गवाह होत आय, और उन के सोच उन हां लांछन लगात, या बिन लांछन ठैरात आंय।)

¹⁶ जौन दिना परमेसुर, मोरे भले सन्देसे के अनसार, पिरभु यीशु मसीह के द्वारा मान्सन की लुकी भई बातन कौ न्याय कर है।

¹⁷ जदि तें यहूदी कहात आय, और नैम व्यवस्था के अनसार चलत आय, और परमेसुर के सामूं घमण्ड करत आय।

¹⁸ और ऊ की मनसा जानत और नैम व्यवस्था सीख के साजी साजी बातें तोय अच्छी लगत आंय।

¹⁹ और अपने पे भरोसो रखत आय, कि मैं अंधरन कौ अगुवा, और अंधकार में पड़े भयन की ज्योत आओं।

²⁰ और न समजवारन हां सिखैबेवारो, और लरकावालन कौ ज्ञान देबेवारो आंव, और ज्ञान, और सत्त जौन नेम व्यवस्था में आय, मोय मिलो आय।

²¹ अब तें जौन दूसरन हां सिखात आय, अपने आप हां नईं सिखात? का तें जौन भड़याई न करबे हां कैत आय, खुद भड़याई करत आय।

²² तें जौन कैत आय, परतिरिया भोग न करिए, का खुद परतिरिया भोग करत आय? तें जौन मूरतन से धिनात आय, खुद मन्दरन हां लूटत आय।

²³ तें जौन नेम व्यवस्था के विषय में घमण्ड करत आय, का नैम व्यवस्था अनसार न चलकें, परमेसुर कौ अनादर करत आय?

²⁴ कायसे तुमाए काजें दूसरी जातवारन में परमेसुर के नाओं हां निंदरो जात आय, जैसो लिखो सोऊ आय।

²⁵ जदि तें नैम व्यवस्था के अनसार चले, तो खतने से लाभ तो आय, पर जदि तें नैम व्यवस्था अनसार न चले, तोरो खतना बिन खतना के समान ठैरो।

²⁶ ई लाने जदि बिना खतनावारो मान्स नैम व्यवस्था हां पूरो पूरो माने, तो का ऊ की बिन खतनावारी दसा खतना भए मान्स बिरोबर न मानी जै है?

²⁷ और जौन मान्स जाति के कारन बिन खतना के रओ, जदि बो नैम व्यवस्था हां पूरो करै, तो का तोय जौन लिखित नैम व्यवस्था आय और खतना करे जाबे पे लौ नैम व्यवस्था हां नई मानत आय, तोहां दोसी न ठैरा है?

²⁸ कायसे यहूदी ऊ नईंयां, जौन उजागर में यहूदी जाने जात आंय; और न ऊ खतना आय, जौन उजागर में आय, और देयां में आय।

²⁹ पर यहूदी ओई आय, जौन हिए से आय; और खतना ओई आय, जौन हिए और आत्मा कौ आय; लिखे से बात नईं बनत: ऐसन की बड़वाई मान्सन कुदाऊं से नईं, परन्त परमेसुर कुदाऊं से होत आय।