- यूहन्‍ना के दरसन कौ खुलासा 4 - Bundeli Holy Bible

¹ ईके पाछें मैंने तको कि सरग में एक द्वार खुलो आय; और जीहां मैंने पेंला अपने संग्गै बात करत सुनो हतो, जी की बोली मानो तुरही जैसी हती, ओई कैत हतो कि इते ऊ परै आ जाओ: और मैं तोहां बे बातें दिखा हों, जिनको इन बातन के बाद पूरो होबो जरुरी आय।

² और तुरतईं आत्मा ने मोहां अपने बस में कर लओ; और मैंने का तको, कि सरग में एक सिंहासन धरो आय, और ऊ सिंहासन पै कोऊ बैठो आय।

³ और जो ऊ पै बैठो आय, बो यशब और मणि जैसो दिखत आय, और ऊके चारऊं कोद मेघधनुष जैसो दिखाई देत आय।

⁴ और ऊ सिंहासन के चारऊं कोद चौबीस सिंहासन आंय; और इन पै चौबीस प्राचीन उजरे उन्ना पैरे बिराजे आंय, और उनके मूड़ पै सोने के मुकुट धरे आंय।

⁵ और ऊ सिंहासन जौन बीच में धरो हतो, ऊ में से बिजली जैसी कौंदत और गरजन होत हती, और सिंहासन के सामूं आगी जैसे सात दिया जल रए आंय, जे सातई परमेसुर की आत्मा आंय।

⁶ ऊ सिंहासन के सामूं ऐसो लगत हतो जैसे साफ सुतरो कांच को समुन्दर होबै, और सिंहासन के बीच में और चौगिर्द चार जनावर हते, जिनके आंगे और पाछें आंखई आंखें हतीं।

⁷ पैलो जनावर नाहर जैसो हतो, दूसरो जनावर बछवा जैसो, और तीसरे को मों मान्स जैसो हतो, और चौथो जनावर उड़त भओ उकाब जैसो हतो।

⁸ इन चारई जनावरन के छै छै पंखा हते, और उनके भीतर और चारऊ कोद आंखई आंखें हतीं; बे रात दिना बिना आराम करे जौ कहत रैत आंय, कि पवित्तर, पवित्तर, पवित्तर, पिरभू परमेसुर, महाबली, जौन पेंला हते, और अबै आंय, और जौन आबेवारे आंय।

⁹ जे जनावर उनकी जौन सिंहासन पै बिराजे हते, और हमेसा जीयत रै हैं, आदर और उनको गुनगान करत रै हैं।

¹⁰ और चौबीसई प्राचीन सिंहासन पै बिराजेवारे के सामूं गिर जै हैं, और उनहां जौन जीयत रै हैं परनाम कर हैं; और अपने मुकुट उनके सामूं ऐसो कैत धर दै हैं।

¹¹ कि हमाए पिरभू, और परमेसुर, तुमईं मान, गुनगान और जस पाबे के लायक आव; कायसे तुमईं ने सबरे संसार की बस्तन हां अपनी मरजी से बनाओ।