- रोमियों 13 - Bundeli Holy Bible

¹ हर एक जन बड़े अधकारियन के नेंचें रैबे; कायसे कोई अधकार ऐसो नईंयां, जौन परमेसुर कुदाऊं से न होबे; और जो अधकार आंय, बे परमेसुर कुदाऊं से ठैराए गए आंय।

² ई लाने जो कोई अधकार कौ बिरोद करत आय, बो परमेसुर के कानून कौ विरोद करत आय, और विरोद करबेवारे दण्ड़ पा हैं।

³ कायसे हाकम साजे काम के लाने नईं, परन्त बुरए काम के लाने डरबे कौ कारन आय, सो जदि तें हाकम से निडर रैबो चाहत आय, तो साजे काम कर तो हाकम तोरी पीठ थपथपा है।

⁴ कायसे बो तोरे साजे के लाने परमेसुर कौ सेवक आय। परन्त जदि तें बुराई करे, तो डर; कायसे ऊ तलवार ऐंसई नईं लएं और परमेसुर को सेवक आय; कि ऊके न्याय के अनसार बुरए काम करबेवारन हां दण्ड़ देबे।

⁵ ई लाने आधीन रैबो न केवल न्याय के डर से जरूरी आय परन्त बुद्धि समज सोई जरूरी आय, विवेक सोई जाई गवाय देत आय।

⁶ ई लाने टैक्स सोई दो, कायसे बे परमेसुर के सेवक आंय, और हमेसा ऐई काम में लगे रैत आंय।

⁷ ई लाने सबको हक्क चुकाओ, जीहां कर चानें, ऊहां कर देओ; जिए महसूल चानें, ऊहां महसूल देओ; जी से डरबो चईये, ऊसे डरो; जी कौ आदर सम्मान करो चईये ऊकौ आदर सम्मान करो।

⁸ आपस के प्रेम हां छोड़ और कोई बात में कोऊ के करजदार न बनो; कायसे जौन कोई दूसरे से प्रेम राखत आय, ओई ने नेम व्यवस्था पूरी करी आय।

⁹ कायसे जौ कि परतिरिया भोग न करियो, हत्या न करियो; भड़याई न करियो, लालच न करियो; और इन हां छोड़ और कोऊ हुकम सोई होबे तो सबरी बातें ईमें पूरी होत आय, कि अपने पड़ोसी से अपने जैसो प्रेम राख।

¹⁰ प्रेम पड़ोसी की कछु बुराई नईं करत, ई लाने प्रेम करबो नेम व्यवस्था हां पूरो करबो आय।

¹¹ और ई बेरा हां पैचान के ऐंसोई करो, ई लाने कि अब तुमाए लाने सोत से जाग जाबे की बेरा आ पोंची आय, कायसे जौन बेरा हम ने बिसवास करो हतो, ऊ बेरा के हिसाब से अब हमाओ उद्धार एकदम ऐंगर आय।

¹² रात कुल्ल बीत गई आय, और भुन्सारो होबे हां आय; ई लाने हम अंधयारे के कामन हां छोड़ के जोत के हथियार बांध लेबें।

¹³ जैसो दिन में सई लगत आय, ऊं सई हम सूदरी चाल चलें; न अपनी मनमौजीपन में, न परतिरिया भोग में, न दारूबाजी, न लुच्चपन में, न लड़ाई झगड़ा न डाह में।

¹⁴ परन्त पिरभु यीशु मसीह की लीक पै चलो, और देयां की अभलाखा हां पूरो करबे कौ जतन न करो।