- फिलेमोन 1 - Bundeli Holy Bible

¹ पौलुस जौन यीशु मसीह के कारण जेहल में आय, और भईया तिमुथियुस ने लिखी संग्गी भईया फिलेमोन हां।

² और बहन अफफिया, और हमाए संग्गी अरखिप्पुस और फिलेमोन के घर में जुड़बेवाली मण्डली के जनन हां।

³ हमाए पिता परमेसुर और पिरभू यीशु मसीह में तुम हां दया और किरपा मिलत रैबे।

⁴ मोहां पिरभू में तोरे प्रेम और तोरे बिसवास जौन तें सबरे जनन पै धरे आय।

⁵ ऊके लाने रोजीना परमेसुर को जस मानत आंव; और प्रार्थना में तोहां याद करत आंव।

⁶ तोरे हमाए संग्गै जुड़बे से और तोरे भले कामन से पिरभू को और जस होबै।

⁷ कायसे भईया, तोरो प्रेम जो प्रभु से और मान्सन से लगो आय, ऊसे हमाए मन हां अच्छो लगो, सुनो आय कि तोसें मण्डली के जनन के मन हरे हो गए आंय।

⁸ मोहां मसीह में जा हिम्मत मिली, कि जौन चीज ठीक आय ऊहां करबे की अग्यां देओं।

⁹ मैं बूढ़ो पौलुस जौन यीशु मसीह के नाओं के कारण अबै जेहल में आंव, ऐसो साजो लगो कि तुम से प्रेम से कहों।

¹⁰ मैं अपने लड़का उनेसिमुस जौन ने जेहल में बचन सुनके बिसवास धरो ऊके लाने ऐसो कैत आंव।

¹¹ कि बो तो पेंला मोरे कोऊ काम को नईं हतो, परन्त अब तो तोरे और मोरे दोई के लाने बड़े काम को आय।

¹² ओई के लाने जौन मोरे हिये को टुकड़ा आय, जीहां मैंने तोरे ऐंगर पोंचा दओ आय।

¹³ ऊहां मैं अपने संग्गै धरो चाहत हतो, कि बो तोरे नाओं से ई जेहल में जौन बचन सुनाबे से आय, मोरी सेवा करै।

¹⁴ परन्त मैंने तोरी मरजी के बिना कछु नईं करो चाहो, कि तोरी मो पे दया मन से होबै, कोई दबाओ से नईं।

¹⁵ का पता कि ऊ तोसे कछु दिना तक न्यारो रहो कि सबरे हार तोरे संग्गै रैबे।

¹⁶ अब नौकर घांई नईं, परन्त ऊसे बढ़के मानो, भईया जैसो रैबे और जौन संसार के देखत और पिरभु में मोरो प्यारो आय।

¹⁷ तें मोहां अपनो संग्गी जाने, तो ऊहां ऐसो मानियो जैसे मोहां मानत आय।

¹⁸ और ऊने तोरो कछु नुकसान करो होबै, और तोसे कछु उधार लओ होबै, तो बो सबरो मोरे नाओं में लिख लईये।

¹⁹ मैं पौलुस अपने हाथन से लिख रओ आंव, कि मैं सबरो पटा दै हों; मोहां जौ कैबे की बात नईंयां, कि मोरो करजा जौन तो पे आय बो मानो तेंई आय।

²⁰ भईया जौ करके तो मोहां भलो लग है, तोरे ऐसो करबे से मानो तें मोरे हिये हां हरो भरो कर है।

²¹ तें मोरी बात मानत आय, ऐसो जानके और तो पै भरोसा धरके, मैंने जौ लिखो आय मोहां पता आय, कि तें मोरे कहे से बढ़के कर है।

²² मोरे रुकबे के लाने जांगा धरिये; मोहां पता आय कि तुमाई बिन्तवाई से मैं तुम हां फिन के मिल जै हों।

²³ इपफ्रास जौन प्रभु यीशु मसीह के कारण मोरे संग्गै जेहल में आय।

²⁴ और मरकुस और अरिस्तर्खुस और देमास और लूका जौन मोरे संग्गै काम करत आंय, तोहां नमस्कार कैत हैं।

²⁵ हमाए प्रभु यीशु मसीह की दया तुमाए जीवन पै बनी रैबे।