- नहेम्याह 2 - Bundeli Holy Bible

नहेम्‍याह कौ यरूशलेम जाबो

¹ अर्तक्षत राजा के बीसबें साल के नीसान नाओं मईना में, जब ऊके सामूं दाख कौ रस हतो, तब मैंने दाख कौ रस उठाकें राजा हों दओ। ईसें पेंलां मैं ऊके सामूं कभऊं उदास नईं भओ हतो।

² तब राजा ने मोय सें पूंछी, “तें तौ रोगी नईंयां, फिन तोरो मों उतरो काय है? जा तौ हिया की उदासी हुईयै।” तब मैं भौत जादां डर गओ।

³ मैंने राजा सें कई, “राजा हमेसा लौ जीयत रैबे! जब ऊ नगर जीमें मोरे पुरखाओं की कबरें आंय, उजड़ो डलो आय और ऊके फाटक जले भए आंय, तौ मोरो मों काय नें उतरै?”

⁴ राजा ने मोय सें पूंछो, “फिन तें का मांगत आय?” तब मैंने सरग के यहोवा परमेसुर सें बिन्‍तवाई करकें राजा सें कई;

⁵ “जदि राजा हों अच्‍छो लगै, और तें अपने दास सें खुस होबै, तो मोय यहूदा और मोरे पुरखन की कबरन के नगर हों पठै दे, जीसें मैं ऊहों बनवाओं।”

⁶ तब राजा ने जीके लिगां रानी सोई बैठी हती, मोय सें पूंछो, “तें कितेक दिनां लौ यात्रा में रैहै? और कब लौटहै?” सो राजा मोय पठैबे हों खुस भओ; और मैंने ऊके लाने एक समय ठैरा दओ।

⁷ फिन मैंने राजा सें कई, “जदि राजा हों अच्‍छो लगै, तौ महानद के पार के अधिपतियन के लाने ई आसय की चिठिया मोय दई जाबै कि जब लौ मैं यहूदा हों नें पोंचों, तब लौ बे मोहों अपने अपने देस में सें होकें जाबे दें;

⁸ और सरकारी जंगल के रखवारे आसाप के लाने सोई ई आसय की चिठिया मोहों दई जाए जीसें ऊ मोहों भवन सें लगे भए फाटकों की कड़ियों के लाने, और सहरपनाह के और ऊ घर के लाने, जीमें मैं जाकें रैहों, लकड़िया देे।” मोरे यहोवा परमेसुर की किरपादृस्‍टि मोपै हती, ई कारन राजा ने जा बिनती मान लई।

⁹ तब मैंने महानद के पार के अधिपतियन के लिगां जाकें उनहों राजा की चिठियां दईं। राजा ने मोरे संगै सेनापति और घुड़सवार सोई भेजे हते।

¹⁰ ऐसो सुनकें कि एक मान्‍स इस्राएलियन कौ भलो करबे के लाने आव है, होरोनी सम्‍बल्‍लत और तोबियाह नाओं अधकारी जो अम्‍मोनी हतो, उन दोनों हों भौत बुरओ लगो।

¹¹ जब मैं यरूशलेम हों पोंच गओ, तौ उतै तीन दिनां लौ रओ।

¹² तब मैं थोड़े मान्‍सन हों लेकें रात में उठो; मैंने कौनऊं हों नईं बताओ कि मोरे यहोवा परमेसुर ने यरूशलेम की भलाई के लाने मोरे हिया में का बात डारी हती। अपनी सवारी के पसु हों छोड़ कौनऊं पसु मोरे संगै नईं हतो।

¹³ मैं रात हों तराई के फाटक में होकें कड़ो और अजगर के सोते की कोद, और कूड़ाफाटक के लिगां गओ, और यरूशलेम की टूटी भई सहरपनाह और जले फाटकन हों हेरो।

¹⁴ तब मैं आंगू बढ़कें सोते के फाटक और राजा के कुण्‍ड के लिगां गओ; परन्‍त मोरी सवारी के पसु के लाने आगे जाबे की जागां नईं हती।

¹⁵ तब मैं रातई रात नरवा सें होकें सहरपनाह हों हेरत भओ चढ़ गओ; फिन घूमकें तराई के फाटक सें भीतर आव, और ई तरहां लौट आओ।

¹⁶ हाकम नईं जानत हते कि मैं कितै गओ और का करत हतो; बल्‍कि मैंने तब लौ नें तौ यहूदियन हों कछु बताओ हतो और नें याजकन और नें रईसन और नें हाकमन और नें दूसरे काम करबेवारन हों।

¹⁷ तब मैंने उनसें कई, “तुम तौ खुदई हेरत आव कि हम कैसी हालत में आंय, कि यरूशलेम उजाड़ पड़ो आय और ऊके फाटक जले भए आंय। आओ, हम यरूशलेम की सहरपनाह हों बनाबें, कि आंगे हों हमाई नामधराई नें होबै।”

¹⁸ फिन मैंने उनोंरन हों बताओ, कि मोरे यहोवा परमेसुर की किरपादृस्‍टि मोपै कैसी भई और राजा ने मोयसें का का बातें कईं हतीं। तब उनोंरन ने कई, “आओ, हम करयाई कसकें बनान लगें।” और उनोंरन ने ई भले काम हों करबे के लाने हिम्‍मत बांध लई।

¹⁹ जौ सुनकें होरोनी सम्‍बल्‍लत और तोबियाह नाओं अधकारी जो अम्‍मोनी हतो, और गेशेम नाओं एक अरबी, हमाओ मजाक उड़ाऊन लगे; और हमें घटिया जान कें कैन लगे, “जौ तुम का काम करत आव? का तुम राजा के बिरोद में बलबा करहौ?”

²⁰ तब मैंने उनहों जबाब देकें उनसें कई, “सरग कौ यहोवा परमेसुर हमाओ काम सफल करहै, ई लाने हम ऊके दास करयाई बांधकें बनाहें; परन्‍त यरूशलेम में तुमाओ नें तौ कछु हींसा, नें कछु अधकार, और नें कौनऊं पुस्तैनी हक्क आय।”