- रोमियों 11 - Bundeli Holy Bible

¹ ई लाने मैं कैत आंव, का परमेसुर ने अपनी प्रजा हां छोड़ दओ? कभऊं नईं; मैं सोई इस्राएली आंव: इब्राहीम के वंस और बिन्‍यामीन के कुल में से आंव।

² परमेसुर ने अपनी ऊ प्रजा हां नईं छोड़ो, जिन हां ऊ ने पेंला से नबेरो हतो: का तुम नईं जानत, कि पवित्तर पोथी में एलियाह अगमवकता के लाने का कओ गओ आय; कि बो इस्राएल के विरोद में परमेसुर से बिन्तवाई करत आय।

³ कि हे पिरभु, उन ने तोरे अगमवकतन हां मार डालो आय, और पवित्तर वेदियन हां मिटा दओ आय; और मैं ही अकेलो बरको आंव, और बे मोरे प्रान हां सोई नास करो चाहत आंय।

⁴ पर परमेसुर से उए का उत्तर मिलो कि मैंने अपने लाने सात हजार मान्सन हां बचा धरो आय जिन ने बाअल की पूजा नईं करी।

⁵ ठीक ऐई भांत ई टेम सोई, दया से नबेरे गए कछु मान्स बरक गए आंय।

⁶ जदि जौ दया से भओ आय, तो कर्मों से नईं; नईं तो दया फिन दया न रई।

⁷ ईको नतीजा का भओ? जौ कि इस्राएली जी की खोज में हते, बो उन हां नईं मिलो; पर नबेरे भयन हां मिलो, और बचे भए कठोर बना दए गए।

⁸ जैसो लिखो आय, परमेसुर ने उन हां आज के दिन लौ गैरी नींद में डाल दओ आय, और ऐसी आंखें दईं जौन न हेरें और ऐसे कान जौन न सुनें।

⁹ और दाऊद राजा कैत आय; उन कौ खैबो उन के लाने जाल, और फन्दा, और उपटा और दांड़ कौ काज होबे।

¹⁰ उन की आंखन पे अंधयारो छा जाबे जीसे न हेरें, और तें हमेसा उन की कमर हां झुकाए रै।

¹¹ सो मैं कैत आंव का उन ने ई लाने ठोकर खाई, कि गिर पड़ें? क भऊं नईं: पर उनके गिरबे के काजें दूसरी जातवारन हां उद्धार मिलो, कि उन हां जलन होबे।

¹² ई लाने जदि उनको गिरबो संसार के लाने धन और उन की घटी कमी दूसरी जातवारन के लाने मालपानू कौ काज बनी, तो उन की भरपूरी से का क छु न हुईये।

¹³ मैं तुम दूसरी जातवारन से कैत आंव: जब मैं दूसरी जातवारन के लाने प्रेरित आंव, तो मैं अपनी सेवा की बड़वाई करत आंव।

¹⁴ जीसे कोऊ भांत से अपने नातेदारन में जलन पैदा करवा के उन में से कैऊ अन कौ उद्धार करवाओं।

¹⁵ कायसे जब उन कौ त्याग दओ जाबो संसार के मिलाप कौ काज भओ, तो का उन को अपनाओ जाबो मरे भयन में से जी उठबे के बिरोबर न हुईये?

¹⁶ जब भेंट की पैली बस्त पवित्तर आय, तो पूरो और सब कछु पवित्तर हुईये: और जब जड़ें पवित्तर ठैरीं, तो डालियां सोई पवित्तर हुईयें।

¹⁷ पर जदि कछु डालें कतर दईं गईं, और तें जौन जंगली जैतून आय ऊ में सांटो गओ, और असली जैतून की जड़ की चिकनाई को हींसावारो बनो आय।

¹⁸ तो डालियन पे घमण्ड न करिये: और जदि तें घमण्ड करे, तो याद राखियो, कि तें जड़ हां नईं, परन्त जड़ तोहां संभालत आय।

¹⁹ फिन तें कै है कि डालियां ई लाने कतरी गईं, कि मैं सांटो जाओं।

²⁰ सई आय, बे तो बिसवास न करबे के काजें कतरी गईं, पर तें बिसवास में बनो रैत आय, सो घमण्ड न कर पर डर के रै।

²¹ कायसे जब परमेसुर ने पेड़ की सई डालियन हां नईं छोड़ो, तो तोहां सोई न छोड़ है।

²² ई लाने परमेसुर की किरपा और कड़ाई हां तक! जौन गिर गए, उन पे कड़ाई, पर तो पे किरपा, जदि तें ऊ में बनो रै है तो भलो, नईं तो, तें सोई काट डालो जै है।

²³ बे सोई जदि अबिसवास में न रैबें, तो सांटे जै हैं कायसे परमेसुर उन हां फिन के सांट सकत आय।

²⁴ कायसे जदि तें ऊ जलपाई से, जौन अपने आप जंगली आय काटो गओ और स्वाभाव के बिरुद्ध साजे जलपाई में सांटो गओ, तो बे जौन साजे जैतून की डालियां आंय, अपने ई जैतून में काय न सांटे जै हैं।

²⁵ हे भईया हरौ, कऊं ऐसो न होबै, कि तुम अपने आप हां समजदार मान लेओ; ई लाने मैं नईं चाहत कि तुम ई भेद से अनजान रओ, कि जब लौ दूसरी जातवारन कौ अंधबिसवास न मिट जाबै, तब लौ इस्राएल कौ एक भाग ऐंसई कठोर रै है।

²⁶ और ई भांत से सबरो इस्राएल उद्धार पा है; जैसो लेख आय, छुड़ाबेवारो सिय्यौन से आ है, और अधर्म हां याकूब से दूर कर है।

²⁷ और उन के संग्गै मोरो जौई कौल हुईये, मैं उन के पापन हां दूर कर दें हों।

²⁸ भले सन्देसे के लेखे से तो तुमाए बैरी आंय, परन्त चुन लए जाबे से बे बापदादों के काजें प्यारे आंय।

²⁹ कायसे परमेसुर के बरदान और बुलाहट अटल आंय।

³⁰ कायसे जैसे तुम ने पेंला परमेसुर कौ हुकम न मानो पर अबै ऊ को हुकम न मानबे से तुम पे दया भई आय।

³¹ ऊंसई उन ने सोई अबै हुकम न मानो कि तुम पे जौन दया होत आय ऊसे उन पे सोई दया होबे।

³² कायसे परमेसुर ने सब हां हुकम तोड़बे कौ दोशी बना के राखो जी से सब पे दया होबे।

³³ आहा! परमेसुर कौ धन और समज बड़ी गैरी आय! ऊकौ सोचबो कि उनकी थाह न मिले, और ऊ की गैल कौ बयान नईं हो सकत।

³⁴ पिरभु की समज हां कीने जानो? या ऊकौ सलाय देबेवारो को भओ?

³⁵ या कीने पेंला ऊ ए कछु दओ आय जी कौ बदला ऊहां चुकाओ जाए।

³⁶ कायसे ओई कुदाऊं से, और ओई से, और ओई के लाने सब कछु आय: ऊकी मईमा जुगानजुग होत रैबे। आमीन।