- यूहन्‍ना के दरसन कौ खुलासा 12 - Bundeli Holy Bible

¹ फिन सरग पै एक बड़ो चिन्ह दिखाई दओ, कि एक बईयर सूरज हां ओढ़नी जैसे ओढ़े हती, और चांद ऊके गोड़े तरें हतो, और ऊ की मूड़ पै बारह तारों कौ मुकट धरो हतो।

² बा पेट से भई, और चिल्लात हती, कायसे बच्चा होबे कौ पिरातो ऊहां हतो; और ऐसो लगत हतो की बच्चा हाबेवारो आय।

³ एक और चिन्ह सरग में दिखाई दओ, और तको, एक बड़े लाल रंग कौ अजगर हतो जीकी सात मूड़ और दस सींग हते, और ऊके मूड़न पै सात राजमुकुट धरे हते।

⁴ और ऊ ने अपनी पूंछ से आकास के तारों में से एक तिहाई खींच के धरती पै डाल दए, और बो अजगर ऊ बईयर जौन के बच्चा होने हतो, ऊके सामूं ठांड़ो हो गओ, कि जब ऊ को बच्चा होबै तो ऊहां निगल जाए।

⁵ ऊ को लड़का भओ जो सब राज्य और जातियन पै लोहे के राजदण्ड से राज करबे पै हतो, और ऊ को बच्चा परमेसुर के सिंहासन लौ एकाएक पोंचा दओ गओ।

⁶ और बा बईयर ऊ जंगल कुदाऊं भग गई, जिते परमेसुर ने ऊके लाने एक जांगा तईयार करी हती, कि बा उते एक हजार दो सौ साठ दिना लौ खाए पिए।

⁷ फिन सरग पै लड़ाई भई, मीकाईल सरगदूत और ऊके संग्गी अजगर से लड़बे हां कड़े, और अजगर और ऊके दूत के बीच लड़ाई भई।

⁸ परन्त अजगर जीत नईं पाओ, और सरग में उन के लाने जांगा नईं मिली।

⁹ और बो बड़ो अजगर जो इबलीस और शैतान छलिया कहात आय, और सबरे संसार हां बहकाबे वालो आय, धरती पै ऊ को और ऊके दूतन हां गिरा दओ गओ।

¹⁰ फिन मैंने सरग से एक बड़ो बोल सुनो, कि अब हमाए परमेसुर को तरन तारन, और बल, और राज, और ईसा मसीह को जस दिखानो आय; कायसे जो रात दिन परमेसुर के सामूं हमाए भईयन पै दोष लगात हतो, गिरा दओ गओ।

¹¹ और उन ने मेमने के रकत और अपनी गवाह से शैतान छलिया पै जीत पाई, और उन ने अपने प्रानन हां लौ दे दओ।

¹² ईसे सरग में रैबेवारो खुश हो; हे धरती, और समुन्दर तुम पै हाय! कायसे शैतान छलिया बड़ी खुन्स में तुमाए ऐंगर उतर आओ आय; कायसे ऊहां पता आय, कि ऊ की बेरा तनकदिना की आय।

¹³ जब अजगर ने हेरो, कि बो धरती पैगिरा दओ गओ आय, तो ऊ बईयर हां जौन बेटा जनी हती, ऊहां सताओ।

¹⁴ और ऊ बईयर हां बड़े उकाब के दो पंखा दय गए, कि सांप के सामूंसे उड़ के जंगल में ऊ जांगा जाए, जिते बा कछु बेरा लौ पाली जाबै।

¹⁵ सांप ने ऊ बईयर के पाछें अपने मों से नदिया जैसो पानू बहाओ, कि ऊहां ई नदिया में बहा दे।

¹⁶ परन्त धरती ने ऊ बईयर हां सम्भालो, और बो नदिया हां जौन अजगर के मों से कड़ी हती, ऊहां पी लओ।

¹⁷ अजगर बईयर पै बड़ो खिसयाओ, और ऊ ने ऊ बईयर के दूसरे लड़का बारन से जो परमेसुर की आज्ञाओं को मानत हते, और पिरभू यीशु की गवाह देत हते, लड़बे हां गओ। और बो समुन्दर की बालू पै जाके ठांड़ो हो गओ।