- रोमियों 14 - Bundeli Holy Bible

¹ जौन बिसवास में कमजोर होबै, उन हां अपनी संगत में ले लेओ; परन्त उन के सक सन्देह पर बतकाओ के लाने नईं।

² कायसे एक हां बिसवास आय, कि सबई कछु खाबो सई आय, परन्त जौन बिसवास में कमजोर आय, ऊ साग पात ही खात आय।

³ और खाबेवारो न खाबेवारे हां नीचो न जाने, और जौन नईं खात आय बो खाबेवारे पे दोस न लगाबै, कायसे परमेसुर ने ऊ ए अपना लओ आय।

⁴ तें को आय कि दूसरे के चाकर पे लांछन लगात आय? ऊकौ पक्को रैबो या गिर जाबो ऊके मालक से जुड़ो आय, और बो पक्को कर ही दओ जै है; कायसे पिरभु ऊ ए पक्को राख सकत आय।

⁵ कोऊ एक दिना हां दूसरे दिना से बढ़ के मानत आय, और कोऊ सब दिन हां एक जैसो जानत आय: सबई जने अपने हिए में ठान लेबे।

⁶ जौन कोऊ दिनां हां मानत आय, बो पिरभु के लाने मानत आय: जौन कोऊ खात आय, बो पिरभु के लाने खात आय, कायसे ऊ परमेसुर कौ धन्नबाद करत आय, और जौन नईं खात, बो पिरभु के लाने नईं खात और परमेसुर कौ धन्नबाद करत आय।

⁷ कायसे हम में से सब कोई न तो अपने लाने जियत आय और न अपने लाने मरत आय।

⁸ कायसे जदि हम जीयत आंय, तो पिरभु के लाने जीयत आंय; और जदि मरत आंय, तो पिरभु के लाने मरत आंय; सो हम जीएं या मरें, हम पिरभु ही के आंय।

⁹ कायसे मसीह ऐई लाने मरो और जी सोई उठो कि बो मरे भयन और जीयत दोईयन कौ पिरभु होबे।

¹⁰ तें अपने भईया पे काय लांछन लगात आय? या तें फिन अपने भईया हां काय तुच्छ जानत आय? हम सब के सब परमेसुर के न्याय आसन के सामूं ठांड़े हुईयें।

¹¹ कायसे लिखो आय, पिरभु कैत आय, मोरे जीवन कौ कौल कि हर एक घुटना मोरे आंगू टिक है, और हर एक जीभ परमेसुर हां मान लै है।

¹² ई लाने हम में से सबरे जने परमेसुर हां अपनो लेखा दै है।

¹³ सो आंगू से हम एक दूसरे पे लांछन न लगाबें पर तुम जौ ठान लेओ कि कोनऊ अपने भाई के सामूं ठेस या उपटा लगबे कौ कारण न बने।

¹⁴ मैं जानत आंव, और पिरभु यीशु में मोय पक्को पता पड़ो आय, कि कोऊ बस्त अपने आप में अशुद्ध नईंयां, परन्त जौन ऊ ए अशुद्ध समजत आए, ऊके लाने असुद्ध आय।

¹⁵ जदि तोरो भईया तोरे खैबे के काजें सोच में पड़त आय, तो फिन तें प्रेम के चलन में नईं चलत: जीके लाने मसीह मरो ऊहां तें अपने खैबे से नास न कर।

¹⁶ ई लाने तुमाए लाने जौन साजो आय बो न निंदरो जाए।

¹⁷ कायसे परमेसुर कौ राज खैबो पीबो नईंयां; परन्त धरम और मेल मिलाप और बा खुसी आय; जौन पवित्तर आत्मा से होत आय।

¹⁸ और जो कोऊ मसीह की ई भांत सेवा करत आय, बो परमेसुर हां साजो लगत आय और मान्सन में सोई मानो जात आय।

¹⁹ ई लाने हम उन बातन में लगे रैबें, जिन से मेल मिलाप और एक दूसरे कौ सुधार होबे।

²⁰ खैबे के लाने परमेसुर कौ काम न बिलोर: सब कछु सुद्ध तो आय, परन्त ऊ मान्स के लाने बुरओ आय, जीहां ऊके खैबे से ठोकर लगत आय।

²¹ भलो तो जौ आय, कि तें न मांस मछरिया खाबै और न दारू पिए, और न कछु ऐसो करे, जीसे तोरो भईया ठोकर खाबै।

²² तोरो जौ बिसवास होय, ऊ ए परमेसुर के सामूं अपने हिये में धर, धन्न तो बो आय, जौन ऊ बात में, जिए ऊ सई समजत होय, अपने आप हां दोसी नईं ठैराऊ त।

²³ पर जौन कछु सक सन्देह कर के खात आय, बो दण्ड़ के जोग ठैर चुको; कायसे बिसवास से नईं खात, और जो कछु बिसवास से नईंयां, बो पाप आय।