- नहेम्याह 5 - Bundeli Holy Bible

गरीबों की परेसानी

¹ तब लोगों और उनकी बईयरन की कोद सें उनके भईया यहूदियन के बिरोद में बड़ो हो-हल्‍ला मचो।

² कछु तौ कैत हते, “हम अपने मोंड़ा-मोंड़ियों समेंत मुतके जनें आंय, ई लाने हमें नांज मिलो चईये कि ऊहों खाकें हम जियत रएं।”

³ कछु तौ कैत हतेे, “हम अपने अपने खेत, दाख के बगीचे और घरों हों अकाल के कारन गिरवी रखत आंय कि हमें नांज मिलै।”

⁴ फिन कछु जौ कैत हतेे, “हमने राजा कौ कर चुकाबे के लाने अपने अपने खेत और दाख के बगीचे पै रुपईया उधार लए।

⁵ परन्‍त हमाओ और हमाए भईयन कौ सरीर और हमाए और उनके लड़काबाले एकई जैसे आंय, तौभी हम अपने मोंड़ा-मोंड़ियों हों गुलाम बनात आंय; बल्‍कि हमाई कौनऊं कौनऊं मोंड़ी तौ दासी सोई हो चुकी आय; और हमाओ कछु बस नईं चलत, कायसे हमाए खेत और दाख के बगीचा दूसरन के हांतन में पड़ी आंय।”

⁶ ऐसी चिल्‍याहट और जे बातें सुनकें मैं बिलात गुस्‍सा भओ।

⁷ तब अपने हिया में सोच बिचार करके मैंने रईसों और हाकमन हों डांटकें कई, “तुम अपने अपने भईयन सें ब्‍याज लेत आव।” तब मैंने उनके बिरोद में एक बड़ी सभा बुलाई;

⁸ और मैंने उनसें कई, “हम लोगन ने तौ अपनी ताकत भर अपने यहूदी भईयन हों जो अन्‍यजातियन के हाथ बिक गए हते, कीमत देके छुड़ाओ आय, फिन तुम का अपने भईयन हों बैचहौ? का बे हमाए हाथ सें बिकहें?” तब बे चिमाए रए और कछु नें कै सके।

⁹ फिन मैं कैत गओ, “जो काम तुम औरें करत आव ऊ अच्‍छो नईंयां; का तुमहों ई कारन हमाए यहोवा परमेसुर कौ भय मानकें चलो नें चईये कि हमाए दुस्‍मन जो अन्‍यजाति के आंय, बे हमाई नामधराई नें करें?

¹⁰ मैं और मोरे भईया और सेवक उनहों रुपईया और नांज उधार देत आंय, परन्‍त हम ईकौ ब्‍याज छोड़ देबें।

¹¹ आजई उनहों उनके खेत, और दाख और जैतून के बगीचा, और घर फेर दो; और जो रुपईया, नांज, नओ दाखमधु, और जैतून कौ तेल तुम उनसें लेत आव, ऊकौ सौवां भाग फेर देओ?”

¹² उनोंरन नें कई, “हम उनहों फेर दैहें, और उनसें कछु नईं लैहें; जैसो तें कैत आय, बैसई हम करहें।” तब मैंने याजकन हों बुलाकें उन लोगन हों जा कौल धराई कि बे ऐई बचन के अनसार करहें।

¹³ फिन मैंने अपने उन्‍ना के छोर हों फटकार कें कई, “ऐई तरीका सें जो कौनऊं ई बचनन हों पूरौ नें करै, ऊहों यहोवा परमेसुर झाड़कें, ऊकौ घर और कमाई ऊसें छुड़ाए, और ऐई तरहां सें ऊ झाड़ो जाए, और छूछो हो जैहै।” तब सबरी सभा ने कई, “आमीन!” और यहोवा परमेसुर की स्‍तुति करी। और लोगों ने ई बचन के अनसार काम करो।

नहेम्‍याह की निस्‍वार्थ सेवा

¹⁴ फिन जबसे मैं यहूदा देस में उनकौ अधिपति ठैराओ गओ, मतलब राजा अर्तक्षत्र के बीसवें साल सें लेके ऊके बत्तीसवें साल लौ, मतलब बारह साल लौ मैं और मोरे भईयन ने अधिपति के हक्‍क कौ भोजन नईं खाओ।

¹⁵ परन्‍त पैलेवारे अधिपति जो मोयसें पैलां हते, बे परजा पै बोझ डालत हते, और उनसें रोटी, और दाखमधु, और ईके संगै चालीस शेकेल (लगभग आधा किलोग्राम) चांदी लेत हते, बल्‍कि उनके सेवक सोई परजा के ऊपर अधिकार जतात हते; परन्‍त मैं एैसो नईं करत हतो, कायसे मैं यहोवा परमेसुर कौ भय मानत हतो।

¹⁶ फिन मैं सहरपनाह के काम में लिपटो रओ, और हमोंरों ने कछु जमीन मोल नईं लई; और मोरे सब चाकर काम करबे के लाने उतै इकट्ठे रैत हते।

¹⁷ फिन मोरी मेज पै खाबेवारे एक सौ पचास यहूदी और हाकम और बे सोई हते, जो चारऊं कोद की अन्‍यजातियन में सें हमाए लिगां आए हते।

¹⁸ जो रोज के लाने खाबे हों तईयार करो जात हतो ऊ एक बैल, छै साजी साजी गाड़र या छिरियां हतीं, और मोरे लाने चिड़ियां सोई तईयार करी जात हतीं; दस दस दिना बाद तरहां तरहां की मुतकी दाखमधु सोई तईयार करी जात हती; फिन भी मैंने अधिपति के हक्‍क कौ भोजन नईं लओ, कायसे काम कौ बोझ परजा पै जादां हतो।

¹⁹ हे मोरे यहोवा परमेसुर! जो कछु मैंने ई परजा के लाने करो आय, ऊहों तें मोरे भले के लाने याद रख।