- नहेम्याह 9 - Bundeli Holy Bible

पाप कौ स्‍वीकारबो

¹ फिन ओई मईना के चौबीसबें दिना हों इस्राएली उपास कौ टाट पैरकें और मूड़ पै धूरा डाले भए, इकट्ठे हो गए।

² तब इस्राएल के बंस के जनें सब अन्‍यजातन सें न्‍यारे हो गए, और ठांड़े होकें, अपने अपने पापन और अपने पुरखन के अधरम के कामन हों मान लओ।

³ तब उनोंरन ने अपनी अपनी जागां पै ठांड़े होकें दिन के एक पहर लौ अपने यहोवा परमेसुर की ब्‍यवस्‍था की पोथी पढ़त, और दूसरे पहर अपने पापन हों मानत, और अपने यहोवा परमेसुर हों दंडवत करत रए।

⁴ येशू, बानी, कदमीएल, शबन्‍याह, बुन्‍नी, शेरेब्‍याह, बानी और कनानी ने लेवियन की छिड़ियन पै ठांड़े होकें ऊंची आवाज सें अपने यहोवा परमेसुर की दुहाई दई।

⁵ फिन येशू, कदमीएल, बानी हशब्‍नयाह, शेरेब्‍याह, होदिय्‍याह, शबन्‍याह और पतह्यह नाओं लेबियन नें कई, “ठांड़े हो; अपने यहोवा परमेसुर हों अनादिकाल सें लेकें अनंतकाल लौ धन्‍य कओ। तोरो महिमामय नाओं धन्‍य कहो जाए, जो सब धन्‍यबाद और स्‍तुति सें भौत जादां ऊंचो आए।”

पाप स्‍वीकारबे की बिन्‍तवाई

⁶ तेंई अकेलो यहोवा परमेसुर आय; सरग बल्‍कि सबसें ऊंचे सरग और ऊके सब ग्रह, और पृथ्‍वी और जो कछु ऊमें आय, और समंदर और जो कछु ऊमें आय, सबई हों तेंई नें बनाओ, और सबई की रक्षा तेंई करत आय; और सरग की पूरी सेना तोहों दंडवत करत आय।

⁷ हे यहोवा परमेसुर! तें ओई परमेसुर आय, जो अब्राम हों चुनकें कसदियन के ऊर नगर में सें काड़ लाओ, और ऊकौ नाओं अब्राहम रखो;

⁸ और ऊके हिया हों अपने संगै सच्‍चो पाकें, ऊसें बाचा बांधी, कि “मैं तोरे बंस हों कनानियों, हित्तियों, एमोरियों, परिज्‍जियों, यबूसियों और गिर्गाशियों कौ देस दैहों; और तेंने अपनो ऊ बचन पूरो सोई करो, कायसें तें धरमी आय।

⁹ फिन तेंने मिस्र में हमाए पुरखन के दुख पै नजर करी; और लाल समंदर के किनारे पै उनकी दुहाई सुनी।

¹⁰ राजा फिरौन और ऊके सब करमचारी बल्‍कि ऊके देस के सब जनों हों दंड देबे के लाने चिन्‍ह और चमत्‍कार दिखाए; कायसे तें जानत हतो कि बे उनसें ढिठाई कौ ब्‍यवहार करत आंय; और तेंने अपनो ऐसो बड़ो नाओं करो, जैसो आज लौ बनो आय।

¹¹ तेंने उनके अगारें समंन्‍दर हों ऐसो दो भाग करो, कि बे समंदर के मजारें धरती धरती पै चलकें पार हो गए; और जो उनके पाछें पड़े हते, उनहों तेंनें गैरी जागां में ऐसो डालो, जैसे पथरा गैरे समंदर में डालो जाए।

¹² फिन तेंने दिन हों बादल के खंबे में होकें और रात हों आगी के खंबे में होकें उनकी अगुवाई करी, कि जौन गैल पै उनहों चलने हतो, ऊमें उनहों उजयारो मिलै।

¹³ फिन तेंने सीनै पहरवा पै उतरकें आकास में सें उनके संगै बातें करीं, और उनहों सूदे नियम, सांची ब्‍यवस्‍था, अच्‍छी बिधियां और हुकम दए।

¹⁴ उनहों पवित्तर बिसराम दिन कौ ज्ञान दओ, और अपने दास मूसा के द्वारा हुकम, बिधियां और ब्‍यवस्‍था दईं।

¹⁵ उनकी भूख मिटाबे हों आकास सें उनें भोजन दओ और उनकी प्‍यास बुझाबे हों चट्टान में सें उनके लाने पानू काड़ो, और उनहों हुकम दओ कि जौन देस हों मैंने तुमें दैबे की कौल खाई आय, ऊके अधकारी होबे हों तुमोंरें ऊमें जाओ।

¹⁶ परन्‍त उनोंरन ने और हमाए पुरखन ने घमंड करो, और हठीले बने और तोरो हुकम नईं मानो;

¹⁷ और हुकम मानबे सें मना करो, और जो चमत्‍कारी काम तेंनें उनके मजारें करे हते, उनहों याद नईं करो, बल्‍कि हट करके इतै लौ बलवा करबेवारे बने, कि एक मुखिया ठैराओ कि अपनी गुलामी की दसा में फिन लौटें। परन्‍त तें छमा करबेवारो अनुग्रह और दया करबेवारो, देर सें गुस्‍सा करबेवारो और भौतई प्रेम करबेवारो ईसुर आय। तेंनें उनहों त्‍यागो नईंयां।

¹⁸ बल्‍कि जब उनोंरन ने सोने कौ एक बछड़ा ढालकें कई, ‘तुमाओ यहोवा परमेसुर जो तुमें मिसर देस सें छुड़ा लाओ आय, ऊ जौई आय,’ और तोरो बिलात अपमान करो,

¹⁹ तब भी तें जो भौतई दयालु आय, तेंने उनहों नें तौ जंगल में त्‍यागो; नें तौ दिन हों अगवाई करबेवारो बादल कौ खम्‍भा उन पै सें हटो, और नें रात हों उजयारा देबेवारो और उनहों गैल दिखाबेवारो आगी कौ खम्‍भा हों दूर करो।

²⁰ बल्‍कि तेंनें उनहों समजाबे के लाने अपनी आत्‍मा हों जौन भली आय दई, और अपनो मन्‍ना उनहों खिलाबो नईं छोड़ो, और उनकी प्‍यास बुझाबे हों पानी देत रओ।

²¹ चालीस साल लौ तें जंगल में उनकौ एैसो पालन पोसन करत रओ कि उनहों कछु कमी नईं भई; नें तौ उनके उन्‍ना पुराने भए और नें उनके गोड़े में सूजन भई।

²² फिन तेंने राज्‍य राज्‍य और देस देस के जनों हों उनके बस में कर दओ, और अलग-अलग जांगा उनहों बांट दई; और ई तरहां सें उनोंरन ने हेशबोन के राजा सीहोन और बाशान के राजा ओग दोंनों के देसों हों अपने अधकार में लै लओ।

²³ फिन तेंने उनकी संतान हों आकास के तारों जैसो बढ़ाकें ऊ देस में पोंचा दओ, जीके बारे में तेंने उनके पुरखन सें कई हती कि बे ऊमें जाकें ऊके अधकारी हो जाहैं।

²⁴ सो जा संतान जाके ऊकी अधकारी हो गई, और तेंनें ऊके द्वारा उनके देस के निवासी कनानियन हों दबाओ, और राजाओं और देस के लोगों समेंत उनहों, उनईं के हाथ में कर दओ, कि बे उनसें जो चाए सो करें।

²⁵ उनोंरन ने गढ़वाले नगर और उपजाऊ धरती ले लई, और सब तरहां की अच्‍छी चीजन सें भरे पूरे घरन के, और खुदे भए हौदों के, और दाख और जैतून की बारियों के, और खाबे के फलवाले मुतके पेड़ों के अधकारी हो गए; बे ऊहों खा खाकें अफर गए, और मोटे-ताजे हो गए, और तोरी बड़ी भलाई के कारन सें खूब सुख भोगत रए।

²⁶ परन्‍त बे तोसें दूर होकें बलवा करबेवारे बन गए और तोरी ब्‍यवस्‍था हों त्‍याग दओ, और तोरे जो आगमवक्‍ता तोरी कोद उनहों फेरबे के लाने ऊनहों चितात रए उनहों उनोंरन ने मार डालो, और तोरो बड़ो अपमान करो।

²⁷ ई कारन तेंने उनहों उनोंरन के दुस्‍मनों के हाथ में कर दओ, और उनोंरन ने उनहों आफत में डाल दओ; फिन भी जब जब बे आफत में पड़कें तोहों पुकारत हते, तब तें सरग सें उनोंरन की सुनत रओ; और तें जो भौतई दयालु आय, ई कारन सें उनोंरन के छुड़ाबेवारन हों भेजत रओ जो उनहों दुस्‍मनों के हाथ सें छुड़ात हते।

²⁸ परन्‍त जब जब बे आराम सें रैत हते, तब तब बे फिन तोरे सामूं बुराई करत हते, ई कारन तें उनहों दुस्‍मनों के हाथ में कर देत हतो, और बे उनपै राज करन लगत हते; फिन भी जब बे तोरे कुदाऊं फिरकें तोय पुकारत हते, तब तें सरग सें उनकी सुनत और तें जो दयालु आय, ई लाने बार बार उनहों छुड़ात,

²⁹ और उनहों चिताऊत हतो कि उनहों अपनी नेम ब्‍यवस्‍था के आधीन कर दे। परन्‍त बे घमंड करत रए और तोरो हुकम नईं मानत हते, और तोरे नेम, जिनहों अगर मान्‍स माने, तौ उनके कारन जियत रए, उनके बिरुद्ध पाप करत, और ढ़िटाई करत हते और नें सुनत हते।

³⁰ तें तौ मुतके साल लौ उनकी सहत रओ, और अपनी आत्‍मा सें अागमवक्‍तन के द्वारा उनहों चिताऊत रओ, परन्‍त बे कान नईं लगात हते, ई लाने तेंने उनोंरन हों देस देस के लोगों के हाथ में कर दओ।

³¹ तौभी तेंने जो भौतई दयालु आय, उनकौ अंत नईं कर डालो और नें उनहों त्‍याग दओ, कायसें तें अनुग्रहकारी और दया करबेवारो ईसुर आय।

³² अब हे हमाए यहोवा परमेसुर! हे महान बलवान और भययोग्‍य ईसुर! जो अपनी बाचा पालत और दया करत रओ आय, जो बड़ो कस्‍ट, अश्‍शूर के राजाओं के दिनन सें लेकें आज के दिना लौ हमें और हमाए राजाओं, हाकिमों, याजकों, नबियों, पुरखाओं, बल्‍कि तोरी सबरी परजा हों भोगने पड़ो आय, ऊ तोरी नजर में थोड़ो नें ठैरे।

³³ तौभी जो कछु हम पै बीतो आय ऊके बारे में तें तौ धरमी आय; तेंने तौ सच्‍चाई सें काम करो आय, परन्‍त हमने दुस्‍टता करी आय।

³⁴ हमाए राजाओं और हाकिमों, याजकों और पुरखाओं ने नें तौ तोरी ब्‍यवस्‍था हों मानो आय और नें तोरो हुकम और चितौनियों की कोद ध्‍यान दओ आय, जीसें तेंने उनहों चिताओ हतो।

³⁵ उनोंरन ने अपने राज्‍य में, और ऊ बड़े कल्‍यान की बेरा जो तेंने उनोंरन हों दओ हतो, और ई लम्‍बे चौड़े और उपजाऊ देस में तोरी सेवा नईं करी; और नें अपने बुरे कामन सें पछताव करो।

³⁶ हेर, हम आज कल भी गुलाम आंय; जौन देस तेंने हमाए पुरखन हों दओ हतो कि ऊकी अच्‍छी उपज खाएं और अच्छी बस्तों हों पाएं, ऐई में हम गुलाम आंय।

³⁷ ऐई उपज सें उन राजाओं हों जिनहों तेंने हमाए पापों के कारन हमाए ऊपर ठैराओ आय, मुतकौ धन मिलत आय; और बे हमाए सरीरों और हमाए पसुअन पै अपनी अपनी इच्‍छा के अनसार पिरभुता जतात आंय, ई लाने हम बड़े संकट में पड़े आंय।”

बाचा कौ बांधो जाबो

³⁸ ई सब के कारन, हम सच्‍चाई के संगै बाचा बांधत, और लिख सोई देत आंय, और हमाए हाकम, लेवीय और याजक ऊपै छाप लगात आंय।