- यूहन्‍ना के दरसन कौ खुलासा 3 - Bundeli Holy Bible

¹ सरदीस की मण्डली के दूत हां ऐसो लिखो, कि, जीके ऐंगर परमेसुर की सात आत्माएं और सात तारे आंय, बो कैत आय, कि मैं तोरे सब काम हां जानत आंव, कि तें कहात तो है जीयत, पर है मरो भओ।

² जागत रओ, और उन बस्तन हां जो बची रह गईं आंय, और जौन मिटबेवारी हतीं, उन हां पक्को कर; कायसे मैंने तोरे कोई काज हां अपने परमेसुर के ऐंगर पूरो नईं पाओ।

³ चेतो और ध्यान धरो कि तुम ने कौन सी बातें सीखी हतीं, और उन में पक्के बने रओ, और अपने पापन हां छोड़ो: अगर तें न चेतो, तो जैसो भड़या बिना कहे आत आय ऊंसई मैं आ जै हों।

⁴ पर एक बात तो आय कि तोरे इते सरदीस में कछु ऐसे जनें आंय, जिन ने अपने उन्ना असुद्ध नईं करे, बे सब मोरे संग्गै उजरे उन्ना पैर के घूम हैं कायसे बे लायक आंय।

⁵ जो कोऊ इन बातन में पक्को रै है, उन हां ऐसई सफेद उन्ना पैराए जै हैं, और मैं कैसऊ उन को नाओं जीवन की किताब में से न काट हों, मैं परमेसुर और सरगदूतन के सामूं जौ मान लै हों कि जे मोरे जनें आंय।

⁶ जीके कान होबें, बो सुन लेबें कि आत्मा मण्डलियन से का कैत आय।

⁷ और फिलेदिलफिया की मण्डली के दूत हां ऐसो लिखो, कि, जो पवित्तर और सांचो आय, और जौन दाऊद की कुंजी धरत आय, जीके खोले भय हां कोऊ बन्द नईं कर सकत और बन्द हां खोल नईं सकत, बो ऐसो कैत आय।

⁸ कि मैं तोरे कामन हां जानत आंव, (हेर, मैंने तोरे सामूं एक द्वार खोल रखो आय, जीहां कोई बन्द नईं कर सकत) तें बड़ो बली नईंयां, पर मोरे बचन कौ पालन करो आय और मोरे नाओं से नईं मुकरो।

⁹ हेर, मैं शैतान छलिया की कई करबेवारन हां तोरे बस में कर दै हों, और जौन यहूदी कहलान लगे आंय, पर हैं नईंयां, बे झूठ बोलत आंय -- हेर, मैं ऐसो कर हों, कि बे आके तोरे गोड़े पै दण्डवत कर हैं, और उन हां पता लग जै है, कि मैंने तोसे प्रेम रखो आय।

¹⁰ तेंने मोरे बचन हां धीरज से मानो आय, ईसे मैं तोहां परीक्षा की ऊ बेरा में बचाए रख हों, जो धरती पे रहबेवारन हां परखबे के लाने संसार पै आबेवालो आय।

¹¹ मैं जल्दी आबेवारो आंव; जो कछु तोरे ऐंगर आय, ऊहां पकड़े रै, कि कोऊ तोरो मुकट छीन न लैबे।

¹² जौन पक्को बनो रै है, ऊहां मैं अपने परमेसुर के मन्दर को एक खंभा बनै हों; और बो हमेसा उतईं बनो रै है; और मैं अपने परमेसुर को नाओं, और उनके नगर, मानो नये यरूशलेम, जो मोरे परमेसुर के ऐंगर से सरग से उतरबे वालो आय और अपनो नओ नाओं ऊ पै लिख हों।

¹³ जीके कान होबें, बो सुन लेबें कि आत्मा मण्डलियन से का कैत आय।

¹⁴ लौदीकिया की मण्डली के दूत हां ऐसो लिखो, कि, जो आमीन, और भरोसा धरबे जोग, और सच्चो गवाह आय, और परमेसुर के संसार कौ खास कारन आय, बो ऐसो कैत आय।

¹⁵ कि मैं तोरे कामन हां जानत आंव कि तें न तो जूड़ो आय और न तांतो: भला होतो कि तें जूड़ो या तांतो होतो।

¹⁶ पर तें गुनगुनो आय, न तो जूड़ो और न तांतो, मैं तोहां अपने मों से उगलबेवारो आंव।

¹⁷ तें जो कैत आय, कि मैं बड़ो धनी आंव, और धनवालो हो गओ आंव, और मोहां कोनऊ बस्त की कमी नईंयां, और जौ नईं जानत, कि तें अभागा और तुच्छ और कंगाल और अन्धरा और नंगो आय।

¹⁸ ई लाने मैं तोहां सम्मति देत आंव, कि आगी में ताओ भओ सोना मोसे मोल ले कि सांचऊ में धनी हो जाबै; और सफेद उन्ना लैके पैर ले कि तोहां नंगेपन जैसी सरम न होबै; और अपनी आंखें आंजबे हां बढिया सुरमा लै ले, कि तोहां दिखान लगै।

¹⁹ मैं जिन हां प्रेम करत आंव, उन सब हां चितात और उन हां सजा देत आंव, सो अब चेतो और अपने बुरय कामन हां छोड़ो।

²⁰ सुनो, मैं तुमाए मन के द्वारे पै ठाड़ो खटखटात आंव; अगर तुम मोरे टेरबे हां सुनो और मन के किवाड़ खोलो, तो मैं तुमाए मन में आहों और अपन दोई संग्गै खै हैं।

²¹ जौन पक्को निकल है, मैं ऊहां अपने संग्गै सिंहासन पै बैठा हों।

²² जीके कान होबें, बो सुन लेबें कि आत्मा मण्डलियन से का कैत आय।