- रोमियों 1 - Bundeli Holy Bible

¹ पौलुस कुदाऊं से जौन यीशु मसीह कौ चाकर आय, और प्रेरित होबे हां बुलाओ गओ, और परमेसुर के ऊ भले सन्देसे के परचार के लाने नबेरो गओ आय।

² जीहां ऊ ने पहलईं से अपने अगमवकतन के द्वारा पवित्तर धर्म पोथी में।

³ अपने पुत्र हमाए पिरभु यीशु मसीह के लाने कौल करो हतो, बो देयां के रूप से दाऊद के वंस में पैदा भओ।

⁴ और पवित्रता की आत्मा के भाव से मरे भयन में से जी उठबे के काजें अधिकार के संग्गै परमेसुर कौ पुत्र ठैरो आय।

⁵ ओई से हम हां दया और भले सन्देस प्रचार करबे मिलो; कि ऊके नाओं से सबरी जातन के मान्स बिसवास कर के ऊ की मानें।

⁶ जिन में से तुम सोई यीशु मसीह के होबे के लाने बुलाए गए आव।

⁷ उन सबरन के नाओं जौन रोम में परमेसुर के प्यारे आएं और पवित्तर होबे हां बुलाए गए आएं। हमाए पिता परमेसुर और पिरभु यीशु मसीह की कुदाऊं से तुम हां दया और सान्ति मिलत रैबे।

⁸ पेंला मैं तुम सब के लाने यीशु मसीह के द्वारा अपने परमेसुर कौ धन्यवाद करत आंव, कायसे के तुमाए बिसवास की खबर सबरे संसार में हो रई आय।

⁹ परमेसुर जी की सेवा मैं अपने मन से ऊके पुत्र के भले सन्देसे के लाने करत आंव, ओई मोरो गवाह आय; कि मैं तुम हां लगातार याद करत रैत आंव।

¹⁰ अपनी रोजीना की बिन्तवाई में तुम हां सोई सुमरन करत आंव, कि कैसऊ पिरभु परमेसुर अपनी मन्सा से तुम लौ पोंचा देबे।

¹¹ कायसे मैं तुम से मिलबे की मन्सा हिये से करत आंव, कि मैं तुम हां कोऊ आत्मिक दान देंओं कि तुम पक्के हो जाओ।

¹² जब मैं तुमाए सग्ंगै रओ तो हम ऊ बिसवास से जौन मोय है, और तुम में सोई आय, एक दूसरे से आसीस पाएं।

¹³ हे भईया हरौ, मैं नईं चाहत, कि तुम ई बात से अनजान रओ, कि मैंने तुम लौ बेर बेर आबो चाहो, कि जैसो मोय दूसरी जातवारन में फल मिलो, ऊं सई तुम में सोई मिले, पर अबै लौ रुको रओ।

¹⁴ मैं यूनानियों और दूसरी भाषावारन कौ और समजदार और जौन समझत नईंयां उनकौ करजदार आंव।

¹⁵ मैं तुम हां सोई जौन रोम में रैत आंव, पिरभु परमेसुर कौ सन्देसो सुनाबे हां पूरो तईयार आंव।

¹⁶ कायसे मैं भले सन्देस देबे से नईं लजात, ई लाने कि बो सब कोऊ जौन बिसवास करत आंय, पेंला तो यहूदी, फिन यूनानी के उद्धार के लाने परमेसुर की तागद आय।

¹⁷ कायसे ऊ में परमेसुर की धार्मिकता बिसवास से, और बिसवास के लाने उजागर होत आय; जैसे लिखो आय, कि बिसवास से धर्मी मान्स जीयत रै है।

¹⁸ परमेसुर कौ खुन्स तो उन लोगन की अभक्ति और अधर्म पे सरग से उजागर होत आय, जौन सत्त हां पाप से दबाए रैत आंय।

¹⁹ ई लाने के परमेसुर के बारे में उन की समज उजागर आय, कायसे परमेसुर ने उन पे उजागर करो आय।

²⁰ कायसे संसार के बनवे के टैम से परमेसुर के अनदेखे गुन, जानो उनको भारी बल, संसार की रचना में साफ साफ समजो जा सकत आय, ई लाने उन लौ कोऊ बहानो नईंयां।

²¹ ई काजें कि बे परमेसुर हां जानत हते, तो भी उन ने परमेसुर की बड़वाई और धन्नबाद नईं करो, परन्त अपने हियन से बेकार के सोच विचार करन लगे, और उन कौ अज्ञानी मन अंधेरो हो गओ।

²² बे औरें अपने आप हां समजदार जान के मूरख बन गए।

²³ और कभऊं नास न होबेवारे परमेसुर की मईमा हां नासवान मान्स, और पंछियन, और जनावरन, और रेंगबेवारे जन्तुअन की मूरत बना डाली।

²⁴ ई काजें परमेसुर ने उन हां उन की हियन की इच्छा के अनसार गन्दे काम करबे के लाने छोड़ दओ, कि बे आपस में अपनी अपनी देयां कौ अनादर करें।

²⁵ कायसे उन ने परमेसुर की सच्चाई हां बदल के झूठ बना डालो, और संसार की बस्तन की सेवा और उपासना करी, न कि ऊ करतार की जौन जुग जुग धन्य आय। आमीन।

²⁶ ई लाने परमेसुर ने उन हां नीच मन्सा के बस में छोड़ दओ; इते लौ की उन की बईयरन ने सोई स्वाभाविक व्यवहार हां, जो स्वाभाव के बिरुद्ध आय, करन लगी।

²⁷ ऊं सई मनसेलू सोई बईयरन के संग्गै स्वाभाविक व्यवहार छोड़ के आपस में कामातुर होकें जलन लगे, और मनसेलुअन ने मनसेलुअन के संग्गै बुरओ काम कर के अपनी अज्ञानता कौ सई फल पाओ।

²⁸ जब उन ने परमेसुर हां नईं मानो, तो परमेसुर ने सोई उन हां उन के बुरे हियन पे छोड़ दओ; कि बे बुरए काम करें।

²⁹ ई लाने बे सब भांत के पाप, और दुष्टता, और लोभ लालच, और बैरभाव से भर गए; और डाह, और हत्या, और झगड़े, और छल कपट, और जलन से भरपूर हो गए, और चुगलखोर।

³⁰ बदनामी करबेवारे, परमेसुर के देखबे में घिना, दूसरन कौ मान न करबेवारे, घमण्डी, डींगमार, बुरई बुरई बातन के बनाबेवारे, मताई-बाप कौ कओ न करबेवारे।

³¹ नसमज, बिसवासघाती, प्रेम रहित, दया रहित हो गए।

³² बे औरें परमेसुर कौ नैम कानून जानत आंय, कि जौन भांत-भांत के काम करत आंय बे मारे जाबे के जोग आंय, फिन भी बे ऐसे बुरए काम करत आंय, परन्त ऐसे काम करबेवारन से खुस होत आंय।