- यूहन्‍ना के दरसन कौ खुलासा 16 - Bundeli Holy Bible

¹ फिन मैंने मन्दर में कोऊहां जोर से सात सरगदूतन से जौ कैत सुनो कि जाओ, और परमेसुर के कोप के सातई कटोरन हां धरती पै उड़ेल दो।

² सो पैले सरगदूत ने अपनो कटोरा धरती पै उड़ेल दओ। और जिन मान्सन पै ऊ जनावर की छाप हती, और जो ऊ की मूरत की पूजा करत हते, उन हां एक बुरओ और बिलात पिराते वारो खता कड़ो।

³ और दूसरे सरगदूत ने अपनो कटोरा समुन्दर पै उड़ेल दओ और समुन्दर को पानू मरे खून जैसो हो गओ, और समुन्दर के सबरे जीव मर गए।

⁴ और तीसरे सरगदूत ने अपनो कटोरा नदियन और पानू के सोतन पै डाल दओ, और उनको पानू रकत हो गओ।

⁵ और मैंने पानू के सरगदूत हां जौ कैत सुनो, कि हे पवित्तर जौन अबै है, और जौन हतो, तें न्यायी आय और तेंने जौ न्याय करो।

⁶ कायसे उन ने पवित्तर लोगन, और अगमवकतन हां रकत बहाओ हतो, और तेंने उन हां रकत पिलाओ; कायसे बे ऐई जोग आंय।

⁷ फिन मैंने बेदी से ऐसो शब्द सुनो, कि हे महाबली पिरभू परमेसुर, तोरे फैसले नोंने और सच्चे आंय।

⁸ और चौथे सरगदूत ने अपनो कटोरा सूरज पै उड़ेल दओ, और ऊहां मान्सन हां झुलसा देबे कौ अधकार दओ गओ।

⁹ और मान्स भारी तपन से झुलस गए, और परमेसुर के नाओं की जीहां इन विपत पै अधकार आय, बुरओ कहो और ऊकौ मन से जस न मानो।

¹⁰ और पांचवें सरगदूत ने अपनो कटोरा ऊ जनावर के सिंहासन पै उड़ेल दओ, और ऊके राज में अंधियारा छा गओ; और मान्स पिराते में अपनी जीभ हां मुराउन लगे।

¹¹ और अपने पिराते और फोडों के कारन सरग के परमेसुर की निन्दा करन लगे; और अपने कामन हां नईं छोड़ो।

¹² और छटे सरगदूत ने अपनो कटोरा फुरात नदिया पै उड़ेल दओ, और नदिया को पानू रीत गओ, कि पूरब के राजन के आबे के लाने गैल तईयार हो जाबै।

¹³ और मैंने अजगर और ऊ जनावर और ऊ लबरा अगमवकता के मों से तीन भूत आत्मन हां मेंढक के रूप में कड़त तको।

¹⁴ जे अजूबा काम दिखाबेवारी दुष्टात्माएं आंय, जो संसार के सब राजन के ऐंगर निकल के ई लाने जात आंय, कि उन हां महाबली परमेसुर से ऊ बड़े दिना के लाने लड़बे इकठ्ठो करें।

¹⁵ हेर, मैं भड़या घाईं आत आंव; धन्न बो आय, जो जागत रैत आय, और बो अपने उन्ना हां तके रैत आय, कि बो नंगो न फिरै, और मान्सन ऊकौ नंगापन न हेरें।

¹⁶ और उन ने ऊ न हां ऊ जांगा इकठ्ठो करो, जो इब्रानी बोली में हर-मगिदोन कहलात आय।

¹⁷ और सातवें सरगदूत ने अपनो कटोरा हवा पै उड़ेल दओ, और मन्दर के सिंहासन से बड़ी आवाज भई, कि “हो चुको”।

¹⁸ फिन बिजली कोंधी और बादल गर्जे, और धरती डोल गई, जब से मान्सन कौ जन्म धरती पै भओ, ऐसो बड़ो भूकम्प कभऊं नई भओ हतो।

¹⁹ और ऊ बड़े नगर के तीन टूंका हो गए, और दूसरे देसन के नगर सोई ढह गए, सो परमेसुर ने अपनी खीज में ऊहां अपने खुन्स के प्याले की मदरा पिया दई।

²⁰ और एक एक टापू अपनी जांगा से खिसक गए; और पहरवा कहां गए पता नईं पड़ो।

²¹ और आकास से धरती पै मन मन भर के ओला गिरे, ईसे कि जा विपत बिलात बड़ी हती, मान्सन ने परमेसुर हां ओला की विपत के लाने भलो बुरो कहो।