- यूहन्‍ना के दरसन कौ खुलासा 19 - Bundeli Holy Bible

¹ ई के पाछें मैंने सरग में बहुत बड़ी भीड़ हां ऐसो कैत सुनो, कि हल्लिलूय्याह उद्धार, मईमा और बल हमाए परमेसुर के आंय।

² कायसे ऊके न्याव सांचे आंय, उन ने ई भ्रष्ट वेश्या को जीने संसार हां अपनी काली करतूतन से बिगाड़ दओ, परमेसुर ने ऊ को न्याव करो, और अपने जने के मारे जाबे कौ पलटा ले लओ।

³ उन ने फिन के हल्लिलूय्याह कई: और ऊके जलबे को धुआं जुग जुग उठत रै है।

⁴ और चौबीस प्राचीनन और चार जनावर ने घूटे पै गिरके सिंहासन पै बिराजे परमेसुर हां दण्डवत करो; और कहो आमीन, हल्लिलूय्याह।

⁵ और सिंहासन में से जौ कहत सुनो गओ, कि हमाए परमेसुर के सब मानबेवारो, हल्के, बड़े तुम सब उनको गुनगान करो।

⁶ फिन मैंने एक बड़ी आवाज सुनी मानो जैसे पानू के बहबे और भयंकर गरजबे कौ होबे, कि हल्लिलूय्याह, ई लाने कि हमाओ परमेसुर महाबली राज करत आय।

⁷ आओ, हम मजा मौज करें, और उनको भजन करें; कायसे मेमने के ब्याओ की बेरा आ गई: और ऊ की दुलईया तईयार हो गई आय।

⁸ ऊहां ब्याव के लाने बढिया, चमकत मलमल के उन्ना पैरबे कौ अधकार दओ गओ, कायसे मलमल कौ मतलब, परमेसुर के लोगन के धरम के काम आंय।

⁹ और ऊ ने मोय से कही; जौ लिख, कि धन्न बे आंय, जो मेमने के ब्याओ के भोज में बुलाए गए आंय; और ऊ ने मोय से कई, जे परमेसुर की सांची वाणी आंय।

¹⁰ और मैं दण्डवत करबे के लाने ऊके गोड़ों पै गिरो; ऊ ने मोय से कई; हेर, ऐसो न कर, कायसे मैं जो पिरभू को परचार करत आंव उनईं में से एक आंव, केवल परमेसुर के सामूं झुको; कायसे ईसा मसीह कौ परचार आगमवानी की आत्मा आय।

¹¹ फिन मैंने सरग हां एकदम खुलो तको; और एक सफेद घुड़वा आय; और ऊ पै एक सवार आय, जो बिसवास करे जोग आय; और बो धरम के संग्गै न्याव और लड़ाई करत आय।

¹² ऊ की आंखें आगी जैसी आंय: और ऊके मूड़ पै मुतके राजमुकुट आंय; और ऊ को एक नाओं लिखो आय, जीहां ऊके छोड़ और कोऊ नईं जानत।

¹³ और बो रकत डरो उन्ना पहने आय: और उन कौ नाओं परमेसुर कौ बचन आय।

¹⁴ और सरग की पलटन सफेद घुड़वन पै सवार और सफेद मखमल पैरे भए उनके पाछें पाछें चली आत आय।

¹⁵ और उनके मों से एक चोखी तलवार कड़त आय, और बे लोहे को राजदण्ड लैके देश देश के मान्सन हां मार हैं और उनपै राज कर हैं, और परमेसुर के बड़े कोप से मदिरा के कुण्ड में दाखें रौंद हैं।

¹⁶ और उनके उन्ना और जांघ पै जौ नाओं लिखो आय, राजाओं कौ राजा और पिरभुओं कौ पिरभू।

¹⁷ फिन मैंने एक सरगदूत हां सूरज पै ठांड़ो तको, ऊ ने चिल्लिया के आकाश में उड़बेवारे सब पंछीयन से कहो, आओ, सब परमेसुर की बड़ी बियारी में जुड़ जाओ।

¹⁸ जी से तुम राजन और उनके मुखियन और बली और घुड़वन और उनके सवारन और छोटे-बड़े, मान्सन कौ मांस खाओ।

¹⁹ फिन मैंने ऊ जनावर और धरती के सबरे राजा और उनकी पलटन हां ऊ घुड़वा पै बैठे, और ऊ की बड़ी पलटन से लड़बे के लाने जुड़े तको।

²⁰ और बो जनावर और ऊके संग्गै ऊ लबरा अगमवकता पकड़ो गओ, जौ ओई आय जौन अदभुत काम दिखा के मान्सन हां चकरया देत हतो, और बे ऊ जनावर की छाप सोई लगाएं हते, और ऊ की पूजा करत हते, जे दोई जीयत भए आगी की झील में जो गन्धक से जलत हती, डाले गए।

²¹ और बाकी मान्स ऊ घुड़वा पै बैठे मान्स की तलवार जो ऊके मों से कड़त हती, मार डाले गए; और सबरे पंछीयन ने मन भरके उनको मास खाओ।