- यूहन्‍ना के दरसन कौ खुलासा 5 - Bundeli Holy Bible

¹ और जौन सिंहासन पै बैठो हतो, ऊके हाथ में मैंने एक किताब हेरी, जौन भीतर और बायरें लिखी हती, और ऊहां सात मुहरें लगा के बन्द करो हतो।

² फिन मैंने एक बली सरगदूत हां तको जौन जोर के ऐसो परचार करत हतो, कि ई किताब की मुहरें तोड़के ईहां पढ़बे जोग को आय।

³ और न सरग में, और न धरती पै, और न धरती के नेंचें कोऊ ऐसो जनो नईं मिलो जौन ऊ किताब हां खोलबे और हेरबे लायक होबै।

⁴ और मैं जोर से रोऊन लगो, कायसे ऊ किताब हां खोलबे, और ऊहां हेरबेवारो कोऊ न मिलो।

⁵ तब उन प्राचीनन में से एक ने मोसे कई, न रोओ; हेरो, यहूदा के गोत्र को बो नाहर, जौन दाऊद के कुल में को आय, ऊ किताब हां खोलबे और ऊपै लगी सातई मुहरन हां तोड़बे जोग आय।

⁶ सो मैंने ऊ सिंहासन और चारई जनावर और उन प्राचीनन के बीच में, मानो एक मारो गओ गाड़र कौ बच्चा ठांड़ो तको: ऊके सात सींग और सातई आंखें हतीं; बे परमेसुर की सातई आत्मा आंय, जौन पूरे संसार में पठैई गईं हतीं।

⁷ उन ने आके जौन सिंहासन पै बिराजो हतो, उन के हाथ से बा किताब लै लई।

⁸ और जब किताब हां ऊ ने लै लओ, तो बे चारई जनावर और चौबीसई प्राचीन ऊ गाड़र के बच्चा के सामूं गिर पड़े; और सबरन के हाथ में वीणा और धूप से भरे सोने के कटोरा हते, जे पवित्तर लोगन की बिन्तवारी आंय।

⁹ और बे सबरे जौ नओ गाना गान लगे, कि तें ई किताब हां लैबे और ऊ की मुहरें खोलबे जोग आय; कायसे तेंने अपने बलदान के रकत से सबरे कुल, और बोली, और लोगन, और जातियन में से परमेसुर के लाने मान्सन हां मोल ले लओ आय।

¹⁰ और उन हां हमाए परमेसुर के खास जनें और याजक बना दओ; और बे धरती पै राज कर हैं।

¹¹ और मैंने हेरो, तो सिंहासन और उन जनावर और प्राचीनन के चारऊ कोद मुतके सरगदूतन कौ बोल सुनो, जौन लाखों और कड़ोरन हते।

¹² और बे ऊंची आवाज में कैत हते; कि बलिदान भओ मेमना बल, धन, और ज्ञान, और मान, और मईमा, और धन्नबाद के जोग आय।

¹³ फिन मैंने सरग में, और धरती पै, और धरती के नेंचें, और समन्दर के भीतर की सबरी बस्तन, और जो कछु उन में आय, ऐसो कैत सुनो, कि जौन सिंहासन पै बिराजो आय, ऊ को और मेमने कौ धन्नबाद, मान और राज हमेसा रैबे।

¹⁴ और चारऊ जनावर बोले आमीन, और प्राचीनन ने घुटने के बल गिरके दण्डवत करो।